મુંબઈમાં એનસીપીના અજિત પવાર જૂથના નેતા અને એમએલસી ઝિશાન સિદ્દિકીને સોશિયલ મીડિયા પર વાઇરલ થયેલી એક વોઇસ નોટ દ્વારા જાનથી મારી નાખવાની કથિત ધમકી આપવામાં આવી છે. આ ધમકી તેમના પિતા અને પૂર્વ મંત્રી બાબા સિદ્દિકીની હત્યા કેસમાં વોન્ટેડ ગેંગસ્ટર ઝિશાન અખ્તર તરફથી આપવામાં આવી હોવાનો દાવો કરવામાં આવી રહ્યો છે. મામલો સામે આવ્યા બાદ મુંબઈ ક્રાઈમ બ્રાન્ચે વાયરલ ઓડિયો ક્લિપની સત્યતા અને તેના સ્ત્રોતની તપાસ શરૂ કરી છે. પોલીસ સૂત્રોના જણાવ્યા અનુસાર, સોશિયલ મીડિયા પર સામે આવેલી વોઇસ નોટમાં ઝિશાન સિદ્દિકીને ધમકીભર્યો સંદેશ આપવામાં આવ્યો છે. ઓડિયોમાં કથિત રીતે કહેવામાં આવ્યું છે કે, ‘મેં તારા પિતાની હત્યા કરી છે અને હવે તારો વારો છે.’ આ સાથે ઝિશાન પર તેની કેટલીક ગતિવિધિઓમાં દખલ કરવાનો આરોપ લગાવવામાં આવ્યો હોવાનું કહેવાય છે. ઓડિયોમાં તેને પોતાની સુરક્ષા વધારવાની પણ ધમકીભરી સલાહ આપવામાં આવી હોવાનો દાવો છે.
આ કથિત વોઇસ નોટને બાબા સિદ્દિકી હત્યા કેસમાં વોન્ટેડ આરોપી ઝિશાન અખ્તર સાથે જોડવામાં આવી રહી છે. તપાસ એજન્સીઓના જણાવ્યા મુજબ ઝિશાન અખ્તર બાબા સિદ્દીકીની હત્યાના કેસમાં મહત્વનો આરોપી છે અને હાલમાં પોલીસની વોન્ટેડ યાદીમાં છે. તે વિદેશમાં હોવાની શક્યતા વ્યક્ત કરવામાં આવી રહી છે. બાબા સિદ્દીકીની હત્યા બાદથી જ આ કેસમાં ગેંગસ્ટર લોરેન્સ બિશ્નોઈ સાથે જોડાયેલા ગેંગના કનેક્શનની તપાસ કરવામાં આવી રહી છે. હત્યા કેસમાં અનેક આરોપીઓની ધરપકડ થઈ ચૂકી છે, જ્યારે કેટલાક આરોપીઓ હજુ પોલીસની પહોંચથી બહાર છે. હવે ઝિશાન સિદ્દિકીને મળેલી કથિત ધમકીને પણ આ જ કેસના સંદર્ભમાં ગંભીરતાથી લેવામાં આવી રહી છે.
સોશિયલ મીડિયા પર વાયરલ થયેલા ઓડિયોમાં કથિત રીતે ધમકી આપનાર વ્યક્તિએ બાબા સિદ્દીકીની હત્યાની જવાબદારી સ્વીકારવાનો દાવો કર્યો હોવાનું કહેવાય છે. તેણે ઝિશાન સિદ્દિકીને ચેતવણી આપતા પોલીસ અથવા ક્રાઈમ બ્રાન્ચનો સંપર્ક કરવા છતાં પોતે બચી નહીં શકે તેવી ભાષામાં ધમકી આપી હોવાનું જણાવવામાં આવી રહ્યું છે. જોકે, આ વોઇસ નોટ ખરેખર ઝિશાન અખ્તરે જ મોકલી છે કે નહીં તેની હજુ સુધી સત્તાવાર પુષ્ટિ થઈ નથી. મુંબઈ ક્રાઈમ બ્રાન્ચ હવે આ ઓડિયો ક્લિપની ટેકનિકલ તપાસ કરી રહી છે. પોલીસ એ જાણવા પ્રયાસ કરી રહી છે કે વોઇસ નોટ કયા સોશિયલ મીડિયા એકાઉન્ટ અથવા નંબર પરથી મોકલવામાં આવી હતી, તેનો મૂળ સ્ત્રોત શું છે અને તેમાં રહેલો અવાજ ખરેખર ઝિશાન અખ્તરનો છે કે નહીં. ઓડિયોની ફોરેન્સિક તપાસ પણ કરવામાં આવી શકે છે.
