વધુ એક પીડિતાની માતા આગળ આવી, ઉઝેર ખાન સામે ત્રીજી FIR નોંધાઈ
મહારાષ્ટ્રના અમરાવતી જિલ્લામાં સામે આવેલા ચર્ચિત સેક્સ સ્કેન્ડલ કેસમાં તપાસ વધુ તેજ બની છે. હવે વધુ એક નાબાલિક પીડિતાની માતા આગળ આવતા પોલીસે ઉઝેર ખાન સામે ત્રીજી FIR નોંધી છે. આ કેસમાં આરોપીઓ દ્વારા નાબાલિક યુવતીઓને ટાર્ગેટ કરી તેમની સાથે સ્ટોકિંગ અને શોષણ કરવાના ગંભીર આરોપો સામે આવ્યા છે.
16 વર્ષની યુવતીનો પીછો કરવાનો આરોપ : પોલીસમાં નોંધાયેલી ફરિયાદ મુજબ પારતવાડા વિસ્તારના 20 વર્ષીય ઉઝેર ખાને 16 વર્ષની એક યુવતીનો ઓનલાઇન પીછો કર્યો હતો. યુવતીના માતા-પિતાએ વારંવાર ચેતવણી આપ્યા છતાં આરોપીએ પોતાની હરકતો ચાલુ રાખી હોવાનું સામે આવ્યું છે.આ યુવતી શરૂઆતમાં સામે આવેલા આઠ પીડિતાઓની યાદીમાં સામેલ નહોતી, છતાં હવે નવા પુરાવા મળતાં કેસમાં વધુ ગંભીરતા આવી છે.
POCSO અધિનિયમ હેઠળ ગુનો નોંધાયો : અમરાવતી ગ્રામ્ય SP વિશાલ આનંદના જણાવ્યા મુજબ પીડિતાની માતાની ફરિયાદના આધારે ઉઝેર ખાન સામે POCSO અધિનિયમ તેમજ ભારતીય ન્યાય સંહિતા (BNS) ની સ્ટોકિંગ સંબંધિત કલમ હેઠળ ગુનો નોંધાયો છે. હાલ સમગ્ર કેસની દેખરેખ સ્પેશિયલ ઈન્વેસ્ટિગેશન ટીમ (SIT) દ્વારા કરવામાં આવી રહી છે.
8 આરોપીઓ પોલીસ કસ્ટડીમાં, વધુની પૂછપરછ ચાલુ: હાલમાં આ કેસમાં કુલ 8 શંકાસ્પદ આરોપીઓ પોલીસ કસ્ટડીમાં છે, જ્યારે વધુ 10 જેટલા લોકોની પૂછપરછ ચાલી રહી છે. તપાસ ટીમ જપ્ત કરાયેલા મોબાઇલ અને અન્ય ડિજિટલ ઉપકરણોમાંથી મળેલા પુરાવાનો વિશ્લેષણ કરી રહી છે.
વધુ પીડિતાઓને આગળ આવવા પોલીસની અપીલ : પોલીસે જણાવ્યું છે કે વાયરલ વીડિયો અને ફોટાઓના આધારે અત્યાર સુધી 8 પીડિતાઓની ઓળખ થઈ છે. અન્ય પીડિતાઓને પણ નિર્ભય બની આગળ આવવા અપીલ કરવામાં આવી છે. અધિકારીઓએ વિશ્વાસ આપ્યો છે કે તમામ પીડિતાઓની ઓળખ ગોપનીય રાખવામાં આવશે અને તેમને માનસિક સહાય પણ આપવામાં આવશે. પોલીસ હાલમાં કેસમાં સંકળાયેલા તમામ આરોપીઓ સામે મજબૂત પુરાવા એકત્રિત કરવાની પ્રક્રિયામાં લાગી છે જેથી સમગ્ર રેકેટનો ભંડાફોડ થઈ શકે.
