વલસાડમાં 5.79 ઇંચ અને સુરતના પલસાણામાં 4.88 ઇંચ વરસાદ, NDRF મેદાનમાં; 5 જિલ્લામાં રેડ એલર્ટ અને 12 જિલ્લામાં ઓરેન્જ એલર્ટ જાહેર
ગુજરાતમાં ચોમાસાએ ફરી એકવાર જોર પકડ્યું છે. દક્ષિણ ગુજરાતમાં સતત વરસી રહેલા ધોધમાર વરસાદે જનજીવનને અસર પહોંચાડી છે. ખાસ કરીને વલસાડ અને સુરત જિલ્લામાં માત્ર 6 કલાકમાં પડેલા ભારે વરસાદને કારણે અનેક વિસ્તારોમાં જળબંબાકાર જેવી સ્થિતિ સર્જાઈ છે. રસ્તાઓ, નીચાણવાળા વિસ્તારો અને અનેક રહેણાંક વિસ્તારો પાણીમાં ગરકાવ થઈ ગયા છે. ભારતીય હવામાન વિભાગે આગામી સાત દિવસ સુધી રાજ્યમાં ભારે વરસાદની આગાહી કરી છે અને દક્ષિણ ગુજરાતના અનેક જિલ્લાઓ માટે રેડ એલર્ટ જાહેર કર્યું છે.
ગુજરાત હવામાન વિભાગના તાજા આંકડા અનુસાર સવારે 6 વાગ્યાથી બપોરે 12 વાગ્યા સુધીના માત્ર 6 કલાકમાં વલસાડ તાલુકામાં 5.79 ઇંચ વરસાદ નોંધાયો, જ્યારે સુરત જિલ્લાના પલસાણા તાલુકામાં 4.88 ઇંચ વરસાદ વરસ્યો હતો. વલસાડ જિલ્લાના પારડી અને ઉમરગામમાં પણ સાડા ચાર ઇંચ જેટલો વરસાદ નોંધાતા અનેક વિસ્તારોમાં પાણી ભરાઈ ગયા હતા.
રાજ્યના 90 તાલુકામાં મેઘમહેર
ભારે વરસાદ માત્ર દક્ષિણ ગુજરાત પૂરતો મર્યાદિત રહ્યો નથી. રાજ્યના કુલ 90 તાલુકાઓમાં નોંધપાત્ર વરસાદ વરસ્યો છે. સવારના પ્રથમ ચાર કલાકમાં જ 78 તાલુકાઓમાં વરસાદ નોંધાયો હતો, ત્યારબાદ વરસાદનો વ્યાપ વધુ વધતાં અનેક વિસ્તારોમાં ખેડૂતો અને સામાન્ય લોકોને રાહત મળી છે. જોકે ભારે વરસાદને કારણે અનેક સ્થળોએ જનજીવન પ્રભાવિત બન્યું છે.
વલસાડમાં ખાનગી બસ ફસાઈ, 16 મુસાફરોનું સફળ રેસ્ક્યૂ
વલસાડ જિલ્લાના નાના પોંઢા નજીક અંભેટી વિસ્તારમાં કોપરેલી-વાપી માર્ગ પર પાણીના જોરદાર પ્રવાહમાં એક ખાનગી બસ ફસાઈ ગઈ હતી. બસમાં સવાર 16 મુસાફરોને સ્થાનિક પોલીસ, ગ્રામ પંચાયત અને ગ્રામજનોના સંયુક્ત પ્રયાસોથી સુરક્ષિત બહાર કાઢવામાં આવ્યા હતા.મુસાફરોને સુરક્ષિત સ્થળે ખસેડ્યા બાદ કોઈ અનિચ્છનીય ઘટના ન બને તે માટે માર્ગની બંને બાજુ બેરિકેડિંગ કરીને વાહનવ્યવહાર બંધ કરી દેવામાં આવ્યો હતો.
STP પ્લાન્ટમાં ફસાયેલા ત્રણ શ્રમિકોને NDRFએ બચાવ્યા
વલસાડ શહેરના પાલીહિલ પાછળ આવેલા STP પ્લાન્ટમાં ભારે વરસાદને કારણે ત્રણ શ્રમિકો ફસાઈ ગયા હતા. ઘટનાની જાણ થતાં જ NDRFની ટીમ તાત્કાલિક સ્થળ પર પહોંચી હતી.
રેસ્ક્યૂ ઓપરેશન દરમિયાન NDRFના જવાનોએ સમયસૂચકતા અને આધુનિક સાધનોની મદદથી ત્રણેય શ્રમિકોને સુરક્ષિત બહાર કાઢ્યા હતા. સ્થાનિક લોકોએ પણ બચાવ કામગીરીમાં સહયોગ આપ્યો હતો.
