હોસ્પિટલમાંથી પરત ફર્યો સ્ટાર પેસર, સૂર્યવંશી-જૈસવાલ સામે ઉતરવા તૈયાર
IPL 2026માં રાજસ્થાન રોયલ્સ સામેની મહત્વપૂર્ણ મેચ પહેલાં દિલ્હી કેપિટલ્સને મોટી રાહત મળી છે. ટીમનો દક્ષિણ આફ્રિકન સ્ટાર ફાસ્ટ બોલર લુન્ગી એન્ગિડી (Lungi Ngidi) હોસ્પિટલમાંથી ડિસ્ચાર્જ થયા બાદ ફરી ટીમ સાથે જોડાયો છે અને મેચ માટે ઉપલબ્ધ માનવામાં આવી રહ્યો છે.
તાજેતરમાં પંજાબ કિંગ્સ સામેની મેચ દરમિયાન કેચ લેવાના પ્રયાસમાં એન્ગિડીને ગંભીર માથાની ઇજા થઈ હતી. ઇજાના કારણે તેને તરત જ મેદાનમાંથી સ્ટ્રેચર પર બહાર લઈ જઈ હોસ્પિટલમાં દાખલ કરવામાં આવ્યો હતો. આ ઘટનાના કારણે દિલ્હી કેપિટલ્સના બોલિંગ વિભાગને મોટો ઝટકો લાગ્યો હતો.પરંતુ હવે તાજા અપડેટ મુજબ એન્ગિડીની તબિયત સ્થિર છે અને તે ફરી ટીમ સાથે જોડાઈ ગયો છે. રાજસ્થાન રોયલ્સ સામેની મેચમાં તેની હાજરી ટીમ માટે મહત્વપૂર્ણ સાબિત થઈ શકે છે. ખાસ કરીને RRના ઓપનિંગ બેટ્સમેન વૈભવ સૂર્યવંશી અને યશસ્વી જયસવાલ હાલ સારા ફોર્મમાં છે, તેથી તેમની સામે ઝડપી બોલિંગ એટેક મજબૂત બનવું દિલ્હીના માટે જરૂરી છે.
આ મેચ દિલ્હી કેપિટલ્સ માટે ખૂબ જ મહત્વપૂર્ણ છે, કારણ કે ટીમ હાલ પોઈન્ટ્સ ટેબલમાં પાછળ ચાલી રહી છે અને પ્લેઓફની રેસમાં ટકવા માટે જીત જરૂરી બની ગઈ છે. બીજી તરફ રાજસ્થાન રોયલ્સ જીતની લયમાં છે અને ટોપ-4માં પોતાની સ્થિતિ મજબૂત કરવાની કોશિશ કરી રહી છે. એન્ગિડીની વાપસીથી દિલ્હીના બોલિંગ વિભાગને વધારાની તાકાત મળશે અને ટીમ મેનેજમેન્ટને આશા છે કે તે સૂર્યવંશી-જયસવાલ જેવી જોખમી ઓપનિંગ જોડી સામે અસરકારક પ્રદર્શન કરી શકશે.
