થોડા સમય પહેલાં શહેરના મેયર દક્ષેશ માવાણીએ દાવો કર્યો હતો કે સુરત મનપાના તમામ ઝોનમાં પ્રિ મોન્સુન કામગીરી થઈ ગઈ છે. આ વખતે શહેરીજનોને વરસાદથી હેરાન થવું નહીં પડે. ત્યાર બાદ પાલિકા કમિશનર અને મેયરની અધ્યક્ષતામાં તમામ ઝોનના અધિકારીઓની એક મિટિંગ મળી હતી, જેમાં પ્રિ-મોન્સુન કામગીરી અંગે ચર્ચા થઈ હતી. સારા રિપોર્ટ જમા કરાવાયા હતા, પરંતુ આ માત્ર દાવા અને વાતો હતી તે સાબિત થયું છે. કારણ કે આજે વરાછા વિસ્તારમાં એક ઠેકાણે રસ્તો બેસી ગયો હતો, જેમાં ટેમ્પોનું ટાયર ફસાઈ જતા ટ્રાફિક જામ થઈ ગયું હતું.
ચોમાસું શરૂ થવાને થોડીવાર છે. ત્યારે સુરત શહેરના વરાછા વિસ્તારમાં પ્રિ-મોન્સૂન કામગીરીના ભાગરૂપે ડ્રેનેજ લાઇન નાંખવાના કામ બાદ રસ્તો યોગ્ય રીતે ન બનાવતા લોકોને ભારે હાલાકીનો સામનો કરવો પડી રહ્યો છે. આજે ટેમ્પો આઈસરનું ટાયર રસ્તામાં ઘસી ગયું હતું. જેથી ભારે ટ્રાફિક જામ સર્જાયો હતો.
હાલમાં રોડ બેસી જવાની ઘટના સામે આવતા એક ટ્રકનું ટાયર રસ્તામાં ધસી પડ્યું, જેના કારણે ટ્રક ફસાઈ ગયો અને ટ્રાફિક જામના દ્રશ્યો સર્જાયા. રસ્તો પરથી પસાર થતા લોકો અને વાહનચાલકોને ઘણી મુશ્કેલીનો સામનો કરવો પડ્યો. સ્થાનિક લોકો કહે છે કે, આ પહેલો બનાવ નથી. અગાઉ પણ ટેમ્પો ટ્રાવેલર આ જ જગ્યાએ રસ્તો બેસી જવાથી ફસાઈ ગયું હતું.
સુરત મહાનગરપાલિકા દ્વારા કામગીરી પછી યોગ્ય મટિરિયલથી રોડ બનાવી ન દેવાતા વારંવાર આવી સ્થિતિ સર્જાઈ રહી છે. સ્થાનિકો હવે પાલિકા અધિકારીઓની ઢીલી કામગીરી સામે નારાજગી વ્યક્ત કરી રહ્યા છે અને યોગ્ય પગલાં ભરવાની માગણી કરી રહ્યા છે.
