સુરતમાં ભારે વરસાદ અને સંભવિત પૂર જેવી સ્થિતિની આગાહીને પગલે બુધવારે સાંજથી જ લોકોમાં ચિંતા જોવા મળી હતી. તેના કારણે શહેરના અનેક પ્રોવિઝન સ્ટોર પર દૂધ ખરીદવા લોકોની લાંબી લાઈનો લાગી ગઈ હતી. ઘણા લોકોએ જરૂરિયાત કરતાં વધુ દૂધ ખરીદી લેતાં અનેક દુકાનોમાં દૂધનો સ્ટોક સમય પહેલાં જ ખાલી થઈ ગયો હતો. જોકે, સુમુલ ડેરીએ સ્પષ્ટતા કરી છે કે દૂધની કોઈ અછત નથી અને નાગરિકોએ ગભરાવાની જરૂર નથી. સુમુલ ડેરીના મેનેજિંગ ડિરેક્ટર અરુણ પુરોહિતે જણાવ્યું કે ભારે વરસાદ અને સંભવિત પૂર અંગે જિલ્લા વહીવટી તંત્ર તરફથી અગાઉથી સૂચના આપવામાં આવી હતી. આ સૂચનાને ધ્યાનમાં રાખીને ડેરીએ બુધવારે રાત્રે જ ખાસ આયોજન કરીને સંભવિત અસરગ્રસ્ત વિસ્તારોમાં વધારાનો દૂધ પુરવઠો મોકલી આપ્યો હતો.
વહીવટી તંત્ર દ્વારા ખાસ કરીને લિંબાયત, ઉધના, વરાછા અને અઠવા ઝોનને સંવેદનશીલ વિસ્તાર તરીકે ઓળખાવવામાં આવ્યા હતા. આ વિસ્તારોમાં જો ભારે વરસાદને કારણે પાણી ભરાય અથવા વાહન વ્યવહાર પ્રભાવિત થાય તો દૂધની અછત ન સર્જાય તે માટે રાત્રે જ માંગ પ્રમાણે વધારાનો સ્ટોક પહોંચાડી દેવામાં આવ્યો હતો. અરુણ પુરોહિતે જણાવ્યું કે સામાન્ય દિવસોની સરખામણીએ આ વિસ્તારોમાં વધુ માત્રામાં દૂધ મોકલવામાં આવ્યું છે. સાથે જ સુમુલના તમામ પાર્લરો અને વિતરણ કેન્દ્રો પર પણ પૂરતો સ્ટોક ઉપલબ્ધ રાખવામાં આવ્યો છે જેથી જરૂર પડે ત્યારે તરત જ સપ્લાય કરી શકાય.
ભારે વરસાદની આગાહીને કારણે શહેરમાં પેનિક બાઇંગ જોવા મળ્યું હતું. સામાન્ય રીતે જેટલું દૂધ ખરીદવામાં આવે છે તેના કરતાં અનેક લોકોએ બમણી માત્રામાં દૂધ ખરીદ્યું હતું. તેના કારણે કેટલાક પ્રોવિઝન સ્ટોર પર દૂધનો સ્ટોક વહેલો પૂરો થઈ ગયો હતો. જોકે, સુમુલે તાત્કાલિક વધારાનો સ્ટોક મોકલી આપીને પુરવઠો ફરી સામાન્ય બનાવવાનો પ્રયાસ કર્યો હતો. ડેરીના અધિકારીઓએ જણાવ્યું કે દૂધનો પુરવઠો સંપૂર્ણપણે નિયંત્રણમાં છે અને ઉત્પાદન અથવા સપ્લાયમાં કોઈ સમસ્યા નથી. હાલ માત્ર અચાનક વધી ગયેલી માંગને કારણે કેટલીક જગ્યાએ થોડા સમય માટે સ્ટોક ખાલી થયો હતો.
અરુણ પુરોહિતે નાગરિકોને અપીલ કરતાં કહ્યું કે કોઈપણ પ્રકારની અફવાઓ પર વિશ્વાસ ન કરે. દૂધની અછત સર્જાવાની કોઈ શક્યતા નથી. સુમુલ દરરોજની જેમ નિયમિત રીતે દિવસમાં બે વખત દૂધનો પુરવઠો ચાલુ રાખશે અને જરૂર પડશે તો વધારાનો જથ્થો પણ પહોંચાડવામાં આવશે. તેમણે વધુમાં જણાવ્યું કે સંભવિત પૂરગ્રસ્ત વિસ્તારોમાં બુધવારે રાત્રે જ પૂરતો સ્ટોક પહોંચાડી દેવામાં આવ્યો હોવાથી ગુરુવારે બપોરે પણ સમયસર દૂધ ઉપલબ્ધ રહેશે. લોકોને એકસાથે વધુ દૂધ ખરીદવાની જરૂર નથી.
સુમુલ ડેરી હાલમાં દરરોજ આશરે 12.25 લાખ લિટર દૂધનું વિતરણ કરે છે. પરંતુ હાલની પરિસ્થિતિને ધ્યાનમાં રાખીને જરૂર પડે તો આ સપ્લાય વધારીને લગભગ 14 લાખ લિટર સુધી પહોંચાડવાની પણ તૈયારી કરવામાં આવી છે. ડેરી અને જિલ્લા વહીવટી તંત્ર સતત પરિસ્થિતિ પર નજર રાખી રહ્યા છે. જો વરસાદ વધુ તીવ્ર બને અથવા શહેરના કેટલાક વિસ્તારોમાં પાણી ભરાય તો પણ દૂધનો પુરવઠો ખોરવાય નહીં તે માટે વૈકલ્પિક આયોજન તૈયાર રાખવામાં આવ્યું છે.
સુમુલે સ્પષ્ટ કર્યું છે કે ઉત્પાદન, સ્ટોક અને વિતરણ – ત્રણેય બાબતમાં પૂરતી તૈયારી છે. તેથી નાગરિકોએ ગભરાટમાં આવીને જરૂરિયાત કરતાં વધુ ખરીદી કરવાને બદલે સામાન્ય રીતે જ ખરીદી કરવી જોઈએ. પેનિક બાઇંગને કારણે અન્ય લોકોને મુશ્કેલી પડી શકે છે. વહીવટી તંત્ર અને સુમુલ ડેરીએ સંયુક્ત રીતે લોકોને અપીલ કરી છે કે માત્ર સત્તાવાર માહિતી પર જ વિશ્વાસ રાખે અને સોશિયલ મીડિયા પર ફેલાતી અફવાઓથી દૂર રહે. હાલ દૂધનો પુરવઠો સંપૂર્ણપણે સામાન્ય છે અને આગામી દિવસોમાં પણ કોઈ અછત ન સર્જાય તે માટે તમામ જરૂરી વ્યવસ્થા કરવામાં આવી છે.
