અમેરિકા અને ઇઝરાયલ દ્વારા ઇરાન સામે ચલાવવામાં આવેલા સૈન્ય અભિયાનને આજે ત્રીજો દિવસ છે અને સંઘર્ષ વધુ ઉગ્ર બન્યો છે. અહેવાલો મુજબ, અત્યાર સુધીમાં ઇરાનના 1,000થી વધુ સ્થળોને નિશાન બનાવવામાં આવ્યા છે. ઇઝરાયલી સૈન્યના જણાવ્યા અનુસાર યુદ્ધના પ્રથમ 30 કલાકમાં 2,000થી વધુ બોમ્બ ફેંકાયા અને 700થી વધુ ફાઇટર જેટ ઉડાનો ભરાઈ એવા અહેવાલ છે. ઇઝરાયલના વડાપ્રધાન Benjamin Netanyahuએ જણાવ્યું છે કે તેહરાન પર હુમલાઓ આગામી દિવસોમાં વધુ તીવ્ર બનશે. બીજી તરફ, અમેરિકાના પૂર્વ રાષ્ટ્રપતિ Donald Trumpએ ઇરાની હુમલામાં મોતને ભેટેલા 3 અમેરિકન સૈનિકોના બદલાનો સંકલ્પ વ્યક્ત કર્યો છે અને કાર્યવાહી ચાલુ રાખવાની ચેતવણી આપી છે. ઇરાન તરફથી પણ જવાબી કાર્યવાહી થઈ છે.
ઇઝરાયલ સહિત 9 દેશોમાં આવેલા અમેરિકન બેઝ પર હુમલાઓ કરવામાં આવ્યા હોવાના દાવા છે. તેહરાન સહિત 10 મુખ્ય શહેરોને નિશાન બનાવવામાં આવ્યા છે, જેમાં 200થી વધુ લોકોના મોત અને 740થી વધુ લોકો ઘાયલ થયાના અહેવાલ છે. એક મિસાઇલ શાળામાં પડતા અંદાજે 180 વિદ્યાર્થીનીઓના મોત અને 45ના ઇજાગ્રસ્ત થવાની માહિતી સામે આવી છે. આ સંઘર્ષ હવે ઇરાક સુધી વિસ્તર્યો છે. બગદાદ એરપોર્ટ નજીક અમેરિકન સૈનિકોને નિશાન બનાવતા ડ્રોન હુમલાની જવાબદારી ‘સરાયા અવલિયા અલ-દામ’ નામના શિયા લશ્કરે સ્વીકારી છે. અમેરિકા અને ઇરાકે આ દાવા પર હજી સત્તાવાર પ્રતિક્રિયા આપી નથી.
લેબનાનમાં પણ પરિસ્થિતિ તંગ છે. ઇરાન સમર્થિત જૂથ Hezbollahએ ઇઝરાયલ પર મિસાઇલો છોડ્યાનો દાવો કર્યો, જેના જવાબમાં ઇઝરાયલે બેરૂત પર હવાઈ હુમલાઓ કર્યા. ઇઝરાયલી સૈન્યએ એક મિસાઇલને અટકાવવાનો દાવો કર્યો છે, જ્યારે અન્ય મિસાઇલો ખુલ્લી જગ્યાઓમાં પડ્યાની માહિતી છે. યુદ્ધની આ નવી લહેરે મધ્ય પૂર્વમાં અસ્થિરતા વધારી છે અને આંતરરાષ્ટ્રીય સમુદાય ચિંતિત નજરે પરિસ્થિતિ પર નજર રાખી રહ્યો છે.
