સુરત રેલવે સ્ટેશનની ઓળખ સમાન 74 વર્ષ જૂની ઐતિહાસિક ઇમારત હવે ભૂતકાળ બની જશે. વર્ષ 1952માં બનીને તૈયાર થયેલી આ ઇમારતને ડિસેમ્બરના બીજા અઠવાડિયામાં તોડી પાડવાની તૈયારી કરવામાં આવી રહી છે. સુરત રેલવે સ્ટેશનના આધુનિકીકરણ અને મલ્ટીમોડલ ટ્રાન્સપોર્ટ હબ (MMTH) પ્રોજેક્ટના ફેઝ-2 હેઠળ આ કામગીરી હાથ ધરવામાં આવશે. જૂની ઇમારતની જગ્યાએ બે નવા પ્લેટફોર્મ બનાવવામાં આવશે, જ્યારે હાલના પ્લેટફોર્મ નંબર-1 પર કોન્કોર્સ લેવલના ફાઉન્ડેશનનું કામ શરૂ કરાશે. સુરત રેલવે સ્ટેશનના આધુનિકીકરણ બાદ પણ તેની એક વિશેષ ઓળખ જળવાઈ રહેશે. નવા માળખામાં પણ રેલવે ટ્રેક અને પ્લેટફોર્મ પ્રથમ માળે જ રાખવામાં આવશે. આ ઉપરાંત, નવા આઇલેન્ડ પ્લેટફોર્મનું નિર્માણ પણ પ્રથમ માળે કરવામાં આવશે. આ વ્યવસ્થાને કારણે ટ્રેક અને પ્લેટફોર્મ પ્રથમ માળે ધરાવતા દેશના એકમાત્ર રેલવે સ્ટેશન તરીકે સુરતની ઓળખ જાળવી રાખવાની યોજના છે.
MMTH પ્રોજેક્ટના ફેઝ-2ની કામગીરી દરમિયાન હાલના પ્લેટફોર્મ નંબર-1ને અસ્થાયી રીતે બંધ રાખવામાં આવશે. તેના કારણે ટ્રેનોના સંચાલન અને પ્લેટફોર્મની ફાળવણીમાં ફેરફાર કરવામાં આવશે. મળતી માહિતી મુજબ, અંદાજે 150 ટ્રેનોના પ્લેટફોર્મ બદલવાની યોજના છે, જ્યારે ચાર ટ્રેનોને ઉધના રેલવે સ્ટેશન પર ખસેડવામાં આવશે. આ ફેરફારોને કારણે મુસાફરોએ મુસાફરી પહેલાં પોતાની ટ્રેનનું પ્લેટફોર્મ અને સ્ટેશન સંબંધિત સૂચનાઓ તપાસવી જરૂરી બનશે. જૂની ઇમારત તોડી પાડવાની કામગીરી સાથે મુખ્ય ભવનમાં આવેલી ટિકિટ બુકિંગ ઓફિસ અને અન્ય વહીવટી કચેરીઓને પણ નવા સ્થળે ખસેડવામાં આવશે.
મુસાફરોને ટિકિટ મેળવવામાં કે સ્ટેશન સુધી પહોંચવામાં મુશ્કેલી ન પડે તે માટે પ્લેટફોર્મ નંબર-4ની બહાર આવેલા MMTH ભવનમાં વૈકલ્પિક વ્યવસ્થા ઊભી કરવામાં આવશે. આ વ્યવસ્થાથી બાંધકામ દરમિયાન પણ મુસાફરોને જરૂરી સુવિધાઓ ઉપલબ્ધ કરાવવાનો પ્રયાસ કરવામાં આવશે. વર્ષોથી સુરત રેલવે સ્ટેશનની ઓળખ બની રહેલી ઐતિહાસિક ઇમારતને તોડી પાડવાની તૈયારી સાથે સ્ટેશનના આધુનિકીકરણના નવા તબક્કાની શરૂઆત થશે. જૂના માળખાની જગ્યાએ નવા પ્લેટફોર્મ અને આધુનિક સુવિધાઓ વિકસાવવામાં આવશે. જોકે, આ પરિવર્તન દરમિયાન ટ્રેનોના પ્લેટફોર્મમાં ફેરફાર અને ટિકિટ બુકિંગની વૈકલ્પિક વ્યવસ્થા અંગે મુસાફરોએ ખાસ ધ્યાન આપવું પડશે.
