સોશિયલ મીડિયા પર છેલ્લા કેટલાક દિવસોથી ચર્ચાનો વિષય બનેલા ‘₹370 બિરયાની’ વિવાદમાં હવે એક નવો વળાંક આવ્યો છે. આ સમગ્ર મામલામાં ઘેરા વિવાદ અને ટીકા વચ્ચે સ્ટેન્ડ-અપ કોમેડિયન પ્રણિત મોરેએ આખરે જાહેરમાં માફી માંગી છે. ગુરુગ્રામમાં યોજાયેલા એક લાઈવ કોમેડી શો દરમિયાન મહિલાઓ અંગે કરવામાં આવેલી વાંધાજનક ટિપ્પણીનો વીડિયો વાયરલ થયા બાદ દેશભરમાં ભારે વિરોધ જોવા મળ્યો હતો. આ વિવાદ બાદ પ્રણિત મોરે સામે કાયદાકીય કાર્યવાહી પણ શરૂ થઈ છે અને રાષ્ટ્રીય મહિલા આયોગે પણ ગંભીર નોંધ લીધી છે. શનિવારે પ્રણિત મોરેએ પોતાના સોશિયલ મીડિયા પ્લેટફોર્મ પર એક વીડિયો જાહેર કરીને સમગ્ર ઘટનાને લઈને પોતાની વાત મૂકી હતી. વીડિયોમાં તેણે સ્વીકાર્યું કે સોશિયલ મીડિયા પર તેને જે આક્રોશ, ટીકા અને નફરતનો સામનો કરવો પડી રહ્યો છે, તે કંઈક અંશે યોગ્ય છે કારણ કે તે સમયે તે યોગ્ય નિર્ણય લેવામાં નિષ્ફળ ગયો હતો. તેણે કહ્યું કે ઘટનાક્રમ દરમિયાન એક યુવકે મહિલાઓ વિશે અપમાનજનક વાત કરી હતી અને તે સમયે તેણે તેને રોકવાના બદલે વાતને આગળ વધવા દીધી હતી.
પ્રણિતે વીડિયોમાં જણાવ્યું કે તેનું સોશિયલ મીડિયા એકાઉન્ટ સસ્પેન્ડ થઈ જવાને કારણે તે પોતાની સ્પષ્ટતા વહેલી આપી શક્યો નહોતો. તેણે કહ્યું કે શો દરમિયાન થયેલી વાતચીત દરમિયાન એક યુવકે મહિલાઓને લઈને અત્યંત વાંધાજનક અને અપમાનજનક ટિપ્પણી કરી હતી. ત્યાં હાજર ઘણા લોકો તેના પર હસી રહ્યા હતા અને તે પણ તે જ વાતાવરણમાં વહેણ સાથે તણાઈ ગયો હતો. હવે તેને સમજાય છે કે તે તેની સૌથી મોટી ભૂલ હતી. તેણે વધુમાં કહ્યું કે એક કોમેડિયન તરીકે તેની જવાબદારી હતી કે તે આવી ટિપ્પણીને ત્યાં જ અટકાવે અને તેનો વિરોધ કરે. પરંતુ તે એવું કરી શક્યો નહીં. તેના બદલે તેણે એવી વાતને મંચ પર સ્થાન આપ્યું, જેના કારણે સમગ્ર મામલો વધુ ગંભીર બની ગયો. પ્રણિતે સ્વીકાર્યું કે જો તેણે તે સમયે યોગ્ય રીતે હસ્તક્ષેપ કર્યો હોત તો કદાચ આ વિવાદ આટલો મોટો બન્યો ન હોત.
