વ્યારા: વ્યારા શહેરની 15 વર્ષીય જેનિશા નાયક પોતાની સરનેમની જેમ જ આવનારા સમયમાં નાયિકા એટલે કે અભિનેત્રી બનવાની છે. 15 વર્ષની આ છોકરીએ એક્ટિંગના ફિલ્ડમાં પોતાના પરિવાર અને સમગ્ર જિલ્લાનું નામ રોશન કર્યું છે. માયપુરની શાળામાં ભણતી જેનીશાએ અજય દેવગણ પ્રોડક્શનની ‘મા’ ફિલ્મમાં કાજોલે સાથે લીડ રોલ કરેલો છે. તેની સાથે કો-સ્ટાર તરીકે કામ કર્યું છે.
જો કે આ મુવી હોરર ફિલ્મ છે અને માતાનું મહત્વ પણ દર્શાવવામાં આવ્યું છે. ફિલ્મમાં કામ કરવા માટે જેનીશા ખૂબ ઉત્સાહી છે, તેના માટે તે રોજ જીમ, યોગા, સ્વિમિંગ જેવી પ્રવૃત્તિ રોજ સવારે કરે છે. વ્યારાના વાડીવાલા કોમ્પ્લેક્ષ પાસે રહેતી જેનીશા ખૂબ આશાસ્પદ અને મહેનતુ કલાકાર છે.
- દેવગન પ્રોડક્શનની ‘મા’ હોરર ફિલ્મમાં અભિનેત્રી કાજોલ સાથે મુખ્ય રોલમાં દેખાશે
- જેનિશાએ સુહાગણ, દહેજ દાસી જેવી ટીવી સીરીયલ અને ડસ્ટબિન વેબસીરિઝમાં કામ કરી ચૂકી છે
સામાન્ય પરિવારમાંથી આવતી જેનિશાના પિતા સુધાકરભાઈ વ્યારામાં પ્લમ્બરનું કામ કરે છે. જેનીશાને એક્ટિંગમાં ખૂબ રસ હોવાથી તેના માતા સોનીકાબેને ફેશન શો, યોગા ટ્રેઈનિંગ, જીમ જેવી તાલીમ આપી છે. કાજોલ સાથે આવનારી આ ફિલ્મ માટે સમગ્ર પરિવારને 6 વખત પ્લેનમાં બેસવાનો અને 7 સ્ટાર હોટેલમાં રહેવાનો લહાવો મળ્યો છે.
જેનીશાએ સૌ પ્રથમ સુહાગણ, દહેજ દાસી ડસ્ટબિન જેવી સીરીયલ અને વેબસીરીઝમાં કામ કર્યું છે. તેણે રોનિત રોય સાથે પણ અભિનય કર્યો છે. તેની ‘બેટી પઢાવો, બેટી બઢાઓ’ની થીમ આધારિત ફિલ્મ બની છે, જેનું નામ ‘ધ લિટલ ફાયર ફ્લાઈ’ જેમાં પણ જેનીશાએ કામ કર્યું છે.
