ઘર ખરીદવાનું સ્વપ્ન જોનારાઓ માટે રાહતના સમાચાર સામે આવ્યા છે. નવા પ્રસ્તાવિત આવકવેરા માળખા હેઠળ જારી કરાયેલા ડ્રાફ્ટ નિયમોમાં મિલકત ખરીદી–વેચાણ સંબંધિત PAN નિયમોમાં મહત્વપૂર્ણ ફેરફાર સૂચવવામાં આવ્યા છે. જો આ પ્રસ્તાવ અમલમાં આવશે, તો 20 લાખથી ઓછી કિંમતની સ્થાવર મિલકતના સોદા માટે PAN કાર્ડ આપવાની ફરજ રહેશે નહીં. હાલની જોગવાઈ મુજબ, 10 લાખથી વધુ કિંમતની ઘર, પ્લોટ અથવા અન્ય સ્થાવર મિલકત ખરીદવા કે વેચવા માટે PAN નંબર આપવો આવશ્યક છે. પરંતુ નવા ડ્રાફ્ટમાં આ મર્યાદા વધારીને 20 લાખ કરવાની ભલામણ કરવામાં આવી છે. એટલે કે, 20 લાખ સુધીના સોદામાં ખરીદદારો અને વેચાણકર્તાઓને PAN વિગતો આપવાની જરૂર નહીં રહે.
આ ફેરફાર ખાસ કરીને નાના શહેરો અને તાલુકા સ્તરના વિસ્તારોમાં રહેતા લોકો માટે ફાયદાકારક બની શકે છે, જ્યાં હજુ પણ 20 લાખથી ઓછી કિંમતમાં ઘર અથવા જમીન ઉપલબ્ધ છે. ઓછું પેપરવર્ક અને સરળ પ્રક્રિયાને કારણે નાના સોદા વધુ સહેલાઈથી પૂર્ણ થઈ શકશે. જોકે, સરકારે સ્પષ્ટ કર્યું છે કે આ નિયમો હજુ ડ્રાફ્ટ તબક્કામાં છે. જાહેર સૂચનો અને પ્રતિસાદ મેળવ્યા બાદ અંતિમ નિર્ણય લેવામાં આવશે. જો બધું આયોજન મુજબ આગળ વધે, તો નવા નિયમો 1 એપ્રિલ 2026થી અમલમાં આવી શકે છે.
ડ્રાફ્ટમાં અન્ય મહત્વપૂર્ણ સૂચનો પણ સામેલ છે. જેમ કે, ભેટ સ્વરૂપે મળતી મિલકત અથવા સંયુક્ત વિકાસ કરાર હેઠળ ટ્રાન્સફર થતી જમીન–ફ્લેટના કેસોમાં, જો સોદાની કિંમત નિર્ધારિત મર્યાદાથી વધુ હોય તો PAN પાલન ફરજિયાત રહેશે. તેનો હેતુ એ છે કે નાના સોદાને રાહત મળે, પરંતુ મોટા અને જટિલ વ્યવહારો પર દેખરેખ જળવાઈ રહે. કર નિષ્ણાતોના મતે, રિયલ એસ્ટેટના વધતા ભાવોને ધ્યાનમાં રાખીને મર્યાદા વધારવાનો પ્રસ્તાવ લાવવામાં આવ્યો છે. છેલ્લા કેટલાક વર્ષોમાં મિલકતના ભાવમાં નોંધપાત્ર વધારો થયો હોવાથી 10 લાખની જૂની મર્યાદા વાસ્તવિક પરિસ્થિતિ સાથે સુસંગત નહોતી. પ્રસ્તાવિત 20 લાખની મર્યાદા હાલની બજાર સ્થિતિને વધુ યોગ્ય રીતે પ્રતિબિંબિત કરે છે.
