મેઘાલયની રાજધાની શિલોંગમાં 19 ઓગસ્ટે થયેલી ખાશી સ્ટુડન્ટ્સ યુનિયન (KSU)ની બ્લેક ફ્લેગ મોટરસાઇકલ રેલી બાદ શરૂ થયેલી હિંસા હવે આસામ-મેઘાલય સરહદ સુધી પહોંચી ગઈ છે. રેલી દરમિયાન અનેક વાહનોમાં તોડફોડ અને આગચંપી કરવામાં આવી હતી. ખાસ કરીને આસામ નંબરનાં વાહનોને નિશાન બનાવવામાં આવ્યા હોવાના આક્ષેપો થયા છે. હિંસામાં કેટલાક લોકો ઘાયલ થયા છે અને વાહનોને ભારે નુકસાન થયું છે. સ્થિતિ વધુ વણસતાં આસામના ટેક્સી અને વ્યાવસાયિક વાહનચાલકોએ ખાનાપારા અને જોરાબાટ વિસ્તારમાં મેઘાલય તરફ જતાં રસ્તાઓ પર નાકાબંધી કરી દીધી છે. જેના કારણે બંને રાજ્યો વચ્ચે વાહનવ્યવહારને અસર થઈ છે અને સામાન્ય લોકોની મુશ્કેલી વધી છે.
રેલીમાંથી શરૂ થયેલો વિવાદ હવે આગચંપી સુધી પહોંચ્યો
KSUએ 19 ઓગસ્ટે શિલોંગમાં બ્લેક ફ્લેગ રેલી યોજી હતી. સંગઠનનું કહેવું હતું કે તેણે 4 ઓગસ્ટે મુખ્યમંત્રી કોનરાડ સંગમાને પોતાની 5 માંગણીઓ રજૂ કરી હતી અને સરકારને 15 દિવસનો સમય આપ્યો હતો. આ સમયગાળો પૂરો થયા બાદ રેલીનું આયોજન કરવામાં આવ્યું હતું. જોકે રેલી દરમિયાન સ્થિતિ અચાનક બગડી અને પથ્થરમારો, વાહનોમાં તોડફોડ અને મારામારીના બનાવો સામે આવ્યા. પોલીસના જણાવ્યા પ્રમાણે સરકારી અને ખાનગી બંને પ્રકારનાં વાહનોને નુકસાન થયું હતું. સ્વામી વિવેકાનંદ અને નેતાજી સુભાષચંદ્ર બોઝની પ્રતિમાઓને પણ નુકસાન પહોંચાડવામાં આવ્યું હોવાનું પોલીસે જણાવ્યું છે. આસામના વાહનચાલકોનો આરોપ છે કે હુમલાખોરોએ નંબર પ્લેટ જોઈને વાહનોને નિશાન બનાવ્યાં અને કેટલાક લોકોને વાહનમાંથી બહાર કાઢીને માર માર્યો. બીજી તરફ KSUના મહાસચિવ રુબેન નાજિયારે સંગઠનના સભ્યો હિંસામાં સામેલ હોવાનો ઇનકાર કર્યો છે અને રેલીમાં ઘૂસેલા કેટલાક અસામાજિક તત્વોએ વાતાવરણ બગાડ્યું હોવાનો દાવો કર્યો છે.
પેટ્રોલ બોમ્બથી પોલીસ ચોકી પર હુમલો, સરકારી વાહનો સળગાવાયા
હિંસા માત્ર રસ્તાઓ અને વાહનો સુધી સીમિત રહી નથી. 20 ઓગસ્ટની રાત્રે શિલોંગની નોંગમેન્સોંગ પોલીસ ચોકી પર અજાણ્યા લોકોએ પેટ્રોલ બોમ્બ ફેંક્યો હતો. બોમ્બ પરિસરમાં પડતાં ત્યાં રાખેલી ખુરશીઓ સળગી ગઈ હતી, પરંતુ ઉપરના માળે તૈનાત CRPFના જવાનોએ સમયસર આગ પર કાબૂ મેળવી લીધો હતો. આ ઘટનામાં કોઈ જાનહાનિ થઈ નથી. પોલીસે આસપાસના મકાનોના CCTV કેમેરાના ફૂટેજ તપાસવાનું શરૂ કર્યું છે. આ ઉપરાંત રી-ભોઈ જિલ્લામાં પાણી સંસાધન વિભાગનાં 3 સરકારી વાહનો અને એક મોટરસાઇકલ સળગાવવામાં આવ્યા હતા. સાઉથ વેસ્ટ ખાશી હિલ્સમાં પણ એક સરકારી કચેરી પર પેટ્રોલ બોમ્બ ફેંકાયો હતો. આ સતત બની રહેલી ઘટનાઓને કારણે સમગ્ર વિસ્તારમાં સુરક્ષા અંગે ચિંતા વધી છે.