પોલીસ સૂત્રોના જણાવ્યા અનુસાર, અત્યાર સુધી ઝિશાન સિદ્દીકી અથવા તેમના પરિવારના કોઈ સભ્ય દ્વારા આ કથિત ધમકી અંગે ઔપચારિક ફરિયાદ નોંધાવવામાં આવી નથી. ઝિશાન હાલમાં ભારતની બહાર હોવાનું જાણવા મળ્યું છે. તેઓ ભારત પરત ફર્યા બાદ પોલીસ તેમનું નિવેદન નોંધી શકે છે. આ મામલે પોલીસ હાલમાં તમામ પાસાં તપાસી રહી છે. માત્ર સોશિયલ મીડિયા પર વાઇરલ થયેલી ઓડિયો ક્લિપના આધારે ધમકી આપનાર વ્યક્તિની ઓળખ અંગે અંતિમ નિષ્કર્ષ કાઢવામાં આવ્યો નથી. ક્રાઈમ બ્રાન્ચ ઓડિયોની સત્યતા, તેને ફેલાવનાર લોકો અને તેના મૂળ સ્ત્રોત અંગે માહિતી એકત્ર કરી રહી છે.
બાબા સિદ્દીકીની હત્યા બાદ તેમના પરિવારની સુરક્ષા પહેલેથી જ મહત્વનો મુદ્દો બની છે. આવી સ્થિતિમાં તેમના પુત્રને મળેલી કથિત જાનથી મારી નાખવાની ધમકીને કારણે સુરક્ષા એજન્સીઓ પણ સાવચેત બની છે. જો તપાસમાં ધમકી સાચી હોવાનું સાબિત થાય તો પોલીસ આરોપી સામે કાયદાકીય કાર્યવાહી કરી શકે છે. બાબા સિદ્દીકીની હત્યા 2024માં મુંબઈમાં કરવામાં આવી હતી. આ ઘટનાએ મહારાષ્ટ્રના રાજકીય અને સુરક્ષા વર્તુળોમાં ભારે ચકચાર મચાવી હતી. ત્યારબાદ હત્યાના કાવતરાથી લઈને આરોપીઓના નેટવર્ક સુધી અનેક પાસાંની તપાસ કરવામાં આવી રહી છે.
હવે ઝિશાન સિદ્દિકીને મળેલી આ કથિત ધમકીથી જૂનો હત્યા કેસ ફરી ચર્ચામાં આવ્યો છે. જોકે, હાલ સૌથી મહત્વનું એ છે કે વાયરલ થયેલી વોઇસ નોટ ખરેખર વોન્ટેડ આરોપી ઝિશાન અખ્તરે મોકલી છે કે પછી કોઈએ તેના નામે ખોટી ધમકી આપી છે. મુંબઈ ક્રાઈમ બ્રાન્ચની ટેકનિકલ તપાસ બાદ જ આ અંગે સ્થિતિ વધુ સ્પષ્ટ થશે. પોલીસના જણાવ્યા પ્રમાણે ઝિશાન સિદ્દીકી ભારત પરત ફર્યા બાદ તેમનું નિવેદન નોંધવામાં આવશે. ત્યારબાદ ધમકીની ગંભીરતા અને તેના પાછળના વ્યક્તિ કે નેટવર્ક અંગે તપાસને વધુ દિશા મળી શકે છે. હાલમાં પોલીસ વાયરલ ઓડિયો અને તેના સ્ત્રોતની ચકાસણીમાં લાગી છે.
