ઓવરસીસના સંચાલકે ઓફિસમાં કામ કરતી યુવતી સાથે કૂકર્મ આચર્યું
(પ્રતિનિધિ) આણંદ તા.19
વિદ્યાનગર ખાતે આવેલા ઓવરસીસના સંચાલકે તેની ઓફિસમાં જ કામ કરતી યુવતીને કેફી પીણુ પીવડાવી બેભાન કરી દૂષ્કર્મ આચર્યું હતું. આ ઉપરાંત અલગ અલગ જગ્યાએ લઇ જઇને પણ કૂકર્મ આચર્યું હતું. આ અંગે યુવતીએ વિદ્યાનગર પોલીસ મથકે ફરિયાદ આપતા પોલીસે ગુનો નોંધ્યો હતો.
વિદ્યાનગરમાં આવેલા નીરવાના બંગલોમાં રહેતા ભૌમિક વિનોદભાઈ મકવાણા (ઉ.વ.46)એ જનતા ફાટક પાસે એવરેસ્ટ ઓવરસીઝની ઓફિસ શરૂ કરી હતી. આ ઓફિસમાં થોડા સમય પહેલા યુવતીને નોકરી પર રાખી હતી. જોકે, આ યુવતી પર ભૌમિકની નજર બગડી હતી અને 14મી ઓગષ્ટના રોજ પીણામાં નશાકારક પ્રવાહી પીવડાવી દીધું હતું. આ પીણાથી બેભાન થઇ ગયેલી યુવતી પર દૂષ્કર્મ ગુજાર્યું હતું. અલબત્ત, જે તે સમયે યુવતી મૌન રહી હતી. પરંતુ ભૌમિકે થોડા દિવસ બાદ પોત પ્રકાશ્યું હતું અને યુવતીને 15મી ઓગષ્ટથી 25મી સપ્ટેમ્બર દરમિયાન અવાર નવાર એકાંત સ્થળે લઇ જઇ તેના મરજી વિરૂદ્ધ દુષ્કર્મ આચર્યું હતું. જેના કારણે યુવતી ગર્ભવતી બનતાં સમગ્ર મામલામાં ભાંડો ફુટ્યો હતો. આ અંગે વિદ્યાનગર પોલીસે યુવતીની ફરિયાદ આધારે ભૌમિક વિનોદ મકવાણા સામે ગુનો નોંધી વધુ તપાસ હાથ ધરી છે.
