Technology

AI ફ્રેશર્સની નોકરીઓ છીનવી લેશે કે નવી તકો ઊભી કરશે? Cognizantના MDએ આપ્યો જવાબ

આર્ટિફિશિયલ ઇન્ટેલિજન્સ (AI)ના વધતા ઉપયોગને કારણે રોજગાર ક્ષેત્રમાં મોટા ફેરફારો જોવા મળી રહ્યા છે. ખાસ કરીને IT ક્ષેત્રમાં ફ્રેશર્સ માટે નોકરી મેળવવી પડકારજનક બની રહી છે. અગાઉ નવા કર્મચારીઓને સોંપવામાં આવતાં કોડિંગ, ટેસ્ટિંગ અને અન્ય નિયમિત કામ હવે AI ટૂલ્સની મદદથી થઈ રહ્યાં છે. આ સ્થિતિમાં યુવાનોના મનમાં સવાલ ઊભો થઈ રહ્યો છે કે શું ભવિષ્યમાં કંપનીઓ ફ્રેશર્સને નોકરી આપવાનું બંધ કરી દેશે? આ અંગે Cognizant Indiaના ચેરમેન અને મેનેજિંગ ડિરેક્ટર રાજેશ વોરિયરે મહત્ત્વપૂર્ણ નિવેદન આપ્યું છે. તેમના મતે AI ફ્રેશર્સની નોકરીઓ છીનવી રહ્યું નથી, પરંતુ તેમની કામ કરવાની રીતમાં ફેરફાર કરી રહ્યું છે.

રાજેશ વોરિયરે Cognizant અને Persona દ્વારા જૂન 2026માં કરવામાં આવેલા અભ્યાસનો ઉલ્લેખ કર્યો હતો. આ અભ્યાસ મુજબ, ભારતીય કંપનીઓમાં એન્ટ્રી-લેવલની લગભગ 37 ટકા નોકરીઓનું કામ AI દ્વારા થઈ રહ્યું છે. જ્યારે વૈશ્વિક સ્તરે આ આંકડો 33 ટકા છે. સર્વેમાં સામેલ 80 ટકા લોકોએ માન્યું હતું કે AIની મદદથી કર્મચારીઓ હવે વધુ મહત્ત્વપૂર્ણ અને મૂલ્યવર્ધિત કામ પર ધ્યાન કેન્દ્રિત કરી શકે છે.

જોકે, અભ્યાસમાં રોજગારને લઈને એક મહત્ત્વપૂર્ણ બાબત પણ સામે આવી છે. 94 ટકા HR હેડ્સનું માનવું છે કે AIના કારણે ભવિષ્યમાં એન્ટ્રી-લેવલની નવી નોકરીઓ ઊભી થશે, જે હાલમાં અસ્તિત્વમાં નથી. એટલે કે AIને કારણે કેટલીક પરંપરાગત જવાબદારીઓ ઘટી શકે છે, પરંતુ તેની સાથે નવા પ્રકારની ભૂમિકાઓ અને કામની તકો પણ ઊભી થવાની શક્યતા છે.

રાજેશ વોરિયરના જણાવ્યા અનુસાર, અગાઉ IT કંપનીઓમાં ફ્રેશર્સને મુખ્યત્વે કોડિંગ, સોફ્ટવેર ટેસ્ટિંગ અને અન્ય નિયમિત કાર્યો સોંપવામાં આવતાં હતાં. હવે AI આમાંથી ઘણાં કામ ઝડપથી કરી શકે છે. તેથી નવા કર્મચારીઓની જવાબદારીઓમાં પણ ફેરફાર થઈ રહ્યો છે. હવે ફ્રેશર્સે AI દ્વારા તૈયાર કરવામાં આવેલા પરિણામોની તપાસ કરવી, તેમાં રહેલી ભૂલો ઓળખવી, રિપોર્ટ્સ સમજવા અને જરૂરિયાત મુજબ યોગ્ય નિર્ણય લેવાની ક્ષમતા વિકસાવવી પડશે.

આનો અર્થ એ છે કે હવે માત્ર બેઝિક કોડિંગ કે સોફ્ટવેર ટેસ્ટિંગનું જ્ઞાન પૂરતું નહીં રહે. યુવાનોએ AI ટૂલ્સનો ઉપયોગ કરતાં પણ શીખવું પડશે. સાથે જ સમસ્યાઓ સમજવાની, તેનું વિશ્લેષણ કરવાની અને યોગ્ય ઉકેલ શોધવાની કુશળતા વિકસાવવી પડશે.

વોરિયરે કંપનીઓની ભવિષ્યની જરૂરિયાતો અંગે જણાવ્યું હતું કે હવે એવા કર્મચારીઓની માગ વધશે, જેઓ AIને સમજી શકે અને તેની મદદથી વાસ્તવિક સમસ્યાઓનો ઉકેલ લાવી શકે. તેમણે કોલેજોને પણ ઉદ્યોગોની બદલાતી જરૂરિયાતો અનુસાર અભ્યાસક્રમમાં ફેરફાર કરવાની સલાહ આપી હતી, જેથી વિદ્યાર્થીઓ શિક્ષણ પૂર્ણ કર્યા બાદ નવી ટેક્નોલોજી અને કામકાજની પદ્ધતિઓ માટે તૈયાર રહી શકે.

Most Popular

To Top