ભાવનગરમાં નકલી દારૂ પીવાથી સર્જાયેલા લઠ્ઠાકાંડમાં વધુ એક દર્દીનું મોત થતાં સ્થિતિ વધુ ગંભીર બની છે. આજે 22 ઓગસ્ટે એક જ દિવસમાં ત્રણ લોકોના મોત થયા હોવાનું સામે આવ્યું છે. આ સાથે લઠ્ઠાકાંડમાં કુલ મૃત્યુઆંક વધીને 12 પર પહોંચી ગયો છે. હજુ પણ કેટલાક દર્દીઓ હોસ્પિટલમાં સારવાર હેઠળ છે, જેમાં બેની સ્થિતિ ગંભીર હોવાનું જણાવવામાં આવ્યું છે. ભાવનગરની સર ટી હોસ્પિટલમાં સારવાર લઈ રહેલા ઘોઘા રોડ વિસ્તારના રહેવાસી અવિનાશ પરમારનું મોત થયું છે. તેઓ ગંભીર હાલતમાં સારવાર હેઠળ હતા. તેમની સાથે સારવાર લઈ રહેલા અન્ય દર્દીઓમાં પણ કેટલાકની સ્થિતિ નાજુક હોવાથી તબીબી ટીમ સતત દેખરેખ રાખી રહી છે.
આ પહેલાં આજે સવારે ભરતનગર વિસ્તારના વર્ધમાનનગરમાં રહેતા 35 વર્ષીય હાર્દિકભાઈ હરેશભાઈ કિલજીનું પણ સારવાર દરમિયાન મોત થયું હતું. નકલી ઈંગ્લિશ દારૂ પીધાના પાંચમા દિવસે તેમણે દમ તોડ્યો હતો. શરૂઆતમાં તેમની તબિયત બગડતાં તેમને શહેરની એક ખાનગી હોસ્પિટલમાં સારવાર માટે ખસેડવામાં આવ્યા હતા. જોકે, તબિયત વધુ ગંભીર બનતાં બાદમાં તેમને સર ટી હોસ્પિટલમાં દાખલ કરવામાં આવ્યા હતા, જ્યાં સારવાર દરમિયાન તેમનું મોત થયું. બીજી તરફ, નકલી ઈંગ્લિશ દારૂ પીધા બાદ ભાવનગરથી સુરત સારવાર માટે આવેલા સંજયસિંહ ડોડિયાનું પણ મોત થયું છે. તેઓ બ્રેઈનડેડ હોવાનું સામે આવ્યું હતું. આજે અચાનક હૃદય બંધ થઈ જતાં ડૉક્ટરોએ તેમને મૃત જાહેર કર્યા હતા. આમ, આજે ત્રણ લોકોના મોત બાદ લઠ્ઠાકાંડનો મૃત્યુઆંક વધુ વધ્યો છે.
હાલ સર ટી હોસ્પિટલમાં મહીસાગરના મુકેશ ડામોર અને ભાર્ગવ નામના દર્દી સહિત કેટલાક લોકો સારવાર હેઠળ છે. મળતી માહિતી મુજબ, બે દર્દીઓ ICUમાં સારવાર લઈ રહ્યા છે અને તેમની સ્થિતિ ગંભીર છે. 18 ઓગસ્ટે સમગ્ર લઠ્ઠાકાંડનો મામલો સામે આવ્યા બાદથી અનેક લોકોને અલગ-અલગ હોસ્પિટલોમાં સારવાર આપવામાં આવી રહી છે. આ ઘટનામાં પોલીસને વધુ પુરાવા પણ મળી રહ્યા છે. ભાવનગરમાં જૂની પોલીસ લાઇન સામે આવેલા મેદાનમાંથી રોયલ સ્ટેગ બ્રાન્ડની બે ખાલી બોટલ મળી આવી છે. આ બોટલો પણ તપાસ માટે મહત્વની સાબિત થઈ શકે છે. લઠ્ઠાકાંડમાં નકલી રીતે જાણીતી બ્રાન્ડની બોટલ, સ્ટીકર અને પેકેજિંગનો ઉપયોગ કરીને ઝેરી દારૂ વેચવામાં આવ્યો હોવાની તપાસ ચાલી રહી છે.
