સોના અને ચાંદીના ભાવમાં છેલ્લા કેટલાક દિવસોથી સતત ઉથલપાથલ જોવા મળી રહી છે, પરંતુ હવે અચાનક આવેલા ઘટાડાએ રોકાણકારોને ચોંકાવી દીધા છે. આંતરરાષ્ટ્રીય બજારમાં કિંમતી ધાતુઓમાં ભારે વેચવાલી જોવા મળતાં સ્થાનિક બજારોમાં પણ તેની સીધી અસર પડી છે. અમેરિકામાં જાહેર થયેલા મજબૂત રોજગાર આંકડાઓ બાદ વૈશ્વિક રોકાણકારોનો મૂડ બદલાઈ ગયો અને સોના-ચાંદીમાં નફાવસૂલીનો માહોલ સર્જાયો.
નિષ્ણાતોના જણાવ્યા અનુસાર, અમેરિકામાં અપેક્ષા કરતાં વધુ નોકરીઓ સર્જાતા ત્યાંની અર્થવ્યવસ્થા મજબૂત હોવાનું ચિત્ર સામે આવ્યું છે. તેના કારણે હવે અમેરિકાની કેન્દ્રીય બેંક દ્વારા વ્યાજદર ઘટાડવાની સંભાવના ઓછી માનવામાં આવી રહી છે. વ્યાજદર ઊંચા રહેવાની શક્યતા વધતા રોકાણકારોએ સોના અને ચાંદીમાંથી નાણાં કાઢીને અન્ય રોકાણ તરફ વળવાનું શરૂ કર્યું છે. સોનાને સામાન્ય રીતે સુરક્ષિત રોકાણ માનવામાં આવે છે, પરંતુ જ્યારે વ્યાજદર વધવાની આશંકા મજબૂત બને છે ત્યારે સોનાની ચમક થોડી ફીકી પડી જાય છે. કારણ કે સોનાથી સીધો વ્યાજ મળતો નથી, જ્યારે બોન્ડ અને અન્ય સાધનો વધુ આકર્ષક બની જાય છે. આ જ કારણસર વૈશ્વિક બજારમાં સોનાના ભાવમાં નોંધપાત્ર ઘટાડો નોંધાયો છે.
ચાંદીના બજારમાં તો વધુ મોટો ઝટકો જોવા મળ્યો છે. ઔદ્યોગિક ઉપયોગ સાથે જોડાયેલી ચાંદીમાં રોકાણકારોએ ઝડપથી વેચવાલી કરતા ભાવમાં ભારે નરમાઈ આવી છે.આંતરરાષ્ટ્રીય સ્તરે ચાંદીના ભાવમાં મોટો ઘટાડો નોંધાતા સ્થાનિક વેપારીઓ અને રોકાણકારોમાં પણ ચિંતા વધી છે. બજારના જાણકારો માને છે કે હાલ સોના-ચાંદીમાં અસ્થિરતા ચાલુ રહી શકે છે. આગામી દિવસોમાં અમેરિકાની ફેડરલ રિઝર્વની નીતિ, મોંઘવારીના આંકડા અને વૈશ્વિક રાજકીય પરિસ્થિતિ કિંમતી ધાતુઓની દિશા નક્કી કરશે. જો વ્યાજદર અંગે કડક સંકેતો મળશે તો સોના અને ચાંદી પર વધુ દબાણ આવી શકે છે
જોકે લાંબા ગાળાના રોકાણકારો માટે નિષ્ણાતો હજુ પણ ધીરજ રાખવાની સલાહ આપી રહ્યા છે. ટૂંકા ગાળાના ઘટાડા છતાં સોનું અને ચાંદી સુરક્ષિત સંપત્તિ તરીકે પોતાની મહત્વની ભૂમિકા જાળવી રાખે છે. હાલમાં રોકાણકારો માટે સૌથી મોટો પ્રશ્ન એ છે કે આ ઘટાડો અસ્થાયી છે કે પછી કિંમતી ધાતુઓમાં વધુ નરમાઈ હજુ બાકી છે. બજારની આગામી ચાલ પર સૌની નજર ટકેલી છે.
