હાલોલ એડી સેશન્સ કોર્ટે હુકમ રદ કરી આરોપીને નિર્દોષ છોડી મુક્યો
* શ્રી રામ ટ્રાન્સપોર્ટ દ્વારા લેણી રકમ કરતા વધુ રકમનો ચેક ભરી રિટર્ન કરાવાયો હતો
*લેણી રકમ અને ચેકની રકમમા ભારે વિસંગતતા ને લઈને સેશન્સ કોર્ટે આરોપીને છોડી મુક્યો
કાલોલ :
ચેક રિટર્ન કેસમાં આરોપીને એક વર્ષની સજા અને રૂ 5 લાખના વળતરનો હુકમ રદ કરી હાલોલ એડી સેશન્સ કોર્ટે આરોપીને નિર્દોષ છોડી મુક્યો છે.
હાલોલની શ્રી રામ ટ્રાન્સપોર્ટ કંપની દ્વારા અદિરન તા. વાઘોડિયા ખાતે રહેતા બચુભાઈ રામાભાઈ ભરવાડ ઉપર વર્ષ ૨૦૧૯મા હાલોલ ના એડી ચીફ જયુ મેજિસ્ટ્રેટ સમક્ષ રૂ 5 લાખના ચેક રિટર્ન ની ફરિયાદ કરી હતી. આરોપી બચુભાઈ રામાભાઈ ભરવાડ દ્વારા શ્રી રામ ટ્રાન્સપોર્ટ કંપની પાસેથી વ્હીકલ ખરીદવા માટે રૂ 5 લાખની લોન તા ૧૩/૦૨/૨૦૧૮ના રોજ લીધી હતી. જે ખાતામાં બાકી રકમ રૂ ૫,૧૩,૫૩૧/ હતી. જે માટે આરોપી દ્વારા રૂ 5 લાખનો ચેક તા ૧૧/૦૯/૨૦૧૯ નો બેંક ઓફ બરોડાનો આપ્યો હતો. જે ચેક શ્રી રામ ટ્રાન્સપોર્ટ કંપની દ્વારા ક્લિયરિંગમા મોકલ્યા બાદ તા ૧૬/૦૯/૧૯ના રોજ અપુરતા ભંડોળને કારણે રીટર્ન થયો હતો. જે બાદ ફરિયાદ થઈ હતી. જેમા હાલોલ એડી ચીફ જયુ મેજિસ્ટ્રેટ દ્વારા આરોપી બચુભાઈ રામાભાઈ ભરવાડને એક વર્ષની સજા અને રૂ 5 લાખ વળતર ચૂકવવા હુકમ તા ૨૪/૧૨/૨૦૨૪ ના રોજ કર્યો હતો. આરોપી બચુભાઈ રામાભાઈ ભરવાડે હુકમ સામે પોતાના એડવોકેટ કે ડી મલેક દ્વારા હાલોલના એડી સેશન્સ કોર્ટમાં અપીલ દાખલ કરી હતી. જેમા મુખ્યત્વે આરોપીના સહીવાળા ચેકનો ઉપયોગ કરી ફરિયાદ કરી હોવાનો બચાવ કર્યો હતો.અપીલ ચાલી જતા મૂળ આરોપી અને અરજદાર બચુભાઈ રામાભાઈ ભરવાડના વકીલ કે ડી મલેકની દલીલો ધ્યાને લઈને હાલોલના એડી સેશન્સ જજ વી એન મપારા દ્વારા પુરાવાનું મૂલ્યાંકન કરતા, ફરિયાદી દ્વારા ફરિયાદમા જણાવ્યા મુજબ આરોપી પાસે રૂ ૫,૧૩,૫૩૧/ નુ લેણું બાકી છે જ્યારે રજુ થયેલા ખાતાનો ઉતારો ( સ્ટેટમેન્ટ) મુજબ તા ૧૦/૦૪/૧૮ થી ૨૯/૦૯/૧૯ સુધીમાં રૂ. ૬,૬૧,૦૪૦.૯૬ની રકમ બાકી તેમજ એરિયર્સની રકમ રૂ ૨,૫૬,૩૭૭/ દર્શાવી હતી. ત્યારે જો ફરિયાદ મુજબ બાકી રકમ ૫,૧૩,૫૩૧/ ની હતી અને સ્ટેટમેન્ટ મુજબ ૬,૬૧,૦૪૦/૯૬ ની રકમ બાકી હતી તો રૂ 5 લાખનો ચેક ફરિયાદી કેવી રીતે સ્વીકાર્યો ? બાકી રહેતી રકમ અંગે કોઈ સમાધાન થયુ નથી તેવુ ફરિયાદીએ સ્વીકાર્યું છે. ઉપરાંત આરોપીની લોનની મુદતમા દોઢ વર્ષ બાકી રહે છે તેવું પણ સ્વીકાર્યું છે. સૌથી મહત્વની બાબત એ છે કે ફરિયાદીએ ઉલટ તપાસમા સ્વીકાર કર્યો છે કે આરોપીને નોટિસ આપી હતી. ત્યારે તેની પાસે રૂ 5 લાખ લેવાના થતા ન હતા. તેવી તમામ હકીકતો ધ્યાને લઈ આરોપી (અરજદાર) ની અપીલ મંજૂર કરી હાલોલના એડી જ્યુ મેજિસ્ટ્રેટ નો તા ૨૪/૧૨/૨૦૨૪ નો હુકમ રદ કરી આરોપીને નિર્દોષ છોડી મુકવાનો આદેશ આપ્યો છે.
