પોલીસ તપાસમાં જોડાઈ
મધ્યપ્રદેશની રાજધાની ભોપાલમાં જમ્મુ-કાશ્મીરના બે વિદ્યાર્થીઓને તેમના રહેઠાણને લઈને કથિત રીતે હેરાન કરવામાં આવતા મામલો ગંભીર બન્યો છે. બંને વિદ્યાર્થીઓ ભોપાલની એક ખાનગી કોલેજમાં ફાર્મસીનો અભ્યાસ કરી રહ્યા છે. આરોપ છે કે તેમની પ્રાદેશિક અને ધાર્મિક ઓળખને ધ્યાનમાં રાખીને મકાન ખાલી કરવા માટે દબાણ કરવામાં આવી રહ્યું છે. મામલો સામે આવ્યા બાદ જમ્મુ એન્ડ કાશ્મીર સ્ટુડન્ટ્સ એસોસિએશન (JKSA) દ્વારા મધ્યપ્રદેશના મુખ્યમંત્રી મોહન યાદવને પત્ર લખીને વિદ્યાર્થીઓની સુરક્ષા અને અભ્યાસ અંગે તાત્કાલિક હસ્તક્ષેપની માંગ કરવામાં આવી છે. ત્યારબાદ પોલીસ પણ હરકતમાં આવી છે.
મુખ્યમંત્રીને ત્રણ પાનાનો પત્ર
JKSAએ 18 ઓગસ્ટે મુખ્યમંત્રી મોહન યાદવને ત્રણ પાનાનો પત્ર મોકલ્યો હતો. સંગઠને જણાવ્યું હતું કે બંને વિદ્યાર્થીઓની સુરક્ષા અંગે ચિંતા ઊભી થઈ છે અને તેમને અભ્યાસ ચાલુ રાખવા માટે સુરક્ષિત વાતાવરણ મળવું જરૂરી છે. સંગઠનના જણાવ્યા અનુસાર, વિદ્યાર્થીઓના મકાનમાલિક પર સતત દબાણ કરવામાં આવી રહ્યું હોવાનો આરોપ છે,જેથી વિદ્યાર્થીઓને રહેતું મકાન ખાલી કરાવવામાં આવે.જો કે બંને વિદ્યાર્થીઓને પ્રધાનમંત્રી વિશેષ શિષ્યવૃત્તિ યોજના (PMSSS) હેઠળ પસંદ કરવામાં આવ્યા હતા. ત્યારબાદ તેમને ભોપાલની ખાનગી કોલેજમાં પ્રવેશ મળ્યો હતો. યોજના હેઠળ હોસ્ટેલની વ્યવસ્થા હોવાની વાત હતી, પરંતુ સંબંધિત કોલેજ પાસે હોસ્ટેલની સુવિધા ન હોવાથી બંને વિદ્યાર્થીઓ ગયા વર્ષથી પેઇંગ ગેસ્ટ તરીકે રહેતા હોવાનું JKSAએ જણાવ્યું છે.
ઓળખના આધારે હેરાન કરવાનો આરોપ
JKSAનો આરોપ છે કે રહેણાંક સોસાયટી સાથે જોડાયેલા કેટલાક લોકો અને અન્ય વ્યક્તિઓ દ્વારા મકાનમાલિક પર વિદ્યાર્થીઓને રૂમ ખાલી કરાવવા માટે દબાણ કરવામાં આવ્યું હતું. સંગઠનના જણાવ્યા મુજબ, આ વિદ્યાર્થીઓ કાશ્મીરના હોવાથી અને મુસ્લિમ હોવાથી તેમને નિશાન બનાવવામાં આવ્યા હોવાનો આક્ષેપ કરવામાં આવ્યો છે.આરોપો અનુસાર, મકાનમાલિકને એવી ધમકી પણ આપવામાં આવી હતી કે જો વિદ્યાર્થીઓને રૂમમાંથી બહાર નહીં કાઢવામાં આવે તો લોકો ઘરમાં પ્રવેશ કરીને તેમને બહાર કાઢી દેશે. જોકે, આ તમામ આરોપોની પોલીસ દ્વારા તપાસ કરવામાં આવી રહી છે અને તપાસ પૂર્ણ થયા બાદ જ સમગ્ર મામલાની હકીકત સ્પષ્ટ થશે.
