મુંબઈ: અલ્લુ અર્જુનની મોસ્ટ અવેટેડ ફિલ્મ (Film) ‘પુષ્પાઃ ધ રૂલ’ની (Pushpa) લોકો આતુરતાથી રાહ જોઈ રહ્યા છે. ચાહકોની આતુરતા જોઈને નિર્માતાઓએ ફિલ્મના સેટ પરથી પુષ્પા 2 ની પહેલી ઝલક શેર કરી છે. ફિલ્મના ઓફિશિયલ ટ્વિટર હેન્ડલ પર સેટનો ફોટો શેર કરતા જણાવવામાં આવ્યું છે કે શૂટિંગ (Shooting) ઝડપથી ચાલી રહ્યું છે.
આ ટ્વીટ પર ફિલ્મની અભિનેત્રી રશ્મિકા મંડન્નાની પ્રતિક્રિયા પણ આવી છે. આ પોસ્ટને રીટ્વીટ કરીને તેણે લખ્યું, ‘આને જુઓ.. આ શરૂઆત છે.’ આ સાથે તેણે ફાયર ઈમોજી પણ શેર કર્યું છે. આ તસવીર ફિલ્મના સેટની છે. ફોટોમાં ફિલ્મના નિર્દેશક સુકુમાર નજરે પડે છે. તે સેટ પર એક સીન વિશે કંઈક સમજાવતા જોવા મળે છે. તે જ સમયે, તેમની આસપાસ કેમેરા અને લાઇટ્સ પણ જોઈ શકાય છે. જણાવી દઈએ કે પુષ્પા ધ રાઈઝ પછી તેના બીજા ભાગને લઈને જબરદસ્ત હાઈપ થઈ રહી છે. ખાસ કરીને લોકો રશ્મિકા અને અલ્લુ અર્જુનને જોવા માટે તેમજ અગાઉના પાર્ટમાં શું હશે તે જાણવા માટે આતુર છે.
આ જ કારણ છે કે અલ્લુ અર્જુન અને રશ્મિકા મંડન્નાના ચાહકો ફિલ્મ સંબંધિત કોઈપણ અપડેટથી વધુ ઉત્સાહિત થાય છે. હાલમાં જ આ ફિલ્મનું શૂટિંગ શરૂ થયું છે. મળતી માહિતી મુજબ થોડા દિવસ પહેલા આ ફિલ્મ વિશે એક રિપોર્ટ સામે આવ્યો હતો જેમાં દાવો કરવામાં આવ્યો હતો કે અર્જુન કપૂર પોલીસના રોલમાં જોવા મળશે. જોકે, બાદમાં ફિલ્મના નિર્માતાઓએ આ દાવાને નકારી કાઢ્યો હતો. નોંધનીય છે કે વર્ષ 2021માં રીલિઝ થયેલી પુષ્પાએ સાઉથની સાથે હિન્દી બેલ્ટને પણ હચમચાવી નાખ્યું હતું. આ ફિલ્મે હિન્દી ભાષામાં 100 કરોડનો બિઝનેસ કર્યો હતો. અલ્લુ અર્જુન આ ફિલ્મથી સમગ્ર ભારતનો સ્ટાર બની ગયો છે.
