(પ્રતિનિધિ), વડોદરા. તા.18
શહેરમાં વધી રહેલી કાળઝાળ ગરમી વચ્ચે આગજનીના બનાવોમાં ચિંતાજનક ઉછાળો જોવા મળી રહ્યો છે. આજે ઈલોરાપાર્ક વિસ્તારમાં આવેલા અમુલ એપાર્ટમેન્ટના એક મકાનમાં અચાનક લાગેલી આગને કારણે ભારે દોડધામ મચી જવા પામી હતી. સદનસીબે, સમયસૂચકતા અને ફાયર બ્રિગેડની ત્વરિત કામગીરીને લીધે મોટી જાનહાનિ ટળી હતી.
પ્રાપ્ત વિગતો અનુસાર, આજે ઈલોરાપાર્ક સ્થિત અમુલ એપાર્ટમેન્ટના એક ઘરમાં અચાનક ધુમાડાના ગોટા નીકળતા જોઈ સ્થાનિકોમાં ગભરાટ ફેલાઈ ગયો હતો. પ્રાથમિક અનુમાન મુજબ, ઘરમાં રાખવામાં આવેલા ઇન્વર્ટરની બેટરીમાં શોર્ટ-સર્કિટ થવાને કારણે આ આગ લાગી હતી. ઉનાળાની પ્રચંડ ગરમી અને બેટરીમાં થયેલા શોર્ટ-સર્કિટને કારણે આગે ક્ષણભરમાં જ રૌદ્ર સ્વરૂપ ધારણ કરી લીધું હતું.
ઘરના નીચેના ભાગમાં શરૂ થયેલી આ આગની જ્વાળાઓ જોતજોતામાં ઉપરના માળ સુધી પ્રસરી ગઈ હતી. આગના કારણે આખા એપાર્ટમેન્ટમાં ઘેરા કાળા ધુમાડાના વાદળો છવાઈ ગયા હતા. પોતાના ઘરમાં આગ લાગ્યાની જાણ થતા જ પરિવારજનો અને આસપાસના રહેવાસીઓ જીવ બચાવવા માટે બહાર દોડી આવ્યા હતા, જેના કારણે સમગ્ર પરિસરમાં અફરાતફરીનો માહોલ સર્જાયો હતો.
ઘટનાની જાણ થતા જ વડીવાડી ફાયર સ્ટેશનની ટીમ તાત્કાલિક ઘટના સ્થળે દોડી આવી હતી. ફાયરના જવાનોએ એક ક્ષણનો પણ વિલંબ કર્યા વિના બચાવ કામગીરી હાથ ધરી હતી. આગની તીવ્રતા અને ધુમાડાને ધ્યાનમાં રાખીને ફાયરમેનોએ ઓક્સિજન માસ્ક પહેરીને જીવના જોખમે મકાનની અંદર પ્રવેશ કર્યો હતો. સતત પાણીનો મારો ચલાવીને જવાનોએ આખરે આગ પર કાબુ મેળવ્યો હતો.
સદનસીબે, આ આગની ઘટનામાં કોઈ પણ પ્રકારની જાનહાનિના સમાચાર નથી, પરંતુ ઘરની અંદર રહેલો સામાન બળીને ખાખ થઈ ગયો છે. આ ઘટનાએ ફરી એકવાર નાગરિકોને ઉનાળા દરમિયાન ઈલેક્ટ્રિક ઉપકરણો અને ઇન્વર્ટર બેટરીની યોગ્ય જાળવણી કરવાની ચેતવણી આપી છે.
