સુરત: (Surat) શહેરમાં આજે તાપમાનનો પારો વધીને 31 ડિગ્રીને પાર થતાં શહેરીજનોએ બપોરે ગરમીનો અનુભવ કર્યો હતો. હવામાન વિભાગના જણાવ્યા મુજબ શહેરમાં છેલ્લા દસ દિવસથી સતત વાદળછાયું વાતાવરણ સર્જાયું હતું. મહિનાની શરૂઆતમાં જ અરબ સાગરમાં એક પછી એક બે વેસ્ટર્ન ડિસ્ટર્બન્સ રહેતાં વાતાવરણમાં પલટો જોવા મળ્યો હતો. ત્યારબાદ પંજાબ પર વધુ એક વેસ્ટર્ન ડિસ્ટર્બન્સ અને ત્યારબાદ ઓરિસ્સા તથા છત્તીસગઢ પર સર્જાયેલું એન્ટી સાયક્લોનિક સરક્યુલેશનની અસરને પગલે વાદળછાયું વાતાવરણ યથાવત રહેવા પામ્યું હતું. પરંતુ આજે વાતા વાતાવરણનો મિજાજ બદલાતા છેલ્લા 48 કલાકમાં મહત્તમ તાપમાનમાં (Temperature) 5 ડિગ્રીનો વધારો નોંધાયો છે.
સુરતમાં રવિવારે મહત્તમ તાપમાન ૩૧.૬ ડિગ્રી સેલ્સિયસ નોંધાયું હતું. જ્યારે લઘુત્તમ તાપમાન ૧૯.૬ ડિગ્રી સુધી પહોંચ્યું છે. તાપમાનનો પારો ૩૧ ડિગ્રીને પાર થતાં બપોરે ઉનાળાની પ્રારંભિક ગરમી જેવો અનુભવ થયો હતો. આ સાથે જ હવામાં ૭૦ ટકા ભેજની સાથે સાત કિલોમીટર પ્રતિ કલાક ઉત્તર પૂર્વનો પવન ફૂંકાયો હતો.
રાજ્યમાં ઠંડીમાં ઘટાડો, નલિયામાં લધુત્તમ તાપમાન 7.8 ડિગ્રી
અમદાવાદ : રાજ્યમાં આજે ઠંડીમાં ઘટાડો નોંધાયો હતો. સૌથી વધુ ઠંડી નલિયા ખાતે 7.8 ડિગ્રી નોંધાવા પામી હતી. જ્યારે રાજ્યના મોટાભાગનાં શહેરોનું લઘુતમ તાપમાન 19 થી 11 ડિગ્રીની વચ્ચે નોંધાવા પામ્યું હતું. હવામાન ખાતાના સૂત્રોના જણાવ્યા પ્રમાણે રાજ્યના અન્ય શહેરોમાં અમદાવાદમાં 17.3 ડિગ્રી., ડીસામાં 14.5 ડિગ્રી., ગાંધીનગરમાં 16.2 ડિગ્રી., વડોદરામાં 18.0 ડિગ્રી., સુરતમાં 19.4 ડિગ્રી., વલસાડમાં 14.5 ડિગ્રી., અમરેલીમાં 14.2 ડિગ્રી., ભાવનગરમાં 16.6 ડિગ્રી., રાજકોટમાં 12.2 ડિગ્રી., સુરેન્દ્રનગરમાં 13.5 ડિગ્રી., ભુજમાં 11.0 ડિગ્રી. અને નલિયામાં 7.8 ડિગ્રી. ઠંડી નોંધાવા પામી હતી.
વલસાડ-વાપીમાં બપોરે ગરમીનો અહેસાસ
વલસાડ જિલ્લામાં હાલ વાતાવરણ રોજે રોજ બદલાતુ રહે છે. છેલ્લા 4-5 દિવસ પહેલાં વાદળછાયા વાતાવરણ વચ્ચે કમોસમી માવઠું પડ્યા બાદ ઠંડીમાં વધારો થયો હતો. હવે બે-ચાર દિવસથી ઠંડીમાં વધઘટ થતાં રવિવારે બપોરે ગરમીનો અહેસાસ લોકોએ અનુભવ્યો હતો. વાદળછાયા વાતાવરણ વચ્ચે બફારો અને ગરમીને લઈ લોકોએ પંખાનો પણ ઉપયોગ કરવો પડ્યો હતો. હવામાન વિભાગની યાદીમાં જણાવ્યા મુજબ રવિવારે સવારે લઘુત્તમ તાપમાન 14.5 અને સાંજે 15 ડિગ્રી નોંધાયું હતું. જ્યારે મહત્તમ સવારે 31.5 અને સાંજે 33.5 રહ્યું હતું. વાતાવરણમાં ભેજનું પ્રમાણ સવારે 91 ટકા અને બપોરે ગરમીને લઈ સાંજે 77 ટકા થઈ ગયું હતું.
નવસારી જિલ્લામાં તાપમાન વધતા ગરમી
નવસારી : નવસારી જિલ્લામાં રવિવવારે તાપમાન વધતા ઠંડીના બદલે ગરમીનો અહેસાસ થયો છે. નવસારી જિલ્લામાં ગત 6ઠ્ઠીએ લઘુત્તમ તાપમાન 14.5 ડિગ્રી નોંધાતા ગુલાબી ઠંડી વર્તાઈ હતી. જયારે ત્યારબાદ તાપમાનમાં વધારો થતા ઠંડીમાં ઘટાડો નોંધાઈ રહ્યો હતો. આજે રવિવારે લઘુત્તમ તાપમાન 0.5 ડિગ્રી વધતા 19 ડિગ્રી નોંધાયું હતું. જયારે મહત્તમ તાપમાન 1.4 ડિગ્રી વધીને 32.4 ડિગ્રી નોંધાયું હતું. રવિવારે સવારે ભેજનું પ્રમાણ 94 ટકા અને સાંજે ભેજનું પ્રમાણ 66 ટકા રહ્યું હતું. જોકે આજે પવનોએ દિશા બદલતા ઉત્તર-પશ્ચિમ દિશાએથી 5.9 કિ.મી. ની ઝડપે પવનો ફૂંકાયો હતો.
