મહિલા T20 વર્લ્ડ કપ ચાલી રહ્યો છે. ભારતીય મહિલા ટીમ 12 જૂનથી 5 જુલાઈ દરમિયાન યોજાનાર 2026 મહિલા T20 વર્લ્ડ કપ જીતીને ઇતિહાસ રચવાનું લક્ષ્ય રાખશે. ટીમ ઈન્ડિયા ટુર્નામેન્ટની તેની શરૂઆતની મેચ 14 જૂને બર્મિંગહામમાં પાકિસ્તાન સામે રમશે. ચાહકો આ હાઇ-વોલ્ટેજ ટક્કરની આતુરતાથી રાહ જોઈ રહ્યા છે.
ભારત વિરુદ્ધ પાકિસ્તાન મેચ ક્યારે શરૂ થશે?
ભારત અને પાકિસ્તાન વચ્ચેની મેચ 14 જૂને બર્મિંગહામના એજબેસ્ટન સ્ટેડિયમ ખાતે રમાશે. તે સાંજે 7:00 વાગ્યે (ભારતીય સમય) શરૂ થવાનું છે. બંને ટીમોના કેપ્ટન મેચ શરૂ થવાના અડધા કલાક પહેલા ટોસ માટે મેદાનમાં ઉતરશે. આ વર્લ્ડ કપમાં ભારતીય મહિલા ટીમનું નેતૃત્વ હરમનપ્રીત કૌર કરી રહી છે, જ્યારે પાકિસ્તાન ટીમ ફાતિમા સનાની કેપ્ટનશીપમાં રમશે. ટીમ ઈન્ડિયા પાકિસ્તાનને હરાવીને વિજય સાથે ટુર્નામેન્ટની શરૂઆત કરવાનો પ્રયાસ કરશે.
ભારત અને પાકિસ્તાન મહિલા ટીમો વચ્ચેની મેચ સ્ટાર સ્પોર્ટ્સ 1, સ્ટાર સ્પોર્ટ્સ 1 HD, સ્ટાર સ્પોર્ટ્સ 2, સ્ટાર સ્પોર્ટ્સ 2 HD, સ્ટાર સ્પોર્ટ્સ 3 અને સ્ટાર સ્પોર્ટ્સ 3 HD સહિત ટીવી ચેનલો પર પ્રસારિત કરવામાં આવશે. મેચનું લાઈવ સ્ટ્રીમિંગ JioHotstar એપ પર ઉપલબ્ધ હશે.
મહિલા T20 વર્લ્ડ કપ 2009 માં શરૂ થયો હતો. આ ટુર્નામેન્ટ અત્યાર સુધીમાં નવ વખત યોજાઈ છે, જેમાં ભારત અને પાકિસ્તાન આઠ વખત સામસામે છે. ટીમ ઈન્ડિયા આમાંથી છ મુકાબલામાં વિજયી બની છે જ્યારે પાકિસ્તાન ફક્ત બે મેચ જીતી શક્યું છે. 2024 T20 વર્લ્ડ કપ દરમિયાન ભારત અને પાકિસ્તાન વચ્ચેની મેચમાં ટીમ ઈન્ડિયાએ પાકિસ્તાનને છ વિકેટથી હરાવ્યું હતું. હેડ-ટુ-હેડ રેકોર્ડમાં ટીમ ઇન્ડિયાનો હાથ ઉપર હોય તેવું લાગે છે.