પોલીસ ટીમે સ્થળ પર જઈ તપાસ શરૂ કરી
મામલો પોલીસના ધ્યાનમાં આવતા ભોપાલ પોલીસ દ્વારા તાત્કાલિક કાર્યવાહી શરૂ કરવામાં આવી છે. ભોપાલ ઝોન-4ના DCP આદર્શકાંત શુક્લાના જણાવ્યા મુજબ, સ્થાનિક પોલીસ ટીમને સંબંધિત વિસ્તારમાં મોકલવામાં આવી હતી. ટીમે ત્યાંના રહેવાસીઓ તેમજ સંબંધિત રહેણાંક કોલોની અથવા સોસાયટી સાથે જોડાયેલા લોકો સાથે વાતચીત કરી હતી.
પોલીસનું કહેવું છે કે સમગ્ર મામલાની તપાસ કરવામાં આવી રહી છે. સાથે જ મકાનમાલિક પર વિદ્યાર્થીઓને મકાન ખાલી કરાવવા માટે કોઈ વ્યક્તિ દ્વારા દબાણ કરવામાં ન આવે તે સુનિશ્ચિત કરવાની વાત પણ પોલીસ અધિકારીએ કરી છે.
વિદ્યાર્થીઓના અભ્યાસ પર અસર
JKSAના પત્રમાં દાવો કરવામાં આવ્યો છે કે કથિત ધમકીના કારણે બંને વિદ્યાર્થીઓના સામાન્ય જીવન અને અભ્યાસ પર અસર પડી રહી છે. સંગઠનના જણાવ્યા મુજબ, વિદ્યાર્થીઓ એટલા ચિંતિત થઈ ગયા છે કે તેમને પોતાના રહેઠાણમાંથી બહાર નીકળવા, સામાન્ય રીતે મુસાફરી કરવા અને કોલેજ જવામાં પણ મુશ્કેલી અનુભવાઈ રહી છે.વિદ્યાર્થીઓએ પોતાની સમસ્યા અંગે કોલેજના અધિકારીઓનો સંપર્ક કર્યો હોવાનો પણ પત્રમાં ઉલ્લેખ છે. જોકે, JKSAનું કહેવું છે કે વિદ્યાર્થીઓની તાત્કાલિક સુરક્ષા અને રહેઠાણ સંબંધિત ચિંતાઓનું પૂરતું નિરાકરણ આવ્યું ન હતું. આ કારણે સંગઠને હવે રાજ્ય સરકાર અને પોલીસ તંત્ર સમક્ષ મામલો ઉઠાવ્યો છે.
JKSAએ શું માંગ કરી?
JKSAએ મુખ્યમંત્રીને હસ્તક્ષેપ કરીને વિદ્યાર્થીઓને સુરક્ષિત વાતાવરણ આપવાની માંગ કરી છે. સંગઠનનું કહેવું છે કે વિદ્યાર્થીઓ દેશના અન્ય રાજ્યોમાં શિક્ષણ મેળવવા જાય ત્યારે તેમની પ્રાદેશિક કે ધાર્મિક ઓળખના આધારે ભેદભાવ ન થવો જોઈએ.આ મામલો માત્ર રહેઠાણ સંબંધિત વિવાદ પૂરતો સીમિત ન રહે અને વિદ્યાર્થીઓના શિક્ષણ તથા સુરક્ષા પર તેની અસર ન પડે તે માટે તંત્રએ ગંભીરતાથી પગલાં લેવા જોઈએ તેવી માંગ કરવામાં આવી છે. બીજી તરફ, પોલીસ દ્વારા સ્થાનિક સ્તરે પૂછપરછ શરૂ કરવામાં આવી છે અને આરોપોની હકીકત તપાસવામાં આવી રહી છે.ભોપાલમાં સામે આવેલા આ મામલાએ અન્ય રાજ્યમાંથી શિક્ષણ માટે આવતા વિદ્યાર્થીઓની સુરક્ષા અને રહેઠાણના પ્રશ્નોને ફરી ચર્ચામાં લાવ્યા છે. હાલ પોલીસ તપાસ ચાલી રહી છે અને તપાસના આધારે આગળની કાર્યવાહી કરવામાં આવશે.
