મુંબઈઃ એનસીપીના નેતા બાબા સિદ્દીકીની હત્યા બાદ ફરી એકવાર બોલિવુડના એક્ટર સલમાન ખાન અને ગેંગસ્ટર લોરેન્સ બિશ્નોઈની દુશ્મનીની ચર્ચા જોરશોરથી થવા લાગી છે. દરમિયાન લોરેન્સ બિશ્નોઈ ગેંગના નામ પર મુંબઈ પોલીસને એક ધમકી ભર્યો મેસેજ મળ્યો હતો, જેમાં સલમાન ખાન પાસે 5 કરોડની ખંડણીની માંગણી કરાઈ હતી. ધમકી આપનારે કહ્યું હતું કે, બાબા સિદ્દીકીથી પણ ખરાબ હાલત સલમાન ખાનની થશે. આ તમામ વિવાદો વચ્ચે સલમાન ખાનના પિતા સલમીન ખાને સ્પષ્ટ કહ્યું છે કે તેમનો પુત્ર સલમાન ખાન ક્યારેય માફી માંગશે નહીં.
લોરેન્સ બિશ્નોઈ ગેંગના માણસો અગાઉ સલમાન ખાનના ઘર પર હુમલો કરી ચૂક્યા છે. સલમાનને ધમકીઓ પણ મળી છે. તાજેતરમાં જ સલમાનના ઘર પર હુમલો કરનાર એક આરોપીની હરિયાણામાં ધરપકડ કરાઈ હતી. લોરેન્સ બિશ્નોઈ ગેંગ તરફથી ધમકીઓનો સિલસિલો શરૂ થયા બાદ સલમાનની સુરક્ષા વધારી દેવાઈ છે. સલમાન હવે દરેક જગ્યાએ પોલીસ બંદોબસ્ત હેઠળ જોવા મળે છે.
દરમિયાન સલમાનના પિતા સલીમ ખાને એક ઈન્ટરવ્યુમાં સ્પષ્ટ કહ્યું છે કે સલમાન ખાન માફી માંગશે નહીં. તેમણે કહ્યું કે, સલમાને ક્યારેય પ્રાણીઓનો શિકાર કર્યો નથી. સલમાનને ક્યારેય કોઈ પ્રાણીની હત્યા કરી નથી. સલમાને ક્યારેય વંદો પણ માર્યો નથી. અમે હિંસામાં માનતા નથી.
સલીમ ખાને કહ્યું કે, લોકો અમને કહે છે કે તમે હંમેશા જમીન તરફ નીચું જુઓ છો. તમે ખૂબ જ નમ્ર છો. હું તેમને કહું છું કે આ કોઈ શરમની વાત નથી. મને ડર છે કે મારા પગ નીચે કોઈ જીવજંતુ પણ ઘાયલ થઈ જશે. હું તેમને સાચવું છું.
સલીમ ખાને કહ્યું કે બીઈંગ હ્યુમનથી ઘણા લોકોને મદદ મળી છે. કોવિડ પછી તેમાં ઘટાડો થયો પરંતુ તે પહેલાં દરરોજ લાંબી લાઈનો લાગતી હતી. કેટલાંકને સર્જરીની જરૂર હતી, કેટલાકને અન્ય મદદની જરૂર હતી. દરરોજ ચારસોથી વધુ લોકો મદદની આશામાં આવતા હતા.
