બ્રિટનના ભાવિ રાજા પ્રિન્સ વિલિયમ અને પ્રિન્સેસ કેટ મિડલટન પોતાના ત્રણ દિવસીય સત્તાવાર ભારત પ્રવાસ અંતર્ગત સોમવારે મુંબઈ પહોંચ્યા હતા, જ્યાં તેમણે શાહી પ્રોટોકોલ અને ઔપચારિકતાઓને બાજુ પર મૂકીને શહેરની અસલી સ્ટ્રીટ લાઈફનો ભરપૂર આનંદ માણ્યો હતો. મુંબઈની ઐતિહાસિક ગલીઓમાં જ્યારે બ્રિટિશ શાહી દંપતીની સાથે ‘ક્રિકેટના ભગવાન’ ગણાતા સચિન તેંડુલકર પણ જોડાયા, ત્યારે સમગ્ર વિસ્તારમાં અત્યંત રોમાંચક અને અદ્ભુત દ્રશ્યો સર્જાયા હતા. ‘2026 અર્થશોટ પ્રાઈઝ’ના કાર્યક્રમમાં હાજરી આપવા માટે ભારત આવેલા પ્રિન્સ અને પ્રિન્સેસ ઓફ વેલ્સે પ્રવાસના પહેલા જ દિવસે મુંબઈની સડકો પર ક્રિકેટ, કુલ્હડ ચા અને સ્ટ્રીટ ફૂડની મજા માણીને સૌનું દિલ જીતી લીધું હતું.
સોમવારે સવારે પ્રિન્સ વિલિયમ અને પ્રિન્સેસ કેટે ક્રિકેટ લિજેન્ડ સચિન તેંડુલકર તેમજ સ્થાનિક સ્કૂલની વિદ્યાર્થિનીઓ સાથે મળીને મુંબઈમાં ‘ગલી ક્રિકેટ’ રમી હતી. હાથમાં બેટ અને બોલ લઈને શાહી દંપતીએ કોઈપણ પ્રકારના ખચકાટ વગર યુવા ક્રિકેટરો સાથે ખૂબ જ હળવાશથી રમતનો આનંદ માણ્યો હતો. સચિન તેંડુલકરના માર્ગદર્શન હેઠળ પ્રિન્સ અને પ્રિન્સેસે ક્રિકેટના શોટ્સ લગાવ્યા હતા અને બાળકો સાથે સંવાદ કરીને તેમનો ઉત્સાહ વધાર્યો હતો.
સામાન્ય રીતે વિદેશી મહાનુભાવોના પ્રવાસો માત્ર હાઈ-પ્રોફાઈલ બેઠકો અને પ્રવાસી સ્થળો પૂરતા મર્યાદિત હોય છે, પરંતુ સચિન તેંડુલકર શાહી દંપતીને મુંબઈની અસલી સંસ્કૃતિ અને વારસાનો પરિચય કરાવવા લઈ ગયા હતા. આ ત્રણેય મહાનુભાવો મુંબઈના ઐતિહાસિક બેલાર્ડ એસ્ટેટ વિસ્તારમાં સાથે પગપાળા ફરતા જોવા મળ્યા હતા. આ મુલાકાત દરમિયાન તેઓ ભારતના સૌથી જૂના ફોટોગ્રાફી સ્ટુડિયો પૈકીના એક એવા ‘હેમિલ્ટન સ્ટુડિયોઝ’ની બહાર પણ સાથે નજરે પડ્યા હતા. ભ્રમણ દરમિયાન તેમણે મુંબઈના પ્રખ્યાત લોકલ સ્ટ્રીટ ફૂડ અને માટીના કુલ્હડમાં મળતી ગરમાગરમ ચાનો સ્વાદ પણ માણ્યો હતો, જેની તસવીરો અને વીડિયો સોશિયલ મીડિયા પર ખૂબ પસંદ કરવામાં આવી રહ્યા છે.
પ્રિન્સ વિલિયમ અને કેટનો મુંબઈ અને ક્રિકેટ સાથેનો આ નાતો એક દાયકો જૂનો છે. આ ઘટનાએ 10 વર્ષ પહેલાંની એટલે કે એપ્રિલ 2016ની યાદોને ફરીથી તાજી કરી દીધી છે. એક દાયકા અગાઉ જ્યારે તેઓ પોતાના પ્રથમ સત્તાવાર ભારત પ્રવાસે આવ્યા હતા, ત્યારે પણ તેમણે મુંબઈના ઓવલ મેદાનમાં સ્થાનિક બાળકો સાથે સ્ટ્રીટ ક્રિકેટ રમીને શહેર પ્રત્યે પોતાનો પ્રેમ વ્યક્ત કર્યો હતો.
પ્રિન્સેસ કેટ મિડલટન માટે આ ભારત પ્રવાસ વ્યક્તિગત રીતે પણ અત્યંત ખાસ અને મહત્વપૂર્ણ માનવામાં આવી રહ્યો છે. વર્ષ 2024માં ગંભીર બીમારી સામે લડીને પ્રિવેન્ટિવ કીમોથેરાપી કરાવ્યા બાદ આ તેમનો સૌથી મોટો અને હાઈ-પ્રોફાઈલ વિદેશ પ્રવાસ છે, જેમાં તેઓ અત્યંત સ્વસ્થ અને પ્રફુલ્લિત જણાતા હતા. ઉલ્લેખનીય છે કે પ્રિન્સ વિલિયમે પર્યાવરણની સૌથી મોટી સમસ્યાઓના નવીન ઉકેલો શોધવા અને તેને પ્રોત્સાહન આપવા માટે વર્ષ 2020માં ‘અર્થશોટ પ્રાઈઝ’ની શરૂઆત કરી હતી, જેની છઠ્ઠી એડિશનના કાર્યક્રમ માટે તેઓ ભારત આવ્યા છે. મુંબઈના કાર્યક્રમો પૂર્ણ કર્યા બાદ શાહી દંપતી નવી દિલ્હી જશે, જ્યાં બુધવારે વડાપ્રધાન નરેન્દ્ર મોદી સાથેની મુલાકાત સાથે તેમના આ ત્રણ દિવસના ભારત પ્રવાસનું સમાપન થશે.
Prince William and Kate India Visit, Mumbai Gully Cricket, Sachin Tendulkar Royal Couple, Earthshot Prize 2026, Ballard Estate Mumbai