નવી દિલ્હીથી સાઉદી અરેબિયાની રાજધાની રિયાધ જઈ રહેલી એર ઈન્ડિયાની ફ્લાઈટને હુથી હુમલાના અહેવાલો બાદ અધવચ્ચેથી પાછી ફરવાની ફરજ પડી હતી. એર ઈન્ડિયાના અધિકારીઓએ જણાવ્યું હતું કે એર ઈન્ડિયા અને એર ઈન્ડિયા એક્સપ્રેસ બંનેએ 10 ઓક્ટોબર, 2026 સુધી રિયાધ આવતી-જતી તેમની ફ્લાઈટ્સ સ્થગિત કરી દીધી છે. આ નિર્ણય એવા સમયે લેવામાં આવ્યો છે જ્યારે યમનના ઈરાન-સમર્થિત હુથી બળવાખોરોએ રિયાધમાં કિંગ ખાલિદ ઈન્ટરનેશનલ એરપોર્ટ પર નવા મિસાઈલ હુમલાનો દાવો કર્યો છે. નોંધનીય છે કે ઈન્ડિગો અને આકાસા એરે પણ રિયાધ જતી તેમની ફ્લાઈટ્સ રદ કરી દીધી છે.
રિયાધ એરપોર્ટ દ્વારા મુસાફરો માટે ટ્રાવેલ એલર્ટ જાહેર
રિયાધના કિંગ ખાલિદ ઈન્ટરનેશનલ એરપોર્ટે 8 ઓક્ટોબરે મુસાફરો માટે ટ્રાવેલ એલર્ટ જાહેર કર્યું હતું. એરપોર્ટે મુસાફરોને સલાહ આપી હતી કે તેઓ એરપોર્ટ પર પહોંચતા પહેલા ફ્લાઈટની સ્થિતિની પુષ્ટિ કરવા માટે સીધા તેમની એરલાઈન્સનો સંપર્ક કરે અને સહકારની અપીલ કરી હતી. આ એલર્ટને કારણે રિયાધ આવતી-જતી ફ્લાઈટ્સ અંગે મુસાફરોની ચિંતા વધી ગઈ છે. સાઉદી અરેબિયામાં ભારતીય દૂતાવાસે પણ એરપોર્ટનું આ એલર્ટ X (અગાઉનું ટ્વિટર) પર શેર કર્યું હતું.
’80 મિનિટ સુધી કોઈ ફ્લાઈટ ઉતરી નહીં’
ફ્લાઈટરેડાર24 (FlightRadar24) એ સોશિયલ મીડિયા પ્લેટફોર્મ X પર સાંજે 4:29 વાગ્યે (IST) માહિતી આપી હતી કે અગાઉની 80 મિનિટ દરમિયાન રિયાધ એરપોર્ટ પર કોઈ ફ્લાઈટ ઉતરી ન હતી. વધુમાં અગાઉની 90 મિનિટ દરમિયાન એરપોર્ટ પરથી કોઈ વિમાને ઉડાન ભરી ન હતી. જોકે ત્યારબાદ રિયાધ એરપોર્ટ પર ફ્લાઈટ કામગીરી ફરી શરૂ થઈ હતી. હુથીઓના હુમલાના દાવા બાદ સમગ્ર વિસ્તારમાં વ્યાપક ચિંતાનું વાતાવરણ સર્જાયું છે.
હુથીઓનો રિયાધ એરપોર્ટ પર હુમલાનો દાવો
યમનમાં સક્રિય ઈરાન-સમર્થિત હુથી બળવાખોરોએ રિયાધમાં કિંગ ખાલિદ ઈન્ટરનેશનલ એરપોર્ટ પર મિસાઈલ હુમલો કરવાનો દાવો કર્યો છે. હુથીઓએ અગાઉ પણ સાઉદી અરેબિયાના સૈન્ય મથકો અને એરપોર્ટને નિશાન બનાવવાનો દાવો કર્યો છે. બુધવારે તેમણે યમનના બંદર શહેર એડનના એરપોર્ટ પર પણ મિસાઈલ હુમલો કરવાનો દાવો કર્યો હતો. હુથી બળવાખોરોએ સાઉદી અરેબિયાના દક્ષિણ-પશ્ચિમ ભાગમાં આવેલા અનેક સૈન્ય મથકો પર હુમલો કરવાનો દાવો પણ કર્યો હતો.
