એશિયન ગેમ્સ 2026માં ભારતીય બોક્સિંગ માટે એક મહત્વપૂર્ણ સિદ્ધિ સામે આવી છે. હરિયાણાના ખેડૂત પરિવારમાંથી આવેલા યુવા બોક્સર અંકુશ પંઘાલે પુરુષોની 80 કિલોગ્રામ કેટેગરીમાં સેમિફાઇનલમાં પ્રવેશ કરીને ભારત માટે બોક્સિંગનો પ્રથમ મેડલ નિશ્ચિત કર્યો છે. ક્વાર્ટર ફાઇનલમાં તેમણે તાજિકિસ્તાનના નેક્રુઝ સલીમોવને 5-0થી હરાવ્યો હતો. પાંચેય જજોના સર્વસંમતિભર્યા નિર્ણય સાથે અંકુશે સેમિફાઇનલમાં સ્થાન મેળવ્યું અને ભારતનો મેડલ પાકો કર્યો.
11 વર્ષની ઉંમરે બોક્સિંગની શરૂઆત : અંકુશ પંઘાલનો જન્મ 13 ઓગસ્ટ 2005ના રોજ હરિયાણામાં થયો હતો. તેમણે માત્ર 11 વર્ષની ઉંમરે બોક્સિંગની તાલીમ શરૂ કરી હતી. જોકે, તેમની રમતની સફર બોક્સિંગથી શરૂ થઈ નહોતી. શરૂઆતમાં તેઓ કબડ્ડી રમતા હતા અને જિલ્લા સ્તરે ગોલ્ડ મેડલ પણ જીત્યો હતો. બાદમાં તેમના પિતા સુરેશ પંઘાલની સલાહથી અંકુશે કબડ્ડી છોડીને બોક્સિંગને પોતાની કારકિર્દી બનાવવાનું નક્કી કર્યું,બોક્સિંગ પસંદ કરવાનો નિર્ણય સરળ નહોતો. શરૂઆતમાં ગામના કેટલાક લોકો તેમના નિર્ણયની મજાક ઉડાવતા હતા. તેમ છતાં અંકુશે પોતાનું ધ્યાન તાલીમ અને પ્રદર્શન પર જ રાખ્યું. માત્ર 14 વર્ષની ઉંમરે તેમણે સ્કૂલ નેશનલ ટુર્નામેન્ટમાં ગોલ્ડ મેડલ જીતીને પોતાની પ્રતિભાનો પરિચય આપ્યો હતો. કોરોના મહામારી દરમિયાન પણ તેમણે તાલીમ ચાલુ રાખી હતી.
ખેડૂત પરિવારથી સેનામાં હવાલદાર : અંકુશનો પરિવાર રમતગમત સાથે જોડાયેલો રહ્યો છે. તેમના પિતા સુરેશ પંઘાલ પૂર્વ રાષ્ટ્રીય કબડ્ડી ખેલાડી છે અને હોટલનું સંચાલન કરે છે. તેમની માતા મુકેશ દેવી તથા બહેનો નીલમ, અંજુ બાલા અને નીતુ રાની પણ રમતગમત સાથે જોડાયેલી છે. આ રમતગમતના વાતાવરણમાં અંકુશે પોતાની અલગ ઓળખ ઊભી કરી છે.વર્ષ 2024માં અંકુશ ભારતીય સેનામાં હવાલદાર બન્યા. રમત અને સેનાની જવાબદારી વચ્ચે તાલમેલ જાળવી તેમણે આંતરરાષ્ટ્રીય બોક્સિંગમાં સતત પ્રગતિ કરી. ખેડૂત પરિવારની પૃષ્ઠભૂમિમાંથી આગળ વધીને સેનામાં હવાલદાર અને ત્યારબાદ આંતરરાષ્ટ્રીય સ્તરના બોક્સર તરીકે તેમની સફર નોંધપાત્ર રહી છે.
વર્લ્ડ બોક્સિંગ કપથી કોમનવેલ્થ સુધી: અંકુશને આંતરરાષ્ટ્રીય સ્તરે મોટી ઓળખ 2025ના વર્લ્ડ બોક્સિંગ કપ ફાઇનલમાં મળી હતી. ગ્રેટર નોઇડામાં યોજાયેલી સ્પર્ધામાં તેમણે 80 કિલોગ્રામ કેટેગરીમાં સિલ્વર મેડલ જીત્યો હતો. ત્યારબાદ 2026માં ગ્લાસગોમાં યોજાયેલી કોમનવેલ્થ ગેમ્સમાં તેમણે આ જ કેટેગરીમાં ગોલ્ડ મેડલ મેળવી પોતાની કારકિર્દીમાં વધુ એક મોટું પદક ઉમેર્યું. ચેકિયાના ઉસ્તી નાદ લાબેમ ખાતે યોજાયેલી ગ્રાન્ડ પ્રિક્સમાં પણ તેમણે ગોલ્ડ મેડલ જીત્યો હતો. એશિયન ગેમ્સમાં અંકુશે શરૂઆતથી જ મજબૂત પ્રદર્શન કર્યું. રાઉન્ડ ઓફ 32માં તેમણે બહેરીનના હમ્સા વોગેલને 5-0થી હરાવ્યા હતા. ત્યારબાદ આગળ વધતા ક્વાર્ટર ફાઇનલમાં તાજિકિસ્તાનના નેક્રુઝ સલીમોવ સામે પણ 5-0થી જીત મેળવી. આ જીત સાથે તેઓ સેમિફાઇનલમાં પહોંચ્યા અને ભારતનો એશિયન ગેમ્સ 2026માં બોક્સિંગનો પ્રથમ મેડલ નિશ્ચિત કર્યો.
હવે નજર ગોલ્ડ મેડલ પર: કોમનવેલ્થ ગેમ્સમાં ગોલ્ડ જીત્યા બાદ અંકુશ હવે એશિયન ગેમ્સમાં પણ ગોલ્ડ મેડલ મેળવવાનું સપનું લઈને આગળ વધી રહ્યા છે. મેડલ પહેલેથી જ નિશ્ચિત થઈ ગયો છે, પરંતુ તેમની નજર હવે સેમિફાઇનલ અને ત્યારબાદ ફાઇનલ પર છે. 11 વર્ષની ઉંમરે શરૂ કરેલી બોક્સિંગની સફરથી લઈને 2026ની એશિયન ગેમ્સના પોડિયમ સુધી પહોંચેલા અંકુશ પંઘાલે મહેનત, સતત તાલીમ અને રમત પ્રત્યેની પ્રતિબદ્ધતાથી પોતાની ઓળખ બનાવી છે.
