પોલીસ પેટ્રોલિંગ વધારવાની ઉગ્ર માંગ સાથે સ્થાનિકોએ યોજી તાકીદની બેઠક; અજાણ્યા તત્વોના ત્રાસથી 235 રો-ડુપ્લેક્સના રહીશો અસુરક્ષિત
વડોદરા: સંસ્કારી નગરી વડોદરામાં છેલ્લા કેટલાક સમયથી તસ્કરો અને અસામાજિક તત્વો બેફામ બન્યા હોય તેમ લાગી રહ્યું છે. શહેરના અત્યંત પોશ ગણાતા પોલો ગ્રાઉન્ડ વિસ્તારમાં આવેલી રાજદીપ સોસાયટીમાં છેલ્લા કેટલાક દિવસોથી ચોરના આતંકને કારણે રહીશોની ઊંઘ હરામ થઈ ગઈ છે. આ સોસાયટીમાં એક જ શંકાસ્પદ શખ્સની હરકતો સતત ચોથી વખત સીસીટીવી કેમેરામાં કેદ થઈ છે, જેને પગલે સમગ્ર વિસ્તારમાં ભારે ગભરાટ અને અસુરક્ષાની લાગણી વ્યાપી ગઈ છે.
પ્રાપ્ત વિગતો અનુસાર, રાજદીપ સોસાયટીના ખાસ કરીને 235 રો-ડુપ્લેક્સ વિભાગમાં તસ્કરોનો ડોળો હોવાનું જણાય છે. સીસીટીવી ફૂટેજમાં જોવા મળ્યા મુજબ, એક અજાણ્યો શખ્સ નિર્ભય બનીને સોસાયટીમાં આંટાફેરા કરી રહ્યો છે. આ શખ્સની હિલચાલ પરથી સ્પષ્ટ જણાય છે કે તેને કાયદાનો કોઈ ડર નથી. એક જ વ્યક્તિ વારંવાર ચોરીના ઇરાદે સોસાયટીમાં પ્રવેશતી હોવા છતાં પોલીસ પકડથી દૂર રહેતા રહીશોમાં તંત્ર પ્રત્યે રોષ જોવા મળી રહ્યો છે.
વારંવાર બનતી આ ઘટનાઓને પગલે સોસાયટીના રહીશોએ તાત્કાલિક ધોરણે એક બેઠક યોજી હતી. આ બેઠકમાં લોકોએ પોતાની સુરક્ષા અંગે ગંભીર ચિંતા વ્યક્ત કરી હતી. સ્થાનિક રહીશોએ જણાવ્યું હતું કે, “ચોર બેખોફ થઈને સોસાયટીમાં ફરી રહ્યો છે અને વારંવાર એક જ પ્રકારની હરકતો કરી રહ્યો છે. જો સમયસર આ શખ્સને ઝડપી પાડવામાં નહીં આવે, તો આવનારા દિવસોમાં કોઈ મોટી ચોરી કે જાનહાનિ જેવી અનિચ્છનીય ઘટના બની શકે છે.”
આ મામલે સ્થાનિકોએ પોલીસ તંત્ર પાસે તાત્કાલિક અને કડક કાર્યવાહીની માંગણી કરી છે. રહીશોની માંગ છે કે આ વિસ્તારમાં રાત્રિ દરમિયાન પોલીસ પેટ્રોલિંગ વધારવામાં આવે અને કાયમી ધોરણે પોલીસ પોઇન્ટ ગોઠવવામાં આવે જેથી અસામાજિક તત્વોમાં ફાળ પડે. હાલમાં સોસાયટીના લોકોએ સ્વયંભૂ રીતે પણ સતર્કતા દાખવવાનું શરૂ કર્યું છે. રહીશોએ એકબીજાને અજાણ્યા વ્યક્તિઓ પર નજર રાખવા અને સીસીટીવી સિસ્ટમને વધુ મજબૂત કરવા અપીલ કરી છે.
