અમેરિકન સૈન્યએ ફરી એકવાર ઈરાન પર બોમ્બમારો કર્યો છે. ઈરાને આરોપ લગાવ્યો છે કે અમેરિકાએ હાલના યુદ્ધવિરામનું ઉલ્લંઘન કરીને આ કાર્યવાહી કરી છે. ખાસ કરીને અમેરિકી દળોએ ઓમાનના અખાતમાં ઈરાની તેલ ટેન્કરોને નિશાન બનાવ્યા. તેના જવાબમાં ઈરાને કડક ચેતવણી આપી છે, કોઈપણ ખચકાટ વિના જોરદાર બદલો લેવાની પ્રતિજ્ઞા લીધી છે.
ઈરાનના સરકારી મીડિયા આઉટલેટ પ્રેસ ટીવી અનુસાર ખાતમ અલ-અંબિયા સેન્ટ્રલ હેડક્વાર્ટરના પ્રવક્તાએ જણાવ્યું હતું કે અમેરિકી દળોએ જાસ્ક નજીક ઈરાની પ્રાદેશિક પાણીથી હોર્મુઝ સ્ટ્રેટ તરફ જતા એક તેલ ટેન્કરને નિશાન બનાવ્યું હતું. રાષ્ટ્રપતિ ડોનાલ્ડ ટ્રમ્પે ઈરાનને ચેતવણી આપી હતી કે જો તેહરાન કોઈ સોદો નહીં કરે તો અમેરિકા વધુ હુમલા કરશે. સોશિયલ મીડિયા પોસ્ટમાં ટ્રમ્પે ભારપૂર્વક જણાવ્યું હતું કે ઈરાને અમેરિકી યુદ્ધ જહાજો પર હુમલો કર્યો છે.
આ પછી બંને રાષ્ટ્રો વચ્ચે ગોળીબાર થયો, જે દરમિયાન અમે તેમને ભારે નુકસાન પહોંચાડ્યું અને તેમના ઘણા નાના જહાજો ડૂબાડી દીધા. અમે તેમને પરમાણુ શસ્ત્રો રાખવાનો અધિકાર આપીશું નહીં અને તેઓ આ શરત માટે સંમત થયા છે.
દરમિયાન ઇન્ટરનેશનલ મેરીટાઇમ ઓર્ગેનાઇઝેશન (IMO) યુએનની મેરીટાઇમ એજન્સીના સેક્રેટરી જનરલ આર્સેનિયો ડોમિંગુએઝે જણાવ્યું હતું કે હોર્મુઝ સ્ટ્રેટમાં કટોકટીને કારણે આશરે 1,500 જહાજો ગલ્ફ ક્ષેત્રમાં ફસાયેલા છે. આ જહાજો સાથે અંદાજે 20,000 ખલાસીઓ પણ હાલમાં ફસાયેલા છે.
ધ ન્યૂ યોર્ક ટાઇમ્સ ના અહેવાલ મુજબ યુએસ અને ઈરાન હાલમાં 30 દિવસના સમયગાળા માટે દુશ્મનાવટ બંધ કરવા અને હોર્મુઝ સ્ટ્રેટને ફરીથી ખોલવાના પ્રસ્તાવ પર ચર્ચા કરી રહ્યા છે. આ વચગાળાના સમયગાળા દરમિયાન કાયમી કરાર અંગે વાટાઘાટો ચાલુ રહેશે. રાષ્ટ્રપતિ ડોનાલ્ડ ટ્રમ્પે જણાવ્યું હતું કે હોર્મુઝ સ્ટ્રેટમાંથી પસાર થતા યુએસ યુદ્ધ જહાજો મિસાઇલ અને ડ્રોન હુમલાઓનો ભોગ બન્યા હતા. જોકે યુએસ દળોએ સફળતાપૂર્વક આ પ્રોજેક્ટાઇલ્સ અટકાવી અને તોડી પાડ્યા, ત્યારબાદ “ઈરાની નાની બોટોનો નાશ કર્યો.”
અલગથી યુએસએ ઈરાન સાથે જોડાયેલા નેટવર્ક્સ પર નવા પ્રતિબંધો લાદ્યા છે. આ પ્રતિબંધો વ્યક્તિઓ અને સંસ્થાઓને લક્ષ્ય બનાવે છે, જેમાં ઇરાકના નાયબ તેલ પ્રધાન, અલી મારિજ અલ-બહદલી, તેમજ ઘણી કંપનીઓનો સમાવેશ થાય છે. યુએસનો આરોપ છે કે આ વ્યક્તિઓ અને સંસ્થાઓ તેલ સંબંધિત વેપાર પ્રવૃત્તિઓ દ્વારા ઈરાન અને તેના પ્રોક્સી જૂથોને ટેકો પૂરો પાડી રહી હતી.
