તામિલનાડુમાં સરકાર રચનાને લગતો રાજકીય સસ્પેન્સ આખરે સમાપ્ત થઈ ગયો છે. ટીવીકે ચીફ અને અભિનેતા વિજય મુખ્યમંત્રી બનશે. રાજ્યપાલ રાજેન્દ્ર વિશ્વનાથ આર્લેકરે વિજયને સરકાર બનાવવાની મંજૂરી આપી છે. વિજય કાલે મુખ્યમંત્રી પદના શપથ લેશે.
શુક્રવાર (8 મે, 2026) ટીવીકે ચીફ વિજયે તમિલનાડુના રાજ્યપાલ રાજેન્દ્ર આર્લેકર સાથે મુલાકાત કરી અને સરકાર બનાવવાનો દાવો રજૂ કર્યો. 234 વિધાનસભા બેઠકો ધરાવતા તમિલનાડુમાં બહુમતી મેળવવા અને સરકાર બનાવવા માટે જરૂરી “જાદુઈ આંકડો” 118 છે. મળતી માહિતી અનુસાર વિજય 9 મેના રોજ સવારે 11:00 વાગ્યે જવાહરલાલ નેહરુ ઇન્ડોર સ્ટેડિયમ ખાતે મુખ્યમંત્રી તરીકે શપથ લેશે.
શુક્રવારે સતત ત્રીજા દિવસે વિજયે લોકભવનમાં રાજ્યપાલ સાથે મુલાકાત કરીને સરકાર બનાવવાનો દાવો ઔપચારિક રીતે રજૂ કર્યો. તેમણે રાજ્યપાલને સમર્થન પત્રો સુપરત કર્યા, જેમાં TVK, કોંગ્રેસ, CPI, CPI(M) અને VCK પક્ષોના કુલ 118 ધારાસભ્યોનું પ્રતિનિધિત્વ હતું.
તમિલનાડુ વિધાનસભા ચૂંટણીમાં TVK એ 234 બેઠકોમાંથી 108 બેઠકો જીતી હતી. આમાંથી વિજયે પોતે બે બેઠકો જીતી હતી. તેમને તેમાંથી એક ખાલી કરવાની જરૂર પડશે. પરિણામે TVK ના અસરકારક ધારાસભ્યોની સંખ્યા 107 છે. કોંગ્રેસના 5 ધારાસભ્યો અને CPI, CPI(M) અને VCK ના 2-2 ધારાસભ્યોના સમર્થન સાથે TVK સફળતાપૂર્વક બહુમતી આંકડો સુધી પહોંચી ગયું છે.
ચૂંટણી પંચના નિયમો અનુસાર પાર્ટીના સ્થાપક વિજયે જીતેલી બે બેઠકોમાંથી એક ખાલી કરવી પડશે. વિજયે ચેન્નાઈની પેરામ્બુર બેઠક અથવા તિરુચિરાપલ્લી પૂર્વ બેઠક છોડી દેવી પડશે. આ પહેલા વિજયે 6 અને 7 મેના રોજ પણ સરકાર બનાવવાનો દાવો રજૂ કર્યો હતો. જોકે રાજ્યપાલે જણાવ્યું હતું કે તેઓ 118 ધારાસભ્યોના સમર્થન વિના સરકાર બનાવવાનું આમંત્રણ આપી શકતા નથી.
ડાબેરી પક્ષો ટીવીકે કેબિનેટનો ભાગ નહીં હોય
તમિલનાડુમાં ડીએમકેના નેતૃત્વ હેઠળના ગઠબંધનનો ભાગ રહેલા બે ડાબેરી પક્ષો- સીપીઆઈ અને સીપીઆઈ(એમ) – એ જણાવ્યું છે કે ટેકો આપવાનો તેમનો નિર્ણય ખાસ કરીને ભાજપને રાજ્યમાં “પાછળના બારણે પ્રવેશ” મેળવવાથી રોકવા માટે લેવામાં આવ્યો હતો. જોકે રાજ્યના અધિકારોને લગતા મુદ્દાઓ અંગે તેમણે (ડાબેરી પક્ષો) એ ખાતરી આપી હતી કે તેઓ ડીએમકે સાથે ઉભા રહેશે. ડાબેરી પક્ષોએ જાહેરાત કરી છે કે તેઓ ટીવીકે કેબિનેટનો ભાગ રહેશે નહીં. સીપીઆઈ અને સીપીઆઈ(એમ) બંને પાસે હાલમાં બે-બે ધારાસભ્યો છે. દિવસભરની ચર્ચાઓ પછી તેમણે અભિનેતામાંથી રાજકારણી બનેલા વિજયના નેતૃત્વ હેઠળના પક્ષને ટેકો આપવાનો નિર્ણય જાહેર કર્યો. કોંગ્રેસ તેના પાંચ ધારાસભ્યો સાથે ટીવીકેને ટેકો આપી ચૂકી છે.
