જમીન ધોવાતાં કન્સ્ટ્રક્શન સાઇટની રિટેઇનિંગ વોલ કડાકાભેર તૂટી પડી, સમયસર બચાવ કામગીરીથી મોટી દુર્ઘટના ટળી
ગુજરાતમાં છેલ્લા કેટલાક દિવસોથી વરસી રહેલા ભારે વરસાદે અનેક શહેરોમાં જનજીવન અસ્તવ્યસ્ત કરી દીધું છે. અમદાવાદમાં પણ સતત વરસાદને કારણે અનેક વિસ્તારોમાં પાણી ભરાવા, ટ્રાફિક જામ અને અકસ્માતોની ઘટનાઓ સામે આવી રહી છે. આ દરમિયાન શહેરના આંબાવાડી વિસ્તારમાં એક મોટી દુર્ઘટના બનતાં-બનતાં ટળી હતી. ભારે વરસાદને કારણે નિર્માણાધીન બિલ્ડિંગની રિટેઇનિંગ વોલ અચાનક ધરાશાયી થતાં આસપાસના વિસ્તારમાં દોડધામ મચી ગઈ હતી. ઘટનાની જાણ થતાં જ ફાયર બ્રિગેડ, પોલીસ અને સ્થાનિક વહીવટી તંત્રની ટીમો તાત્કાલિક સ્થળ પર પહોંચી ગઈ હતી.
પ્રાથમિક માહિતી મુજબ, સતત વરસાદને કારણે કન્સ્ટ્રક્શન સાઇટની આસપાસની જમીન ધોવાઈ જતાં દીવાલનો પાયો નબળો પડી ગયો હતો. જેના કારણે ભારે દબાણ વચ્ચે રિટેઇનિંગ વોલ અચાનક કડાકાભેર ધરાશાયી થઈ હતી. ઘટનાના સમયે ત્યાં કામ કરતા કામદારો અને લોકોમાં ગભરાટ ફેલાયો હતો. કેટલાક લોકો કાટમાળ અને જોખમગ્રસ્ત વિસ્તારમાં ફસાઈ ગયા હોવાની માહિતી મળતા તાત્કાલિક રેસ્ક્યુ ઓપરેશન શરૂ કરવામાં આવ્યું હતું. ફાયર વિભાગની ટીમોએ સમય ગુમાવ્યા વિના સ્થળ પર પહોંચી બચાવ કામગીરી હાથ ધરી હતી. આધુનિક સાધનો અને જરૂરી સુરક્ષા ઉપકરણોની મદદથી આશરે 20 જેટલા લોકોને સહીસલામત બહાર કાઢવામાં આવ્યા હતા. ત્યારબાદ તમામ લોકોને સુરક્ષિત સ્થળે ખસેડવામાં આવ્યા હતા. સદનસીબે આ સમગ્ર ઘટનામાં કોઈ જાનહાનિ થઈ નથી અને કોઈ ગંભીર રીતે ઇજાગ્રસ્ત થયું હોવાના અહેવાલ પણ સામે આવ્યા નથી.
બચાવ કામગીરી દરમિયાન ફાયર વિભાગે સૌથી પહેલા સમગ્ર વિસ્તારને સુરક્ષિત બનાવી ત્યાં હાજર લોકોને દૂર ખસેડ્યા હતા. ત્યાર બાદ કાટમાળ નીચે કોઈ ફસાયેલું તો નથી ને તેની પણ ઝીણવટભરી તપાસ કરવામાં આવી હતી.તેમજ ફાયર વિભાગ, પોલીસ અને સ્થાનિક પ્રશાસન વચ્ચેના સુમેળના કારણે સમગ્ર રેસ્ક્યુ ઓપરેશન સફળતાપૂર્વક પૂર્ણ થયું હતું.
ભારે વરસાદને કારણે અમદાવાદ શહેરના અનેક વિસ્તારોમાં પાણી ભરાઈ જવાની સ્થિતિ સર્જાઈ છે. મુખ્ય માર્ગો પર ટ્રાફિકની લાંબી કતારો જોવા મળી રહી છે, જ્યારે કેટલાક નીચાણવાળા વિસ્તારોમાં વાહનવ્યવહાર પણ પ્રભાવિત થયો છે. સતત વરસાદને કારણે અનેક નિર્માણાધીન પ્રોજેક્ટો પર પણ જોખમ ઊભું થયું છે, જેને ધ્યાનમાં રાખીને તંત્ર વધુ સતર્ક બન્યું છે.
ઘટના બાદ અમદાવાદ મહાનગરપાલિકા અને સંબંધિત વિભાગોએ નિર્માણાધીન સાઇટોની સલામતીની સમીક્ષા શરૂ કરી છે. ખાસ કરીને જ્યાં ઊંડું ખોદકામ કરવામાં આવ્યું છે,જો કે રિટેઇનિંગ વોલ બનાવવામાં આવી છે તેવા સ્થળોએ વધારાની તકેદારી રાખવા સૂચના આપવામાં આવી છે. બિલ્ડરો અને કન્સ્ટ્રક્શન કંપનીઓને વરસાદી સિઝન દરમિયાન સલામતીના તમામ ધોરણોનું પાલન કરવાની સૂચના પણ આપવામાં આવી છે.હવામાન વિભાગે આગામી દિવસોમાં પણ અમદાવાદ સહિત રાજ્યના અનેક જિલ્લાઓમાં ભારે વરસાદની આગાહી વ્યક્ત કરી છે. જેના કારણે વહીવટી તંત્રને સતત એલર્ટ મોડ પર રાખવામાં આવ્યું છે. ફાયર વિભાગ અને આપત્તિ વ્યવસ્થાપન વિભાગને પણ કોઈપણ ઇમરજન્સી સ્થિતિનો સામનો કરવા માટે તૈયાર રહેવા સૂચના આપવામાં આવી છે.
ફાયર વિભાગે નાગરિકોને અપીલ કરી છે કે ભારે વરસાદ દરમિયાન નિર્માણાધીન ઇમારતો, ખોદકામવાળા વિસ્તારો અને જોખમી સ્થળોથી દૂર રહેવું જોઈએ. જો કોઈ સ્થળે દીવાલમાં તિરાડ, જમીન ધોવાઈ જવી અથવા ધરાશાયી થવાનો ભય જણાય તો તાત્કાલિક સ્થાનિક તંત્ર અથવા ફાયર વિભાગને જાણ કરવી જોઈએ. સત્તાવાર સૂચનાઓનું પાલન કરીને જ પોતાનો અને પરિવારનો જીવ સુરક્ષિત રાખી શકાય છે. આંબાવાડીની આ ઘટના ફરી એકવાર દર્શાવે છે કે ભારે વરસાદ દરમિયાન નિર્માણાધીન પ્રોજેક્ટોમાં સલામતીના નિયમોનું કડક પાલન કરવું કેટલું જરૂરી છે. ફાયર વિભાગની સમયસર અને ઝડપી કામગીરીના કારણે મોટી દુર્ઘટના ટળી અને આશરે 20 લોકોનો જીવ સુરક્ષિત રીતે બચાવી શકાયો. હાલમાં સમગ્ર વિસ્તાર પરિસ્થિતિ સંપૂર્ણપણે નિયંત્રણમાં હોવાનું તંત્ર દ્વારા જણાવાયું છે.