માફી માંગતા તેણે કહ્યું કે આ ઘટનાથી જે કોઈની પણ લાગણી દુભાઈ હોય, ખાસ કરીને મહિલાઓની, તેમની સામે તે દિલથી માફી માંગે છે. તેણે લોકોને ખાતરી આપી કે તે પોતાની ભૂલમાંથી શીખી રહ્યો છે અને ભવિષ્યમાં વધુ જવાબદારીપૂર્વક વર્તવાનો પ્રયાસ કરશે. સાથે જ તેણે લોકોને વિનંતી કરી કે તેને પોતાની ભૂલ સુધારવાની એક વધુ તક આપવામાં આવે. આ સમગ્ર વિવાદની શરૂઆત ગુરુગ્રામમાં યોજાયેલા પ્રણિત મોરેના એક સ્ટેન્ડ-અપ કોમેડી શો દરમિયાન થઈ હતી. શોના ‘ક્રાઉડ વર્ક’ સેગમેન્ટમાં પ્રેક્ષકો સાથે વાતચીત દરમિયાન હિમાંશુ જાંગડા નામના યુવકે એક વ્યક્તિગત અનુભવ શેર કર્યો હતો. તેણે કહ્યું હતું કે તે એક યુવતી સાથે બહાર જમવા ગયો હતો અને ત્યાં તેણે ₹370ની બિરયાની ઓર્ડર કરી હતી. જમ્યા બાદ યુવતીએ તેને ઘરે છોડવા માટે કહ્યું, જેના જવાબમાં તેણે એક વાંધાજનક ટિપ્પણી કરી હતી.
યુવકે આડકતરી રીતે એવો ઈશારો કર્યો હતો કે તેણે જમવાનું ખર્ચ્યું હોવાથી તેના બદલામાં કંઈક મેળવવાનો તેને હક છે. સોશિયલ મીડિયા પર આ ક્લિપ વાયરલ થતાં જ લોકોમાં ભારે રોષ ફેલાયો હતો. અનેક લોકોએ આ નિવેદનને મહિલાઓના સન્માન, સંમતિ અને ગૌરવ વિરુદ્ધ ગણાવ્યું હતું. સાથે જ પ્રણિત મોરેની પણ ટીકા થઈ હતી કારણ કે તેણે મંચ પરથી આ પ્રકારની વાતને તરત જ રોકી નહોતી. વિવાદ વધતાં રાષ્ટ્રીય મહિલા આયોગે આ મામલે સ્વયં સંજ્ઞાન લીધું હતું. આયોગે મહિલાઓના સન્માનને ઠેસ પહોંચાડતી અને જાતીય સતામણીને સામાન્ય બનાવતી ટિપ્પણીઓ સામે કડક વલણ અપનાવ્યું છે. મહિલા આયોગે કોમેડિયન પ્રણિત મોરે અને ટિપ્પણી કરનાર હિમાંશુ જાંગડા બંનેને સમન્સ પાઠવીને હાજર થવા માટે જણાવ્યું છે. આયોગનું માનવું છે કે મહિલાઓની સંમતિ અને સુરક્ષા જેવા ગંભીર મુદ્દાઓને મનોરંજનના નામે હળવાશથી રજૂ કરવું સમાજ માટે નુકસાનકારક બની શકે છે.
બીજી તરફ, આ મામલે મહારાષ્ટ્ર સાયબર પોલીસે પણ કાર્યવાહી શરૂ કરી છે. વાયરલ વીડિયોની તપાસ કર્યા બાદ પોલીસે પ્રણિત મોરે વિરુદ્ધ FIR નોંધાવી છે અને સમગ્ર ઘટનાની કાયદાકીય તપાસ ચાલી રહી છે. પ્રણિતે પોતાના નિવેદનમાં કહ્યું છે કે તે પોલીસ અને અન્ય સત્તાવાળાઓને સંપૂર્ણ સહયોગ આપી રહ્યો છે અને કાયદાકીય પ્રક્રિયાનો સન્માન કરશે. આ સમગ્ર વિવાદે ફરી એકવાર સોશિયલ મીડિયા, મનોરંજન અને અભિવ્યક્તિની સ્વતંત્રતા સાથે જોડાયેલી જવાબદારીઓ અંગે ચર્ચા જગાવી છે. સાથે જ મહિલાઓના સન્માન અને સંમતિ જેવા મુદ્દાઓ પર સમાજમાં વધુ સંવેદનશીલતા અને જાગૃતિની જરૂરિયાતને પણ ઉજાગર કરી છે.
