પ્રધાનમંત્રી નરેન્દ્ર મોદીની ઉપસ્થિતિમાં આજે વારાણસીના આકાશે ભારતીય વાયુસેના (IAF)ની લડાયક ક્ષમતાઓ, આધુનિકીકરણ અને તકનીકી પ્રગતિના દર્શન કરાવ્યા. ‘વિંગ્સ ઓવર ગંગા’ (Wings Over Ganga) કાર્યક્રમ દ્વારા, ભારતીય વાયુસેનાએ પોતાની સતત વિકસતી ક્ષમતાઓનું પ્રદર્શન કર્યું જેમાં માત્ર પરંપરાગત વાયુ શક્તિ જ નહીં પરંતુ આધુનિક યુદ્ધના બદલાતા પડકારોને પહોંચી વળવા માટે પોતાની ક્ષમતાઓને અનુકૂળ બનાવવાનો પણ સમાવેશ થાય છે. ગંગાના કિનારે આયોજિત આ કાર્યક્રમમાં વાયુસેનાના લડાયક વિમાનો, અત્યાધુનિક શસ્ત્રસરંજામ, પાયલોટોની અસાધારણ કુશળતા અને સશસ્ત્ર દળોની ત્રણેય પાંખો વચ્ચેના ઉત્તમ સમન્વયને રજૂ કરવામાં આવ્યા હતા. પ્રધાનમંત્રી રોડ શો દ્વારા વારાણસીના ‘નમો ઘાટ’ ખાતે પહોંચ્યા હતા.
રવિવારે પ્રધાનમંત્રી મોદીએ વારાણસીના નમો ઘાટ ખાતે એર શો નિહાળ્યો. આ કાર્યક્રમમાં કુલ ૧૦૦ વિમાનોએ ભાગ લીધો હતો, જેમાં રાફેલ અને સુખોઈ જેવા ૫૨ ફાઈટર જેટનો સમાવેશ થતો હતો. પ્રધાનમંત્રીની સાથે રક્ષા મંત્રી રાજનાથ સિંહ અને મુખ્યમંત્રી યોગી આદિત્યનાથ પણ ઉપસ્થિત રહ્યા હતા. પ્રદર્શન દરમિયાન એક રાફેલ ફાઈટર જેટે ખૂબ જ ઓછી ઊંચાઈએ હવામાં કરતબો બતાવ્યા જેમાં તીવ્ર ગતિએ નીચે આવવું અને ચુસ્ત વર્તુળાકાર દાવપેચનો સમાવેશ થતો હતો. તેવી જ રીતે સુખોઈ-૩૦ એમકેઆઈ (Sukhoi-30 MKI) વિમાને પણ ઓછી ઊંચાઈએ પ્રભાવશાળી હવાઈ કરતબો કર્યા, જ્યારે એક ચેતક હેલિકોપ્ટરે કાર્યક્રમ સ્થળ પર પુષ્પવર્ષા કરી.
એક સી-૧૭ ગ્લોબમાસ્ટર (C-17 Globemaster) વિમાન, જેની સાથે નવ ‘સૂર્ય કિરણ હોક’ (Surya Kiran Hawk) વિમાનો હતા તેણે મંચની ઉપરથી ફોર્મેશનમાં ઉડાન ભરી. ‘સૂર્ય કિરણ’ ટીમે આકાશમાં અદભૂત હવાઈ કરતબો રજૂ કર્યા. રાફેલ, સુખોઈ, જગુઆર, મિરાજ-૨૦૦૦, તેજસ અને મિગ-૨૯ વિમાનોએ મળીને ‘એરોહેડ’ રચનામાં ઉડાન ભરી. આ દ્રશ્ય ‘ઓપરેશન સિંદૂર’ની યાદ અપાવતું હતું. ભારતીય વાયુસેનાની ૯૪મી વર્ષગાંઠ નિમિત્તે આ એર શોનું આયોજન કરવામાં આવ્યું હતું, જેને ‘વિંગ્સ ઓવર ગંગા’ નામ આપવામાં આવ્યું હતું.
