નવી દિલ્હી: (New Delhi) વડાપ્રધાન નરેન્દ્ર મોદીએ (P M Modi) ઉત્તર પૂર્વ દિલ્હીમાં એક જનસભાને સંબોધિત કરી હતી. આ દરમિયાન તેઓએ તેમની સરકારની ઉપલબ્ધિઓ ગણાવી હતી. ઉત્તર પૂર્વ દિલ્હીના કરતાર નગરમાં જનસભાને સંબોધતા પીએમ મોદીએ કહ્યું કે તેમણે ગરીબો માટે ઘણી યોજનાઓ લાગુ કરી છે. સરકાર તમામ વર્ગો માટે કામ કરી રહી છે. તમે G20 કોન્ફરન્સ દરમિયાન જોયું હશે કે કેવી રીતે વિશ્વના ટોચના નેતાઓ દિલ્હીને જોઈને દંગ રહી ગયા. આજે અહીં ભારત મંડપમ અને યશોભૂમિ જેવા આધુનિક સંમેલન કેન્દ્રો બનાવવામાં આવી રહ્યા છે. નવું સંસદ ભવન આપણા ગૌરવમાં વધારો કરી રહ્યું છે.
વડાપ્રધાને કહ્યું કે હું ન તો મારા માટે જીવું છું અને ન તો હું મારા માટે જન્મ્યો છું. હું તમારા અને તમારા બાળકોના ઉજ્જવળ ભવિષ્ય માટે સખત મહેનત કરું છું. 50-60 વર્ષ પહેલા જ્યારે હું મારું ઘર છોડીને નીકળ્યો ત્યારે મને ખબર પણ નહોતી કે એક દિવસ હું લાલ કિલ્લા પર તિરંગો ફરકાવીશ. ત્યારે મને ખબર નહોતી કે 140 કરોડ ભારતીયો મારો પરિવાર બની જશે. તેમણે કહ્યું કે મારો કોઈ વારસદાર નથી, હવે તમે જ મારા વારસદાર છો. મારું જીવન મારી પળેપળ તમારા સપનાઓ સાકાર કરવા માટે અર્પણ છે.
પીએમ મોદીએ કહ્યું કે દિલ્હીમાં રાષ્ટ્રીય યુદ્ધ સ્મારક બનાવવામાં આવ્યું. તેમની નસોમાં લોકશાહી છે. દસ વર્ષમાં મારી સરકારે દિલ્હી માટે ઘણું કામ કર્યું. અહીં સારા રસ્તા અને હાઈવે બનાવવામાં આવ્યા. હજારો મોટા વાહનોને હવે દિલ્હી આવવાની જરૂર નથી. દિલ્હી મેટ્રોના નવા રૂટ પણ બનાવવામાં આવ્યા છે. વિકાસ માટે મેટ્રોના ગેટ પણ ખૂલ્યા.
પીએમ મોદીએ કહ્યું કે મેં તમારા સપનાને સાકાર કરવા માટે મારું જીવન સમર્પિત કરું છું. આ એવો સમય છે જ્યારે ભારત વિકાસની છલાંગ લગાવી રહ્યું છે. 2024ની ચૂંટણીનો હેતુ ભારતને વિશ્વની ટોચની ત્રણ અર્થવ્યવસ્થાઓમાંની એક બનાવવાનો છે. આ ચૂંટણી પણ દેશની અર્થવ્યવસ્થાને બચાવવાની છે. કોંગ્રેસ પર નિશાન સાધતા પીએમ મોદીએ કહ્યું કે આઝાદી બાદ દેશના સૈનિકો ‘નેશનલ વોર મેમોરિયલ’ની માંગ કરતા રહ્યા. દેશની કમનસીબી જુઓ, મોદી આવ્યા ત્યાં સુધી દેશની સરકારોએ દેશના બહાદુર સૈનિકોના સન્માનમાં ‘વોર મેમોરિયલ’ બનાવવાનું મહત્વ નહોતું સમજ્યું. દેશમાં લોકોની સુરક્ષા કરતા લગભગ 35 હજાર પોલીસ જવાનો શહીદ થયા છે. ‘પોલીસ મેમોરિયલ’ માટે દેશના પોલીસ કર્મચારીઓને 70 વર્ષ રાહ જોવી પડી.
