દિલ્હી-NCRથી પહાડો સુધી ભારે વરસાદનું એલર્ટ, 18 સપ્ટેમ્બર સુધી રહેશે અસર
સપ્ટેમ્બર મધ્યમાં પહોંચતા સામાન્ય રીતે ચોમાસું પરત ફરવાની શરૂઆત કરે છે, પરંતુ આ વખતે ઉત્તર ભારતમાં ફરી વરસાદી સિસ્ટમ સક્રિય થઈ છે. હવામાન વિભાગે દિલ્હી-NCR સહિત ચંડીગઢ, પંજાબ, હરિયાણા, જમ્મુ-કાશ્મીર, હિમાચલ પ્રદેશ અને ઉત્તરાખંડમાં 15થી 18 સપ્ટેમ્બર દરમિયાન ભારે વરસાદની ચેતવણી આપી છે. અનેક વિસ્તારોમાં ગાજવીજ, વીજળીના કડાકા અને તેજ પવન સાથે વરસાદ પડવાની શક્યતા છે.
ભારતીય હવામાન વિભાગ એટલે કે IMDના તાજા અનુમાન પ્રમાણે ઉત્તર ભારતમાં ચોમાસાની સક્રિયતા ફરી વધી રહી છે. પાકિસ્તાન-અફઘાનિસ્તાન વિસ્તારમાં બનેલા પશ્ચિમી વિક્ષોભ ઉપરાંત અરબી સમુદ્ર અને બંગાળની ખાડી તરફથી આવતી ભેજવાળી હવાઓના કારણે વરસાદી સિસ્ટમને વધુ બળ મળ્યું છે. પરિણામે આગામી દિવસોમાં ઉત્તર ભારતના અનેક રાજ્યોમાં વરસાદનો નવો રાઉન્ડ જોવા મળી શકે છે.દિલ્હી-NCR માટે પણ હવામાન ફરી પલટી શકે છે.
છેલ્લા કેટલાક દિવસોથી ક્યારેક તડકો તો ક્યારેક અચાનક વરસાદ જેવી સ્થિતિ જોવા મળી રહી છે. 15 સપ્ટેમ્બરે દિલ્હીમાં આકાશ વાદળછાયું રહેવાની સાથે કેટલાક વિસ્તારોમાં હળવો વરસાદ પડી શકે છે. ત્યારબાદ 16 અને 17 સપ્ટેમ્બરે વરસાદની ગતિવિધિ વધુ સક્રિય થવાની શક્યતા છે. દિલ્હી, હરિયાણા, ચંડીગઢ અને પંજાબમાં વ્યાપક વરસાદ પડી શકે છે અને કેટલાક વિસ્તારોમાં ભારે વરસાદની પણ શક્યતા છે. આ સ્થિતિને કારણે શહેરોમાં પાણી ભરાવા અને ટ્રાફિક પર અસર થવાની આશંકા છે.
પહાડી વિસ્તારો માટે ચિંતા વધુ છે. જમ્મુ-કાશ્મીર અને લદ્દાખમાં 15થી 17 સપ્ટેમ્બર દરમિયાન વરસાદ અને ગાજવીજની શક્યતા છે. હિમાચલ પ્રદેશ અને ઉત્તરાખંડમાં પણ કેટલાક વિસ્તારોમાં ભારે વરસાદ પડી શકે છે. પહાડોમાં અચાનક ભારે વરસાદથી નદી-નાળાના જળસ્તરમાં વધારો, ભૂસ્ખલન, પથ્થરો પડવા અને રસ્તાઓ બંધ થવાનું જોખમ વધી શકે છે. તેથી પ્રવાસીઓ અને સ્થાનિક લોકોને ખાસ સાવચેતી રાખવાની સલાહ આપવામાં આવી રહી છે. આ વરસાદની અસર માત્ર શહેરો અને પહાડી વિસ્તારો સુધી મર્યાદિત નહીં રહે. પંજાબ અને હરિયાણામાં આ સમયે ખેતરોમાં વિવિધ પાક ઉભા છે, તેથી ભારે વરસાદ અને પાણી ભરાવાથી ખેતીને નુકસાન થઈ શકે છે.
બીજી તરફ દિલ્હી-NCR જેવા ગીચ વસ્તીવાળા શહેરોમાં નીચાણવાળા વિસ્તારોમાં પાણી ભરાવાની સમસ્યા સર્જાઈ શકે છે. ભારે પવનને કારણે વૃક્ષો પડવા, વીજતાર તૂટવા અને વીજળી સંબંધિત સમસ્યાઓનું જોખમ પણ રહે છે.હવામાન વિભાગના અનુમાન પ્રમાણે આ વરસાદ ચોમાસાના અંતિમ સક્રિય તબક્કાનો ભાગ હોઈ શકે છે. લગભગ 19 સપ્ટેમ્બરથી પશ્ચિમ રાજસ્થાનના કેટલાક વિસ્તારોમાંથી ચોમાસું પરત ફરવાની પ્રક્રિયા શરૂ થઈ શકે છે. એટલે 16થી 18 સપ્ટેમ્બર વચ્ચે થનારો વરસાદ આ ચોમાસાની છેલ્લી મોટી વરસાદી ગતિવિધિઓમાંનો એક બની શકે છે. ત્યારબાદ ધીમે ધીમે હવામાન સાફ થવા અને તાપમાનમાં વધારો થવાની શક્યતા છે.
આ દરમિયાન લોકોને અનાવશ્યક મુસાફરી ટાળવા, ખાસ કરીને પહાડી વિસ્તારોમાં જતા પહેલાં હવામાનની સ્થિતિ તપાસવા અને સ્થાનિક પ્રશાસનની સૂચનાઓનું પાલન કરવાની સલાહ છે. ભારે વરસાદ દરમિયાન ખુલ્લા વિસ્તારમાં જવાનું ટાળવું, વીજળીના ઉપકરણોનો સાવચેતીપૂર્વક ઉપયોગ કરવો અને ઘરની આસપાસ પાણી ભરાઈ ન રહે તેની તકેદારી રાખવી જરૂરી છે.ઉત્તર ભારતમાં ચોમાસું હજુ સંપૂર્ણપણે વિદાય લેવાના મૂડમાં નથી. દિલ્હી-NCRથી લઈને હિમાચલ, ઉત્તરાખંડ અને જમ્મુ-કાશ્મીર સુધી આગામી ત્રણ-ચાર દિવસ હવામાન પર નજર રાખવી જરૂરી રહેશે.
