સોચી નજીક સમુદ્રમાં હુમલા બાદ લાઇબેરિયન ધ્વજવાળા ઓઇલ ટેન્કરમાં લાગી આગ; રશિયન અધિકારીઓના જણાવ્યા અનુસાર તમામ 23 ભારતીય ક્રૂ સભ્યો સુરક્ષિત, કોઈ જાનહાનિ નહીં,રશિયાના બ્લેક સી કિનારે સોચી નજીક મંગળવારે એક ઓઇલ ટેન્કર પર હુમલા બાદ ભીષણ આગ લાગી હતી. આ ઘટનામાં સૌથી મોટી રાહતની વાત એ રહી કે ટેન્કરમાં સવાર તમામ 23 ક્રૂ મેમ્બર્સને સુરક્ષિત રીતે રેસ્ક્યૂ કરી લેવામાં આવ્યા હતા. રશિયાના પરિવહન મંત્રાલયના જણાવ્યા અનુસાર, ટેન્કરમાં સવાર તમામ ક્રૂ સભ્યો ભારતીય નાગરિકો હતા અને પ્રાથમિક માહિતી પ્રમાણે કોઈને ઈજા થઈ નથી.
આ ટેન્કરની ઓળખ Aframax Rio તરીકે કરવામાં આવી છે. તે લાઇબેરિયન ધ્વજવાળું ઓઇલ ટેન્કર છે અને રશિયાના દક્ષિણ કિનારે આવેલા લોકપ્રિય શહેર સોચી નજીક બ્લેક સીમાં હતું. રશિયન પરિવહન મંત્રાલયના જણાવ્યા અનુસાર, ટેન્કર પર એક માનવરહિત નૌકા અથવા નેવલ ડ્રોન દ્વારા હુમલો કરવામાં આવ્યો હતો.હુમલા બાદ ટેન્કરમાં આગ ફાટી નીકળી હતી અને સમુદ્રમાં રહેલું ક્રૂડ ઓઇલ સળગવા લાગ્યું હતું.હુમલો એટલો ગંભીર હતો કે ટેન્કરમાંથી નીકળતી આગની જ્વાળાઓ અને કાળા ધુમાડાના ગોટેગોટા સોચીના દરિયાકાંઠા પરથી પણ જોવા મળ્યા હતા. શરૂઆતમાં આગની તીવ્રતા એટલી વધારે હતી કે ફાયરફાઇટર્સ માટે સીધા જહાજ સુધી પહોંચીને આગ પર કાબૂ મેળવવી મુશ્કેલ બની હતી. જોકે, આગની તીવ્રતા ઘટ્યા બાદ બચાવ અને ફાયરફાઇટિંગ ટીમોએ તેને કાબૂમાં લેવાની કામગીરી શરૂ કરી હતી.
આ ઘટના બાદ સ્થાનિક પ્રશાસને સાવચેતીના પગલાંરૂપે સોચી નજીકના સિરિયસ વિસ્તારમાં દરિયાકિનારા અને બીચ બંધ કરી દીધા હતા. અધિકારીઓ દ્વારા હવા અને પાણીની ગુણવત્તા પર નજર રાખવામાં આવી રહી હતી. ઉપલબ્ધ માહિતી મુજબ, મોનિટરિંગ દરમિયાન પ્રદૂષક તત્વોનું પ્રમાણ સ્વીકાર્ય મર્યાદા કરતાં ઘણું ઓછું હોવાનું અને લોકોના સ્વાસ્થ્ય માટે તાત્કાલિક જોખમ ન હોવાનું સ્થાનિક અધિકારીઓએ જણાવ્યું હતું.આ હુમલો એવા સમયે થયો છે જ્યારે રશિયા-યુક્રેન યુદ્ધ વચ્ચે બ્લેક સીમાં કોમર્શિયલ શિપિંગ માટે જોખમ સતત વધી રહ્યું છે. છેલ્લા કેટલાક સમયથી આ વિસ્તારમાં વેપારી જહાજો અને દરિયાઈ માર્ગોને લઈને સુરક્ષાની ચિંતાઓ વધી છે. 6 ઓક્ટોબરના રોજ બ્લેક સીમાં અન્ય વેપારી જહાજો પર પણ ડ્રોન હુમલાના અહેવાલો સામે આવ્યા હતા, જેના કારણે આ સમગ્ર વિસ્તારમાં દરિયાઈ પરિવહનની સુરક્ષા અંગે ચિંતા વધુ વધી છે.
Aframax Rio સાથે બનેલી આ ઘટના ભારત માટે પણ ખાસ મહત્વ ધરાવે છે, કારણ કે જહાજમાં સવાર તમામ 23 લોકો ભારતીય નાગરિકો હતા. હાલમાં સૌથી મોટી રાહત એ છે કે તમામ ભારતીય ક્રૂ સભ્યોને કોઈ જાનહાનિ વિના સુરક્ષિત રીતે બહાર કાઢવામાં આવ્યા છે. રશિયન અધિકારીઓના જણાવ્યા અનુસાર, રેસ્ક્યૂ કામગીરી સફળ રહી હતી અને આગ પર કાબૂ મેળવવા માટે જરૂરી કાર્યવાહી કરવામાં આવી રહી હતી.બ્લેક સીમાં બનેલી આ ઘટના ફરી એકવાર દર્શાવે છે કે ચાલુ યુદ્ધના કારણે સામાન્ય કોમર્શિયલ શિપિંગ અને તેમાં કામ કરતા ભારતીય સહિતના આંતરરાષ્ટ્રીય ક્રૂ મેમ્બર્સ સામે કેટલું મોટું જોખમ ઊભું થયું છે. ભારતે અગાઉ પણ વ્યાપારી જહાજો અને નાવિકો પર થતા હુમલાઓ અંગે ગંભીર ચિંતા વ્યક્ત કરી છે અને આંતરરાષ્ટ્રીય દરિયાઈ માર્ગોની સુરક્ષા તથા સંઘર્ષોના ઉકેલ માટે સંવાદ અને રાજદ્વારી પ્રયાસો પર ભાર મૂક્યો છે.