લઠ્ઠાકાંડનો રેલો હવે સિહોર તાલુકા સુધી પણ પહોંચ્યો છે. સિહોર પોલીસે પ્રવીણ જાદવ અને અશ્વિન જાદવ નામના બે બુટલેગરની ધરપકડ કરી છે. તેમની પૂછપરછમાં દારૂની સપ્લાય અને નકલી દારૂના જથ્થાને લઈને મહત્વના ખુલાસા થયા હોવાનું સામે આવ્યું છે. પોલીસ તપાસ મુજબ, વરતેજ વિસ્તારના હરદીપ મોરી પાસેથી રોયલ સ્ટેગની 10 પેટી ખરીદવામાં આવી હતી. ત્યારબાદ પ્રવીણ અને અશ્વિન સહિત અન્ય લોકોએ આ દારૂનું સેવન કર્યું હોવાનું તપાસમાં સામે આવ્યું છે. દારૂની ગુણવત્તા અને તેની અસરને લઈને શંકા ઊભી થતાં કેટલીક બોટલો પરત કરવાની વાત પણ કરવામાં આવી હતી.
આક્ષેપો મુજબ, હરદીપ મોરી બાદમાં 10 પેટીમાંથી 5 પેટી પરત લઈ ગયો હતો અને તેના બદલામાં રિટઝ બ્રાન્ડની 10 પેટી આપી હતી. લઠ્ઠાકાંડનો મામલો બહાર આવ્યા બાદ સિહોર તાલુકાના સર ગામની સીમમાં આવેલા ડુંગરાળ વિસ્તારમાં રોયલ સ્ટેગની સાડા ચાર પેટીનો નાશ કરવામાં આવ્યો હોવાનો પણ પોલીસ તપાસમાં ખુલાસો થયો છે. પોલીસે આ મામલે પ્રવીણ જાદવ, અશ્વિન જાદવ અને હરદીપ મોરી વિરુદ્ધ પ્રોહિબિશન એક્ટ હેઠળ ગુનો નોંધ્યો છે. તેમની પાસેથી રિટઝ બ્રાન્ડની 94 બોટલ સહિત અંદાજે 65,800 રૂપિયાનો મુદ્દામાલ કબ્જે કરવામાં આવ્યો છે.
લઠ્ઠાકાંડમાં દર્દીના પરિવારજનોએ પણ સરકાર અને તંત્ર સામે ગંભીર સવાલો ઉઠાવ્યા છે. મહીસાગરના મુકેશ ડામોરના કાકા લક્ષ્મણભાઈ ડામોરે જણાવ્યું કે તેમનો ભત્રીજો વર્ષોથી ભાવનગરમાં કંપનીમાં કામ કરે છે. 18 ઓગસ્ટે પરિવારને મેસેજ મળ્યો કે તેની તબિયત ગંભીર છે, ત્યારબાદ પરિવાર તાત્કાલિક ભાવનગર પહોંચ્યો હતો. તેમના જણાવ્યા મુજબ, મુકેશને શરૂઆતમાં ખાનગી હોસ્પિટલમાં ઓક્સિજન પર સારવાર આપવામાં આવી રહી હતી. બાદમાં તેની તબિયત વધુ ગંભીર બનતાં સરકારી હોસ્પિટલમાં ખસેડવામાં આવ્યો હતો અને હાલમાં તે ICUમાં સારવાર હેઠળ છે. પરિવારજનોએ કહ્યું કે રાજ્યના અલગ-અલગ વિસ્તારોમાં અગાઉ પણ લઠ્ઠાકાંડની ઘટનાઓ બની ચૂકી છે, તેથી સરકારે આ મુદ્દે અત્યંત ગંભીરતાથી કાર્યવાહી કરવાની જરૂર છે. તેમના કહેવા મુજબ, જો ગેરકાયદે અને નકલી દારૂના કારોબાર સામે કડક પગલાં નહીં લેવાય તો સામાન્ય લોકો તેનો ભોગ બનતા રહેશે.
