મુંબઈમાં શનિવારે રાત્રે રણબીર કપૂર, આલિયા ભટ્ટ, વિકી કૌશલ અને દિગ્દર્શક સંજય લીલા ભણસાલી એકસાથે જોવા મળ્યા હતા. ચારેય ‘લવ એન્ડ વોર’ની ટીમ સાથે ડિનર માટે પહોંચ્યા હતા. ડિનર બાદ જ્યારે તેઓ બહાર આવ્યા ત્યારે ફોટોગ્રાફર્સે તેમની તસવીરો લેવાનું શરૂ કર્યું હતું. આ દરમિયાન રણબીર એક પાપારાઝીની વારંવાર પોઝ આપવાની માગણીથી નારાજ થઈ ગયા હતા. ડિનર બાદ ચારેયે થોડો સમય સાથે ફોટો સેશન પણ કર્યું હતું. આ દરમિયાન સંજય લીલા ભણસાલી થોડા સમય માટે ફ્રેમમાંથી બહાર જવા લાગ્યા હતા. રણબીરે તેમને પાછા બોલાવ્યા અને સાથે તસવીર પડાવવા કહ્યું હતું. ત્યારબાદ રણબીર, આલિયા, વિકી અને ભણસાલીએ સાથે પોઝ આપ્યા હતા.
ફોટો સેશન પૂરું થયા બાદ રણબીર ત્યાંથી જવા લાગ્યા હતા. તે સમયે એક પાપારાઝી સતત તેમને આલિયા અને વિકી સાથે અલગથી પોઝ આપવા માટે કહી રહ્યો હતો. વારંવાર કહેવામાં આવતા રણબીરે પાછળ ફરીને પાપારાઝીને કહ્યું હતું, “તું બહુ બોલી રહ્યો છે…” રણબીરના આ શબ્દોનો વીડિયો સોશિયલ મીડિયા પર ચર્ચામાં આવ્યો છે. આ દરમિયાન રણબીર અને વિકી કૌશલ એકબીજાને ગળે મળ્યા હતા. ત્યારબાદ આલિયા પોતાની કાર તરફ આગળ વધી રહી હતી. ભીડ વચ્ચે રણબીર તેની નજીક આવ્યા અને કમર પર હાથ રાખીને તેને સુરક્ષિત રીતે કાર સુધી લઈ ગયા હતા. આ દરમિયાન આલિયા સ્મિત કરતી જોવા મળી હતી.
આ સમગ્ર ઘટનામાં રણબીરનો આ અંદાજ પણ ચર્ચામાં રહ્યો છે. ભીડ અને સતત તસવીરો લેતા ફોટોગ્રાફર્સ વચ્ચે તેણે આલિયાને પોતાની સાથે રાખીને કાર સુધી પહોંચાડી હતી. રણબીર ઓલિવ-ગ્રીન શોર્ટ કુર્તા અને બ્લેક જીન્સમાં જોવા મળ્યો હતો, જ્યારે આલિયાએ નિયોન-ગ્રીન આઉટફિટ પહેર્યું હતું. વિકી કૌશલ વ્હાઇટ શર્ટ અને બ્લેક ટ્રાઉઝરમાં જોવા મળ્યો હતો. આલિયા અને વિકી આ જ શનિવારે મનીષ મલ્હોત્રાના મિઝવાન શોમાં પણ જોવા મળ્યા હતા, જ્યાં બંને શોસ્ટોપર બન્યા હતા. બીજી તરફ, આ જ અઠવાડિયામાં ‘લવ એન્ડ વોર’માં રણબીર કપૂર, આલિયા ભટ્ટ અને વિકી કૌશલના ફર્સ્ટ-લુક પોસ્ટર પણ જાહેર કરવામાં આવ્યા છે. આ ફિલ્મને લઈને ત્રણેય કલાકારો સતત ચર્ચામાં છે.
રણબીરની આ ઘટના એવા સમયે સામે આવી છે જ્યારે પાપારાઝીની મહિલાઓને લઈને ફોટોગ્રાફી કરવાની રીત પર સલમાન ખાન પણ નારાજગી વ્યક્ત કરી ચૂક્યો છે. ‘બિગ બોસ 20’ના ‘વીકએન્ડ કા વાર’માં સલમાને મહિલાઓની તસવીરો અને વીડિયો ખોટા કે અસહજ એંગલથી લેવાના મુદ્દે પાપારાઝીને સવાલ કર્યા હતા. સલમાને કહ્યું હતું કે ઘણી વખત કેમેરા મહિલાઓના પગ અથવા પાછળથી તસવીરો લેવા પર વધારે ધ્યાન આપે છે. જો કોઈ મહિલા આવી તસવીરોથી અસહજ હોય તો તેણે તેનો વિરોધ કરવો જોઈએ, એવું પણ સલમાને કહ્યું હતું. તેણે સઈ માંજેકર અને નેહા ધૂપિયાનું ઉદાહરણ આપતાં જણાવ્યું હતું કે નેહા પણ આવી બાબતોને લઈને પાપારાઝી પર નારાજગી વ્યક્ત કરી ચૂકી છે.