આસામ તરફથી નાકાબંધી, મેઘાલયમાં પુરવઠા પર અસરની ચિંતા
શિલોંગમાં આસામના વાહનો અને લોકો સાથે થયેલા હુમલાના અહેવાલ બાદ આસામના ટેક્સી અને વ્યાવસાયિક વાહનચાલકોમાં ભારે રોષ જોવા મળ્યો છે. ચાલક સંગઠનોએ મેઘાલય સરકાર પાસે જવાબદાર લોકો સામે કાર્યવાહી, આસામના વાહનચાલકોની સુરક્ષાની ખાતરી અને નુકસાનનું વળતર આપવાની માગ કરી છે. આ વિરોધમાં ખાનાપારા અને જોરાબાટ જેવા મુખ્ય પ્રવેશ માર્ગો પર વાહનવ્યવહાર રોકવામાં આવ્યો છે. નેશનલ હાઈવે-27 પર અવરજવર અટકતાં મેઘાલયમાં જરૂરી ચીજવસ્તુઓ અને ઈંધણના પુરવઠા પર અસર થવાની ચિંતા ઊભી થઈ છે. બીજી તરફ મેઘાલયના પ્રવાસન ક્ષેત્રે પણ ચિંતા વધી છે. પ્રવાસન ક્ષેત્ર સાથે જોડાયેલા સંગઠનોએ હિંસાની નિંદા કરી છે અને જણાવ્યું છે કે રાજ્યની પ્રવાસન છબીને મોટું નુકસાન થઈ શકે છે. મેઘાલયની 30%થી વધુ વસ્તીની આજીવિકા સીધી કે આડકતરી રીતે પ્રવાસન સાથે જોડાયેલી હોવાનું સંગઠનોએ જણાવ્યું છે.
હવે સરકાર અને હાઈકોર્ટની નજર, બંને મુખ્યમંત્રીઓએ શાંતિની અપીલ કરી
વધતા તણાવ વચ્ચે મેઘાલય પોલીસ દ્વારા KSUના 3 વરિષ્ઠ નેતાઓ—અધ્યક્ષ રેમન્ડ ખારજાના, ઉપાધ્યક્ષ પિનકમેનલાંગ સાનમિયેટ અને મહાસચિવ રુબેન નાજિયાર—ની ધરપકડ કરવામાં આવી છે. ત્રણેયને 14 દિવસની ન્યાયિક કસ્ટડીમાં મોકલવામાં આવ્યા છે. મેઘાલય હાઈકોર્ટે પણ 19 ઓગસ્ટની હિંસાની સ્વતઃ નોંધ લઈને જવાબદાર લોકો સામે તાત્કાલિક કાર્યવાહી કરવાનો આદેશ આપ્યો છે. કોર્ટને 24 ઓગસ્ટે કાર્યવાહીનો અહેવાલ રજૂ કરવાનો રહેશે. દરમિયાન આસામના મુખ્યમંત્રી હિમંતા બિસ્વા સરમાએ મેઘાલયના મુખ્યમંત્રી કોનરાડ સંગમા સાથે વાત કરીને આસામના વાહનો અંગે ચિંતા વ્યક્ત કરી છે. બંને મુખ્યમંત્રીઓએ શાંતિ અને સામાન્ય સ્થિતિ પાછી લાવવા સાથે મળીને કામ કરવાની ખાતરી આપી છે. હવે બંને રાજ્યો વચ્ચેનો તણાવ વધુ ન વધે અને સામાન્ય લોકોની અવરજવર ફરી શરૂ થાય તે સૌથી મોટો પડકાર છે.
