દાહોદ ;
દાહોદના ખરોડ (ડોકી) ગામે આગામી તારીખ ૨૬મી મેના રોજ દેશના વડાપ્રધાન આવી રહ્યાં છે,,ત્યારે તેઓના આગમનની તૈયારીઓને લઈ દાહોદ જિલ્લા વહીવટી તંત્ર સમેત દાહોદ જિલ્લા પોલીસ તંત્ર તેમજ આસપાસના જિલ્લાની પોલીસ પણ સજ્જ બની છે. તંત્ર દ્વારા ખરોડ (ડોકી) મુકામે વડાપ્રધાનના આગમનની તૈયારીઓના ભાગરૂપે ડોમ, બેઠક વ્યવસ્થા વિગેરે અન્ય સુવિધાઓ ઉભી કરવાના કામકાજમાં જાેતરાઈ છે. તો તેની સાથે સાથે દાહોદ જિલ્લાના ભાજપાના અગ્રણીઓ પણ પીએમના આગમનને લઈ તેઓ પણ પોતાની તૈયારીઓ દર્શાવી છે.
ભારત દેશના વડાપ્રધાન નરેન્દ્રભાઈ મોદી તા. ૨૬ના રોજ આવવાના છે. અહિંયા નરેન્દ્રભાઈ હસ્તે નવનીર્મીત રેલ્વે એજીન સાથે દાહોદ પાલિકા નવા ભવન સહિતના વિવિધ કામોનું લોકાર્પણ કરશે. સાથે વડાપ્રધાનની જાહેર સભા દાહોદ નજીકના ડોકી ગામે યોજાનાર છે. તેના માટેની તૈયારીઓમાં સરકારી તંત્ર, ભાજપ લાગ્યુ છે. કોઈ અનિચ્છનિય બનાવ ન બને અને કાર્યક્રમ શાંતિપૂર્ણ રીતે થાય તે માટે પોલીસ વિભાગે પણ મોટાપાયે કાફલો ખડકી દીધો છે અને કલકેટર પણ આયોજન માટે બેઠકોના દોર કરી રહ્યા છે.
દાહોદમાં નરેન્દ્રભાઈ મોદીના કાર્યક્રમ માટે આઠ એસ.પી., ૩૦ ડીવાયએસ.પી., ૯૦ પી.આઈ, ૨૨૫ પી.એસ.આઈ, ૨૫૦૦ થી ૩૦૦૦ પોલીસ જવાનો ખડેપગે હાજર રહેશે. સાથે સરકાર દ્વારા પાણીની, પાર્કીગ તેમજ લોકોને કાર્યક્રમમાં આવવા જવામાં તકલીફ ન પડે તે માટે આયોજન કરવામાં આવી રહ્યું છે. તા. ૨૬ના રોજ નરેન્દ્રભાઈના કાર્યક્રમમાં આવવામાં સહુલીયત રહે તે માટે જીલ્લામાં જેટલા પણ ટોલગેટ છે ત્યાં કોઈ પણ પ્રકારના નાણા નહી લાગે તેવું આયોજન કરવામાં આવ્યું હોવાની જાણકારી મળી છે. જીલ્લા ભા.જ.પ. દ્વારા પણ મોટા પાયે જીલ્લાના લોકો કાર્યક્રમમાં આવે તે માટે ગામે ગામ અને તાલુકે તાલુકે બેઠકોનો દોર કરી રહ્યા છે. દાહોદના પ્રભારીમંત્રી, સાંસદ, કલેકટર, એસ.પી. સહિતના અધિકારીઓ તૈયારી માટે બેઠકોનો દોર કરી રહ્યા છે. રેલ્વે કારખાના અને જાહેરસભા સ્થળે અને રોડ શો નિર્વિઘ્ને પાર પડે તે માટે, આઠ એસ.પી. ૩૦ ડીવાયએસ.પી. ૯૦ પી.આઈ, ૨૨૫ પી.એસ.આઈ ૨૫૦૦ થી ૩૦૦૦ પોલીસ જવાનોનો કાફલો ખડકાયો હતો.
——————————————