સુરત અને વલસાડમાં NDRF તહેનાત
હવામાન વિભાગ દ્વારા ભારે વરસાદની આગાહી બાદ સુરત અને વલસાડ જિલ્લામાં પહેલેથી જ NDRFની ટીમોને સ્ટેન્ડબાય રાખવામાં આવી હતી.સુરતના પર્વત પાટિયા સહિતના નીચાણવાળા વિસ્તારોમાં પાણી ભરાવાની શક્યતાને ધ્યાનમાં રાખીને બચાવ દળોને તાત્કાલિક કામગીરી માટે તહેનાત કરવામાં આવ્યા છે. જિલ્લા વહીવટીતંત્ર સતત સ્થિતિ પર નજર રાખી રહ્યું છે.
દીવ-દમણ અને દાદરા નગર હવેલીમાં પણ એલર્ટ
દક્ષિણ ગુજરાતમાં ભારે વરસાદને ધ્યાનમાં રાખીને દીવ-દમણ અને દાદરા નગર હવેલીના વહીવટીતંત્રે પણ એડવાઈઝરી જાહેર કરી છે.પ્રવાસીઓ અને સ્થાનિક લોકોને નદી, દરિયા, ધોધ અને નીચાણવાળા વિસ્તારોમાં જવાનું ટાળવા સૂચના આપવામાં આવી છે. સાથે જ જરૂરી ન હોય તો મુસાફરી ન કરવાની પણ અપીલ કરવામાં આવી છે.
પાંચ જિલ્લામાં રેડ એલર્ટ
હવામાન વિભાગે આગામી કલાકો માટે સુરત, નવસારી, વલસાડ અને ડાંગ સહિત દક્ષિણ ગુજરાતના વિસ્તારોમાં અતિ ભારે વરસાદની આગાહી સાથે રેડ એલર્ટ જાહેર કર્યું છે.વહીવટીતંત્રને જરૂરી બચાવ વ્યવસ્થા, કંટ્રોલ રૂમ સક્રિય રાખવા અને નીચાણવાળા વિસ્તારોના લોકો પર ખાસ નજર રાખવાના નિર્દેશ આપવામાં આવ્યા છે.
12 જિલ્લામાં ઓરેન્જ એલર્ટ
દક્ષિણ ગુજરાત ઉપરાંત સૌરાષ્ટ્ર અને ઉત્તર ગુજરાતના અનેક જિલ્લાઓમાં પણ ભારે વરસાદની શક્યતા વ્યક્ત કરવામાં આવી છે.હવામાન વિભાગે ગીર સોમનાથ, અમરેલી, ભાવનગર, ભરુચ, નર્મદા, તાપી, છોટાઉદેપુર, પંચમહાલ, દાહોદ, બનાસકાંઠા, મહેસાણા અને સાબરકાંઠા જિલ્લામાં ઓરેન્જ એલર્ટ જાહેર કર્યું છે.આ જિલ્લાઓમાં ભારે વરસાદ સાથે વીજળીના કડાકા અને તેજ પવનની શક્યતા પણ વ્યક્ત કરવામાં આવી છે.
ખેડૂતોમાં ખુશી, શહેરોમાં મુશ્કેલી
એક તરફ ભારે વરસાદને કારણે શહેરી વિસ્તારોમાં પાણી ભરાવા, ટ્રાફિક જામ અને દૈનિક જીવન પર અસર જોવા મળી રહી છે, તો બીજી તરફ ખેડૂતોમાં ખુશીનો માહોલ છે.તાજેતરમાં વરસાદની અછતને કારણે ખરીફ પાકના વાવેતર પર અસર પડી હતી. હવે સતત વરસી રહેલા વરસાદથી મગફળી, કપાસ, ડાંગર, સોયાબીન અને અન્ય પાકોને મોટો ફાયદો થશે તેવી આશા વ્યક્ત કરવામાં આવી રહી છે.
વહીવટીતંત્ર એલર્ટ મોડમાં
રાજ્ય સરકાર, જિલ્લા વહીવટીતંત્ર, પોલીસ, ફાયર બ્રિગેડ અને NDRFની ટીમો સંપૂર્ણ એલર્ટ પર છે. નીચાણવાળા વિસ્તારોમાં સતત પેટ્રોલિંગ કરવામાં આવી રહ્યું છે અને જરૂરી સ્થળોએ લોકોને સુરક્ષિત સ્થળે ખસેડવાની તૈયારી રાખવામાં આવી છે. હવામાન વિભાગે આગામી સાત દિવસ સુધી રાજ્યમાં વરસાદી માહોલ યથાવત રહેવાની આગાહી કરી હોવાથી નાગરિકોને સાવચેતી રાખવા, નદી-નાળા નજીક ન જવા અને વહીવટીતંત્રની સૂચનાઓનું પાલન કરવાની અપીલ કરવામાં આવી છે. હાલ દક્ષિણ ગુજરાતમાં વરસાદનું જોર યથાવત હોવાથી આગામી કલાકો રાજ્ય માટે મહત્વપૂર્ણ માનવામાં આવી રહ્યા છે.
