ભારતીય ક્રિકેટ ટીમના સ્ટાર બેટ્સમેન વિરાટ કોહલીએ T20 ક્રિકેટમાં એક મોટી સિદ્ધિ હાંસલ કરી છે. તેણે એશિયામાં 12,000 T20 રન પૂર્ણ કરીને આ આંકડો પાર કરનાર પ્રથમ બેટ્સમેન બનવાનો ગૌરવ મેળવ્યું છે. આ સિદ્ધિ તેણે માત્ર 340 ઇનિંગ્સમાં હાંસલ કરી છે, જે તેની સતત સારા પ્રદર્શનનો સાક્ષી છે. આ સિદ્ધિ તેણે ગુજરાત ટાઇટન્સ સામેની મેચ દરમિયાન મેળવી. આ મેચમાં કોહલીએ માત્ર 13 બોલમાં 28 રનની ઝડપી ઇનિંગ રમી હતી. ભલે તે મોટી ઇનિંગ રમી શક્યો ન હોય, પરંતુ આ નાના સ્કોરમાં પણ તેણે ઇતિહાસ રચી દીધો. હવે એશિયામાં વિવિધ T20 લીગ અને આંતરરાષ્ટ્રીય મેચોને મળીને તેના નામે કુલ 12,012 રન નોંધાઈ ગયા છે.
જો અન્ય એશિયાઈ ખેલાડીઓ સાથે તેની સરખામણી કરીએ તો કોહલી ઘણો આગળ છે. પાકિસ્તાનના પૂર્વ ખેલાડી શોએબ મલિક આ યાદીમાં બીજા સ્થાને છે, જેમણે આશરે 10,252 રન બનાવ્યા છે. જ્યારે ભારતના કેપ્ટન રોહિત શર્મા લગભગ 10,023 રન સાથે ત્રીજા ક્રમે છે. કોહલી અને બીજા ખેલાડીઓ વચ્ચે લગભગ 2,000 રનનું મોટું અંતર છે, જે બતાવે છે કે એશિયામાં તેની બેટિંગ કેટલી મજબૂત રહી છે. વિરાટ કોહલીની કુલ T20 કારકિર્દી પણ ખૂબ જ પ્રભાવશાળી રહી છે. તેણે અત્યાર સુધીમાં 422 મેચ રમી છે અને લગભગ 13894 રન બનાવ્યા છે. તેના નામે 9 સદી અને 108 અર્ધશતક નોંધાયેલા છે. આ આંકડા દર્શાવે છે કે તે T20 ક્રિકેટમાં કેટલો સાતત્યપૂર્ણ અને સફળ બેટ્સમેન રહ્યો છે.
હાલમાં ચાલી રહેલી IPL 2026 સીઝનમાં પણ કોહલી શાનદાર ફોર્મમાં છે. તેણે 9 મેચોમાં 379 રન બનાવ્યા છે અને તેની સરેરાશ 54થી વધુ છે. આ સાથે તે ઓરેન્જ કેપ માટે પણ મજબૂત દાવેદાર છે. તેની બેટિંગમાં ફરી એકવાર જુનો આક્રમક અંદાજ જોવા મળી રહ્યો છે, જે તેના ચાહકો માટે ખુશીની વાત છે. કોહલીની બેટિંગની ખાસ વાત એ છે કે તે સતત રન બનાવે છે અને ટીમને મજબૂત શરૂઆત આપે છે. તેણે અત્યાર સુધીમાં T20 ફોર્મેટમાં 450 થી વધુ છગ્ગા અને 1250 થી વધુ ચોગ્ગા ફટકાર્યા છે, જે બતાવે છે કે તે કેટલો ખતરનાક બેટ્સમેન છે.
આ સિદ્ધિ સાથે વિરાટ કોહલીએ ફરી એકવાર સાબિત કર્યું છે કે તે વિશ્વ ક્રિકેટના શ્રેષ્ઠ બેટ્સમેનમાંનો એક છે. તેની મહેનત, ફિટનેસ અને રમત પ્રત્યેનો જુસ્સો તેને બીજા ખેલાડીઓથી અલગ બનાવે છે. જો તે આ જ રીતે પ્રદર્શન કરતો રહેશે, તો આવનારા સમયમાં તે T20 ક્રિકેટના ઘણા મોટા રેકોર્ડ્સ પોતાના નામે કરી શકે છે. આ સિદ્ધિ બદલ ક્રિકેટ જગત અને ચાહકો તરફથી કોહલીને શુભેચ્છાઓ મળી રહી છે.
