કોંગ્રેસના સાંસદ રાહુલ ગાંધીએ પોતાની માતા સોનિયા ગાંધીના સંસ્મરણ પુસ્તક ‘બિલોંગિંગ: અ જર્ની ઓફ લવ’ (Belonging: A Journey of Love) ના વિમોચન પ્રસંગે પોતાના અંગત જીવન અને પરિવાર સાથે જોડાયેલી કેટલીક રસપ્રદ, પ્રેરણાદાયી અને ભાવુક વાતો ખુલ્લીને શેર કરી હતી. આ વિશેષ કાર્યક્રમ દરમિયાન રાહુલ ગાંધીએ કેમ્બ્રિજની તે જાણીતી રેસ્ટોરન્ટની મુલાકાતનો એક કિસ્સો સંભળાવ્યો હતો, જ્યાં તેમના માતા-પિતા રાજીવ ગાંધી અને સોનિયા ગાંધી વિદ્યાર્થી કાળ દરમિયાન પહેલીવાર મળ્યા હતા. આ મુલાકાત વખતે રાહુલ ગાંધીની સાથે તેમની તે સમયની ગર્લફ્રેન્ડ પણ હતી, જેના વિશે તેમણે કાર્યક્રમમાં હળવા અંદાજ અને સ્મિત સાથે જણાવ્યું કે ‘તે હવે માત્ર એક મિત્ર છે.’
પોતાના સંબોધનમાં રાહુલ ગાંધીએ જણાવ્યું હતું કે, ‘મારા માતા-પિતાની પહેલી મુલાકાત કેમ્બ્રિજની ‘વર્સિટી રેસ્ટોરન્ટ’માં થઈ હોવાની વાતો ખૂબ પ્રચલિત હતી. વર્ષો પછી જ્યારે હું પોતે કેમ્બ્રિજમાં અભ્યાસ કરતો હતો, ત્યારે મેં મારી ગર્લફ્રેન્ડને કહ્યું કે ચાલો તે રેસ્ટોરન્ટ જોવા જઈએ જ્યાં મારા માતા-પિતા પહેલીવાર મળ્યા હતા. રેસ્ટોરન્ટમાં બેસીને મેનુ જોતી વખતે મેં ત્યાંના સ્ટાફને કહ્યું કે મારા માતા-પિતા અહીં મળ્યા હતા. આ સાંભળીને સ્ટાફના સભ્યએ દાયકાઓ જૂની યાદ તાજી કરતા તરત જ મને ઓળખી લીધો અને કહ્યું કે હા, હું બરાબર જાણું છું કે તમે કોની વાત કરી રહ્યા છો.’ આ કિસ્સો શેર કર્યા બાદ જ્યારે તેમને ગર્લફ્રેન્ડ વિશે પૂછવામાં આવ્યું, ત્યારે તેમણે ખૂબ જ હળવા અંદાજમાં આ જવાબ આપ્યો હતો.
આ પ્રસંગે રાહુલ ગાંધીએ પોતાની માતાની અદભુત હિંમત અને સંઘર્ષને યાદ કરતા એક મોટો ખુલાસો પણ કર્યો હતો. તેમણે ભાવુક થતા કહ્યું કે, ‘મમ્મીએ પોતાના પુસ્તકમાં બીમારીનો બહુ ઓછો ઉલ્લેખ કર્યો છે, પરંતુ વાસ્તવિકતા એ છે કે તેઓ એક કે બે વાર નહીં, પરંતુ ચાર વખત કેન્સર જેવી ભયાનક બીમારીને હરાવી ચૂક્યા છે.’ તેમણે ઉમેર્યું કે મેં મારા જીવનમાં તેમને ક્યારેય ડરતા કે પીછેહઠ કરતા જોયા નથી. પિતા રાજીવ ગાંધી તેમને ખૂબ પ્રેમ કરતા હતા અને આજે જો તેઓ હોત, તો તેમને મમ્મી પર કેટલો ગર્વ થતો તે શબ્દોમાં વર્ણવી શકાય તેમ નથી. આ ભવ્ય કાર્યક્રમમાં તેમના બહેન પ્રિયંકા ગાંધી વાડ્રા પણ ઉપસ્થિત રહ્યા હતા.
આ કાર્યક્રમમાં સોનિયા ગાંધીએ પણ વર્ષ 1991માં પૂર્વ વડાપ્રધાન રાજીવ ગાંધીની ત્રાસવાદી હત્યા બાદના અત્યંત કપરા અને મુશ્કેલ સમયને યાદ કર્યો હતો. તેમણે જણાવ્યું કે, ‘પિતાના નિધનના થોડા મહિના બાદ જ રાહુલે ઉચ્ચ અભ્યાસ માટે વિદેશ જવું પડ્યું હતું. તે સમયે હાર્વર્ડ યુનિવર્સિટીમાં વિશેષ સુરક્ષા રાખવાની મંજૂરી નહોતી કારણ કે તેનાથી અન્ય વિદ્યાર્થીઓના જીવ જોખમમાં મુકાઈ શકે તેમ હતા. આથી ભારતીય અને અમેરિકન સુરક્ષા એજન્સીઓએ સંયુક્ત રીતે નિર્ણય લઈને રાહુલને અન્ય એક અમેરિકન કોલેજમાં દાખલ કરાવ્યા હતા, જ્યાં તેમણે પોતાની સાચી ઓળખ છુપાવીને બીજા (બનાવટી) નામથી રહેવું પડ્યું હતું.’ સોનિયા ગાંધીએ ઉમેર્યું કે કોઈને પણ પોતાનું સાચું નામ કે પરિવાર વિશે વાત ન કરી શકવી તે રાહુલ માટે મિત્રો બનાવવા અને સામાન્ય વાતચીત કરવા માટે ખૂબ જ કઠિન સમય રહ્યો હશે.