સલમાને એ વાત પર પણ સવાલ ઉઠાવ્યો હતો કે મહિલાઓની આવી તસવીરો સાથે ‘ઓળખો તો કોણ છે’ જેવા કેપ્શન શા માટે મૂકવામાં આવે છે. તેણે કહ્યું હતું કે મહિલાઓને પોતાની અસહજતા અંગે અવાજ ઉઠાવવો જોઈએ. સલમાને બિગ બોસના ઘરમાં 108 કેમેરા હોવા છતાં મહિલાઓને ખોટા એંગલથી શૂટ કરવામાં આવતી ન હોવાનું ઉદાહરણ પણ આપ્યું હતું. પાપારાઝી સાથેના વર્તનને લઈને અગાઉ પણ અનેક સેલેબ્સે નારાજગી વ્યક્ત કરી છે. નેહા ધૂપિયાએ એક એવોર્ડ સમારોહમાંથી બહાર નીકળતી વખતે પાછળથી તસવીરો લેવાના મુદ્દે પાપારાઝીને કડક શબ્દોમાં રોક્યા હતા. તેમના ગ્રે વાળ અંગે કરવામાં આવેલી ટિપ્પણી બાદ તેમણે પાપારાઝીને આવી તસવીરો ન લેવાની અપીલ કરી હતી.
મલાઈકા અરોરાનો પણ એક વીડિયો સામે આવ્યો હતો, જેમાં પાપારાઝી તેમની નજીક આવતા તેઓ નારાજ થઈ હતી અને તેમને થોડું અંતર રાખવા કહ્યું હતું. મૌની રોય પણ કારમાં બેઠા બાદ ચહેરા પર સતત પડતી ફ્લેશ લાઇટથી પરેશાન થઈ હતી અને પાપારાઝીને રોક્યા હતા. ઝરીન ખાન પણ એક બ્રાન્ડ ઇવેન્ટ દરમિયાન પાપારાઝીના એક સવાલથી નારાજ થઈ હતી. પાપારાઝીએ તેને ડ્રેસ પહેરીને બતાવવાનું કહ્યું હતું, જેના જવાબમાં ઝરીને પોતાની સાથે આ પ્રકારની વાત ન કરવાની અને હદમાં રહીને વાત કરવાની ચેતવણી આપી હતી.
તારા સુતારિયા પણ અનેક વખત પાપારાઝીથી અસહજ થતી જોવા મળી છે. એક વીડિયોમાં એક ફોટોગ્રાફર કેમેરા લઈને તેની ખૂબ નજીક પહોંચ્યો હતો ત્યારે તારાએ કેમેરો એક તરફ કરી દીધો હતો અને પોઝ આપ્યા વગર આગળ વધી ગઈ હતી. અન્ય એક પ્રસંગે કારમાંથી બહાર આવ્યા બાદ પાપારાઝીની ભીડ જોઈને તે પોઝ આપ્યા વગર અંદર ચાલી ગઈ હતી. આલિયા ભટ્ટ પણ અગાઉ પોતાની પ્રાઇવસી અંગે પાપારાઝી સામે નારાજગી વ્યક્ત કરી ચૂકી છે. લગભગ બે વર્ષ પહેલાં એક ઘટનામાં પાપારાઝી તેને ફોલો કરીને બિલ્ડિંગની અંદર આવવાનો પ્રયાસ કરી રહ્યા હતા ત્યારે આલિયાએ તેમને રોકીને કહ્યું હતું કે આ તેની પ્રાઇવેટ સ્પેસ છે. તેની ટીમે પણ ફોટોગ્રાફર્સને અંદર આવતા અટકાવ્યા હતા. એક અન્ય પ્રસંગે દૂરની બિલ્ડિંગમાંથી તેની તસવીરો લેવામાં આવી હતી ત્યારે પણ તેણે પ્રાઇવસી અંગે નારાજગી વ્યક્ત કરી હતી. હવે રણબીર કપૂરનો “તું બહુ બોલી રહ્યો છે” વાળો વીડિયો અને ત્યારબાદ આલિયાને ભીડમાંથી પોતાની સાથે કાર સુધી લઈ જવાનો વીડિયો સોશિયલ મીડિયા પર ચર્ચામાં છે. એક તરફ પાપારાઝી અને સેલેબ્સ વચ્ચે પ્રાઇવસી અને ફોટોગ્રાફી અંગેનો મુદ્દો ફરી ચર્ચામાં આવ્યો છે, તો બીજી તરફ ‘લવ એન્ડ વોર’ની ટીમની સાથે રણબીર-આલિયાની આ તસવીરો પણ લોકોનું ધ્યાન ખેંચી રહી છે.
