કેટરિનાની હિન્દી ભાષા સારી થઇ ગઇ છે? એવો પ્રશ્ન થવાનું કારણ એ છે કે 4 નવેમ્બરે રજૂ થનારી ‘ફોન ભૂત’ ના ટ્રેલરના અંતમાં કેટરિના બીજી અભિનેત્રીને પૂછે છે કે તારી હિન્દી નબળી છે?! કેટરિના ફિલ્મમાં પહેલી વખત સહજ રીતે હિન્દી બોલતી દેખાતી હોવાથી એમ માની શકાય કે તેણે હિન્દી બોલવા માટે મહેનત કરી હશે. હોરર – કોમેડી ફિલ્મ ‘ફોન ભૂત’ માં ઇશાન ખટ્ટર અને સિધ્ધાર્થ ચતુર્વેદી જેવા નવા હીરો હોવાથી એને કેટરિના કૈફ- કૌશલની ફિલ્મ તરીકે વધુ ઓળખવામાં આવી રહી છે. ફિલ્મના ટ્રેલરમાં કેટરિના જ છવાયેલી છે.
તે પોતાની હાજરીથી ખુશ કરી દે છે. અત્યારે તો કેટરિના જ આ ફિલ્મ જોવા માટેનું સૌથી મોટું કારણ લાગે છે. કેટરિનાના વિકી કૌશલ સાથે લગ્ન થયા પછી દસ મહિના બાદ નવી કોઇ ફિલ્મ આવી રહી હોવાથી દર્શકોમાં ઉત્સુક્તા જોવા મળી રહી છે. લાંબા સમય પછી તે મુખ્ય ભૂમિકામાં જોવા મળવાની છે. બાકી ‘સૂર્યવંશી’ માં તે આઇટમ ગર્લથી વિશેષ ન હતી. હમણાં કેટરિનાએ લગ્ન પછી વિકી સાથે બહુ ઓછો સમય મળતો હોવાનું કહ્યું હતું. કેમકે બંને પાંચ- છ ફિલ્મોમાં કામ કરી રહ્યા છે અને શુટિંગ માટે સતત દેશ- વિદેશમાં જવાનું થાય છે. કેટરિનાનું કહેવું છે કે ‘ફોન ભૂત’ એક હોરર કરતાં કોમેડી ફિલ્મ વધુ છે. નિર્માતા માટે એક સમસ્યા એવી હતી કે તેને ભૂત કેવી રીતે બનાવી શકાય? કદાચ એટલે જ એને સુંદર ભૂતની તરીકે રજૂ કરી છે.
ટ્રેલરની શરૂઆતમાં એક ભયાનક પરંતુ હસાવે એવી ચેતવણી અપાય છે. ઇશાન અને સિધ્ધાર્થને ભૂત દેખાય છે અને તે એક મિશન પર નીકળી પડે છે. બંને અભિનેતા દરેક દ્રશ્યમાં પ્રભાવિત કરી ગયા છે. કેટરિના એમની બેન્ડ બજાવવાનું કામ કરે છે.
તે બંને સામે એક બિઝનેસ ડિલ મૂકે છે. એની પાછળ એનો કોઇ હેતુ હોય છે. ટ્રેલરમાં જેકી શ્રોફનો વિલન તરીકેનો પ્રવેશ ચોંકાવી દે એવો છે. હોરરવાળી વાત જેકી સાથે વધુ સંકળાયેલી છે. ટ્રેલરમાં તો ‘ફોન ભૂત’ એક નવી જ તાજગીભરી ફિલ્મ લાગી રહી છે. તે કોમેડીથી દર્શકોને આકર્ષવાની શક્યતા ધરાવે છે.
પરંતુ હોલિવૂડની હિટ હોરર ડ્રામા ફિલ્મ ‘ઘોસ્ટ બસ્ટર્સ’ નો વિચાર લઇને તેની નકલ કરવામાં આવી છે એ જાણ્યા પછી લોકો નિરાશ થઇ શકે છે. કેમકે ચાલીસ વર્ષ જૂની એ ફિલ્મનો વિચાર અત્યારે જૂનો થઇ ગયો હશે. એને આધુનિક રીતે કેવી રીતે રજૂ કરી શકાયો છે એના પર બધો આધાર છે. ‘મિર્ઝાપુર’ થી વેબસિરીઝની દુનિયામાં ક્રાંતિ લાવનાર ગુરમિત સિંહ નિર્દેશક તરીકે નિરાશ નહીં કરે એવી સમીક્ષકોએ આશા વ્યક્ત કરી છે.
