થલપતિ વિજયની બહુચર્ચિત ફિલ્મ ‘જના નાયકન’ બોક્સ ઓફિસ પર મજબૂત પ્રદર્શન કરી રહી છે. રિલીઝના માત્ર 3 દિવસમાં જ ફિલ્મે વિશ્વભરમાં ₹171.84 કરોડનું ગ્રોસ કલેક્શન નોંધાવ્યું છે અને હવે ફિલ્મ ₹200 કરોડના આંકડાની નજીક પહોંચી ગઈ છે. ભારતમાં પણ ફિલ્મે 3 દિવસમાં ₹100 કરોડથી વધુનું ગ્રોસ કલેક્શન કરીને પોતાની મજબૂત પકડ જાળવી રાખી છે. ખાસ વાત એ છે કે રિલીઝના બીજા જ દિવસે ફિલ્મે વિશ્વભરમાં ₹100 કરોડનો આંકડો પાર કરી લીધો હતો.
ભારત અને વિદેશમાં ફિલ્મને મળ્યો જોરદાર પ્રતિસાદ
ટ્રેડ વેબસાઇટ Sacnilkના અહેવાલ મુજબ, ફિલ્મે અત્યાર સુધી વિદેશી બજારોમાંથી ₹63.50 કરોડનું ગ્રોસ કલેક્શન કર્યું છે. જ્યારે ત્રીજા દિવસે ભારતમાં ₹28.50 કરોડનું નેટ કલેક્શન નોંધાયું હતું. તે જ દિવસે વિદેશમાંથી પણ અંદાજે ₹20 કરોડની કમાણી થઈ હતી.
3 દિવસ બાદ ભારતમાં ફિલ્મનું કુલ ગ્રોસ કલેક્શન ₹108.34 કરોડ સુધી પહોંચી ગયું છે, જ્યારે નેટ કલેક્શન ₹92.35 કરોડ નોંધાયું છે. વિશ્વભરના કલેક્શનને જોતા ફિલ્મ સતત નવા રેકોર્ડ તરફ આગળ વધી રહી છે.
3 દિવસનું બોક્સ ઓફિસ પ્રદર્શન કેવું રહ્યું?
ફિલ્મે પ્રથમ દિવસે એટલે કે ગુરુવારે 13,067 શો સાથે ₹42.70 કરોડનું નેટ કલેક્શન કર્યું હતું. તે દિવસે કુલ ઓક્યુપન્સી 41.6 ટકા રહી હતી.
બીજા દિવસે શુક્રવારે કમાણીમાં થોડો ઘટાડો નોંધાયો અને ફિલ્મે ₹21.15 કરોડનું નેટ કલેક્શન કર્યું હતું. આ દિવસે 12,190 શો યોજાયા હતા અને ઓક્યુપન્સી 29.5 ટકા રહી હતી.
ત્રીજા દિવસે શનિવારે ફિલ્મે ફરી ગતિ પકડી હતી. 12,299 શો સાથે ફિલ્મે ₹28.50 કરોડનું નેટ કલેક્શન કર્યું અને ઓક્યુપન્સી વધીને 38.7 ટકા થઈ ગઈ હતી.
‘લિયો‘ અને ‘GOAT’ સામે શરૂઆત રહી થોડી પાછળ
જોકે ‘જના નાયકન’ બોક્સ ઓફિસ પર મજબૂત કમાણી કરી રહી છે, છતાં વિજયની અગાઉની બ્લોકબસ્ટર ફિલ્મો ‘લિયો’ અને ‘ધ ગ્રેટેસ્ટ ઑફ ઑલ ટાઈમ (GOAT)’ની સરખામણીએ તેની શરૂઆત થોડી નબળી રહી છે.
3 દિવસ બાદ ‘જના નાયકન’નું કુલ નેટ કલેક્શન ₹92.35 કરોડ રહ્યું છે. તેની સરખામણીએ ‘લિયો’એ ₹138.35 કરોડ અને ‘GOAT’એ ₹103.70 કરોડનું નેટ કલેક્શન કર્યું હતું.
રાજકારણ પહેલાં વિજયની છેલ્લી થિયેટર રિલીઝ
એચ. વિનોથના નિર્દેશનમાં બનેલી ‘જના નાયકન’ને થલપતિ વિજયની રાજકારણમાં સંપૂર્ણ રીતે સક્રિય બનતા પહેલાંની છેલ્લી થિયેટર રિલીઝ તરીકે જોવામાં આવી રહી છે. ફિલ્મમાં વિજય પૂર્વ પોલીસ અધિકારી વેટ્રી કોન્ડનની ભૂમિકામાં જોવા મળે છે, જે પોતાની દત્તક દીકરી વિજીને સૈનિક બનવા માટે તૈયાર કરે છે. ફિલ્મમાં બોબી દેઓલે જ્હોન હિમલર નામના મુખ્ય વિલનની ભૂમિકા ભજવી છે, જ્યારે મમિતા બૈજુ પણ મહત્વપૂર્ણ પાત્રમાં જોવા મળે છે.
ફિલ્મના આગામી દિવસોના બોક્સ ઓફિસ પ્રદર્શન પર હવે ટ્રેડ વિશ્લેષકોની ખાસ નજર છે. જો સપ્તાહાંત દરમિયાન દર્શકોનો પ્રતિસાદ યથાવત રહેશે તો ‘જના નાયકન’ ટૂંક સમયમાં વિશ્વભરમાં ₹200 કરોડનો આંકડો પાર કરી શકે છે.