આ સમગ્ર મામલામાં સૌથી ચોંકાવનારો ખુલાસો ગાંધીનગરની ફોરેન્સિક સાયન્સ લેબોરેટરીના પરીક્ષણમાં થયો હોવાનું સામે આવ્યું છે. તપાસમાં જાણવા મળ્યું છે કે મૃતકો અને સારવાર લઈ રહેલા લોકોના શરીરમાં દારૂના નામે જે પ્રવાહી પહોંચ્યો હતો તેમાં સામાન્ય ઇથેનોલના બદલે મોટા પ્રમાણમાં ઝેરી મિથેનોલ હતું. પોલીસે જપ્ત કરેલી દારૂની બોટલના સેમ્પલની તપાસમાં અંદાજે 38.59 ટકા મિથેનોલ અને માત્ર 0.94 ટકા ઇથેનોલ હોવાનું સામે આવ્યું છે. એટલે કે, આ બોટલોમાં પીવા યોગ્ય દારૂના બદલે મોટા પ્રમાણમાં ઝેરી મિથેનોલ મિશ્રિત પ્રવાહી ભરવામાં આવ્યું હોવાની શંકા વધુ મજબૂત બની છે.
મિથેનોલ શરીર માટે અત્યંત જોખમી રસાયણ છે. તે શરીરમાં ગયા બાદ તેની પ્રક્રિયા દરમિયાન ફોર્માલ્ડિહાઇડ અને ત્યારબાદ ફોર્મિક એસિડ જેવા ઝેરી તત્વો બની શકે છે. તેની સૌથી પહેલા ગંભીર અસર આંખો અને મગજ પર પડી શકે છે. વધુ પ્રમાણમાં અસર થતાં શરીરના મહત્વના અંગો કામ કરવાનું બંધ કરી શકે છે અને સ્થિતિ જીવલેણ બની શકે છે. તપાસમાં એ પણ સામે આવ્યું છે કે ભાવનગરના મુખ્ય બુટલેગર તરીકે ઓળખાતા ગૌતમ સોલંકી અને મધ્યપ્રદેશના કેટલાક લોકો સાથે મળીને નકલી દારૂ તૈયાર કરતા હતા. આરોપીઓએ અલગ-અલગ તબક્કામાં દારૂ બનાવ્યો હોવાનો તપાસમાં દાવો છે.
તપાસ અનુસાર, અમદાવાદના અલગ-અલગ વિસ્તારોમાંથી મિથેનોલ, સફેદ રંગનું પ્રવાહી, ખાલી બોટલો, ઢાંકણાં અને જાણીતી બ્રાન્ડના સ્ટીકર ખરીદીને વરતેજ વિસ્તારમાં લાવવામાં આવ્યા હતા. ત્યારબાદ આરોપીઓએ મળીને નકલી બ્રાન્ડેડ દારૂ તૈયાર કર્યો હોવાનું પોલીસ તપાસમાં સામે આવ્યું છે. આરોપીઓએ લગભગ 51 પેટી દારૂ તૈયાર કરીને વેચી દીધી હોવાનો પણ દાવો છે. બીજી વખત દારૂ બનાવવામાં આવ્યો ત્યારે તેની ગુણવત્તા અત્યંત ખરાબ હોવાનું જણાતા તેમાંનો કેટલાક જથ્થો ભાલ વિસ્તારના પાળીયાદ ગામ નજીક એક અવાવરુ સ્થળે નાશ કરવામાં આવ્યો હોવાનો ખુલાસો થયો છે.