ગંગા નદી પર હવામાં યુદ્ધનું દ્રશ્ય
આ પ્રદર્શનમાં હવામાં લડાઈ (એરિયલ કોમ્બેટ) કેવી રીતે થાય છે તેનું એક કાલ્પનિક દ્રશ્ય પણ રજૂ કરવામાં આવ્યું હતું. બે જગુઆર વિમાનોએ માલવિયા બ્રિજ ઉપરથી ખૂબ જ ઝડપે હુમલાનો અભ્યાસ કર્યો જ્યારે એક સુખોઈ-૩૦ એમકેઆઈ (Sukhoi-30 MKI) વિમાને તેમને રોકવા માટે દાવપેચ (ઇન્ટરસેપ્શન મેન્યુવર) કર્યા. આ કવાયત દ્વારા દર્શાવવામાં આવ્યું કે હવામાં લડાઈ દરમિયાન ફાઈટર જેટ સંભવિત જોખમો સામે કેવી પ્રતિક્રિયા આપે છે અને વિવિધ વિમાનો વચ્ચેના સંકલન દ્વારા મિશન કેવી રીતે પાર પાડવામાં આવે છે.
૮,૦૦૦ ફૂટની ઊંચાઈએથી ઇન્ફ્રારેડ કેમેરા દ્વારા સુખોઈના દાવપેચ કેદ કરાયા
સુખોઈ-૩૦ એમકેઆઈ દ્વારા કરવામાં આવેલો હાઈ-સ્પીડ વર્ટિકલ દાવપેચ આ એર શોનું મુખ્ય આકર્ષણ રહ્યું હતું. એક સુખોઈ વિમાને પ્રેક્ષકોની ગેલેરી સામે આ દાવપેચ દર્શાવ્યો જ્યારે અન્ય એક સુખોઈ-૩૦ એમકેઆઈએ લગભગ ૮,૦૦૦ ફૂટની ઊંચાઈએથી ‘ઇન્ફ્રારેડ ઇમેજિંગ પોડ’નો ઉપયોગ કરીને સમગ્ર પ્રદર્શનને રેકોર્ડ કર્યું. આ પ્રદર્શને લડાયક વિમાનોની ઉડાન ક્ષમતાઓ અને આધુનિક સેન્સર તથા ઇમેજિંગ ટેક્નોલોજીની ભૂમિકા બંને બાબતોને ઉજાગર કરી.
આ પહેલા પ્રધાનમંત્રી મોદીએ રૂપપુરમાં ૧૦૦ કરોડ રૂપિયાના ખર્ચે તૈયાર થયેલી ‘અરવિંદ ટેક્સટાઈલ મિલ’નું ઉદ્ઘાટન કર્યું હતું. ત્યારબાદ નમો ઘાટ સુધી ૭ કિલોમીટર લાંબો રોડ શો યોજાયો હતો. પ્રધાનમંત્રી મોદી સવારે ૧૦:૦૦ વાગ્યે વારાણસી એરપોર્ટ પહોંચ્યા જ્યાં રાજ્યપાલ આનંદીબેન પટેલ, રક્ષામંત્રી રાજનાથ સિંહ અને મુખ્યમંત્રી યોગી આદિત્યનાથે તેમનું સ્વાગત કર્યું. ત્યારબાદ, પ્રધાનમંત્રીએ મિર્ઝા મુરાદમાં ખોચવા ગામ નજીક સ્થિત ‘અરવિંદ લિમિટેડ’ના નવા ટેક્સટાઇલ (વસ્ત્ર) ઉત્પાદન એકમનું ઉદ્ઘાટન કર્યું.
આશરે ₹૧૦૦ કરોડના ખર્ચે તૈયાર થયેલા આ એકમથી લગભગ ૧,૦૦૦ મહિલાઓને રોજગારી મળવાની અપેક્ષા છે. અહીં સ્પોર્ટસવેર અને અન્ડરગાર્મેન્ટ્સનું ઉત્પાદન કરવામાં આવશે. આ સુવિધામાં ૩૦૦ મશીનો લગાવવામાં આવ્યા છે અને હાલમાં લગભગ ૩૦૦ મહિલાઓ તાલીમ લઈ રહી છે. અરવિંદ ગ્રુપની સ્થાપના ૧૯૩૧માં ગુજરાતના અમદાવાદમાં થઈ હતી. આ ગ્રુપ ડેનિમ, સુતરાઉ અને લિનન કાપડ, સૂટ માટેનું કાપડ, સ્પોર્ટસવેર તેમજ ઔદ્યોગિક ઉપયોગ માટેના વિશિષ્ટ કાપડના ઉત્પાદન અને વેપાર માટે જાણીતું છે.