લઠ્ઠાકાંડ સામે આવ્યા બાદ પોલીસ અને વહીવટી તંત્ર દ્વારા કાર્યવાહી પણ કરવામાં આવી છે. વરતેજ પોલીસ સ્ટેશનના PI પઢેરિયા અને LCBના PI સરવૈયાને સસ્પેન્ડ કરવામાં આવ્યા હોવાનું સામે આવ્યું છે. નકલી દારૂના નેટવર્ક અને તેમાં સંકળાયેલા અન્ય લોકો સુધી પહોંચવા માટે તપાસ વધુ તેજ કરવામાં આવી રહી છે. આ સમગ્ર ઘટનામાં ભાવનગરના ઘોઘા તાલુકાના ખરકડી ગામનો પણ ઉલ્લેખ સામે આવ્યો છે. 16 ઓગસ્ટની રાત્રે કેટલાક મિત્રો દ્વારા દારૂ પાર્ટી કરવામાં આવી હતી. ત્યારબાદ નકલી દારૂ પીવાથી લોકોની તબિયત બગડવા લાગી અને એક પછી એક લોકોને હોસ્પિટલમાં ખસેડવામાં આવ્યા હતા. ઉપેન્દ્રસિંહ ગોહિલના મોત બાદ સમગ્ર મામલાની ગંભીરતા વધુ સ્પષ્ટ થઈ હતી.
હાલ આ લઠ્ઠાકાંડમાં મુખ્ય બુટલેગર ગૌતમ સહિત 21 લોકો સામે FIR નોંધાઈ હોવાનું સામે આવ્યું છે. પોલીસ દારૂના ઉત્પાદનથી લઈને સપ્લાય અને વેચાણ સુધીની આખી ચેઇનની તપાસ કરી રહી છે. રાજ્યમાં અગાઉ પણ ઝેરી દારૂના કારણે મોટી જાનહાનિ થઈ ચૂકી છે. ચાર વર્ષ પહેલાં બરવાળા લઠ્ઠાકાંડમાં પણ અનેક લોકોના જીવ ગયા હતા. તે ઘટનામાં માત્ર 48 કલાકમાં 57 લોકોના મોત થયા હતા. આ જૂની ઘટના બાદ પણ ફરી નકલી અને ઝેરી દારૂના કારણે લોકોના જીવ જતાં તંત્રની કામગીરી અને ગેરકાયદે દારૂના નેટવર્ક સામે કડક કાર્યવાહી અંગે ફરી ગંભીર સવાલો ઊભા થયા છે.
ભાવનગરનો હાલનો લઠ્ઠાકાંડ હવે માત્ર ગેરકાયદે દારૂનો કેસ નહીં, પરંતુ નકલી બ્રાન્ડેડ બોટલોમાં ઝેરી રસાયણ ભેળવીને લોકોના જીવ જોખમમાં મૂકવાના ગંભીર મામલા તરીકે સામે આવ્યો છે. મૃત્યુઆંક 12 પર પહોંચતાં પીડિત પરિવારોમાં શોકનો માહોલ છે, જ્યારે હોસ્પિટલમાં સારવાર લઈ રહેલા ગંભીર દર્દીઓને બચાવવા માટે તબીબો સતત પ્રયાસ કરી રહ્યા છે. હવે તપાસનો મુખ્ય મુદ્દો એ છે કે ઝેરી મિથેનોલ ક્યાંથી લાવવામાં આવ્યું, નકલી દારૂ બનાવવાની સમગ્ર પ્રક્રિયામાં કોણ-કોણ સામેલ હતું અને આ દારૂ કયા વિસ્તારોમાં સપ્લાય કરવામાં આવ્યો હતો. પોલીસની તપાસમાં આ તમામ મુદ્દાઓ સ્પષ્ટ થયા બાદ લઠ્ઠાકાંડના સમગ્ર નેટવર્કનો વધુ મોટો ખુલાસો થવાની શક્યતા છે.
