ચેન્નાઈ સુપર કિંગ્સને IPLની સૌથી સફળ અને લોકપ્રિય ટીમોમાં સ્થાન અપાવનાર મહેન્દ્ર સિંહ ધોનીની ખેલાડી તરીકેની IPL સફરનો અંત આવ્યો છે. 45 વર્ષીય ધોનીએ મંગળવારે, 17 નવેમ્બર 2026ના રોજ IPLમાંથી ખેલાડી તરીકે નિવૃત્તિ લીધી હોવાની સત્તાવાર જાહેરાત ચેન્નાઈ સુપર કિંગ્સે કરી હતી. જોકે, ધોનીનો પીળી જર્સી સાથેનો સંબંધ ચાલુ રહેશે. IPL 2027થી તેઓ CSKના ટીમ મેન્ટર તરીકે નવી જવાબદારી સંભાળશે અને યુવા ખેલાડીઓને માર્ગદર્શન આપતા જોવા મળશે.
IPL 2027 માટે ખેલાડીઓની રિટેન્શન યાદી જાહેર કરવાની અંતિમ તારીખે CSKએ આ મોટી જાહેરાત કરી હતી. થોડા અઠવાડિયા પહેલાં જ ફ્રેન્ચાઇઝીએ ઝહીર ખાનને ટીમના હેડ કોચ તરીકે નિયુક્ત કર્યા હતા. હવે ધોની મેન્ટરની ભૂમિકામાં તેમની સાથે જોડાશે. આ રીતે મેદાન પર ખેલાડી તરીકે નહીં, પરંતુ ટીમના માર્ગદર્શક તરીકે ધોની CSKની સફરનો હિસ્સો બની રહેશે. CSKના માલિક એન. શ્રીનિવાસને ધોની સાથેના લાંબા સંબંધને યાદ કરતાં કહ્યું હતું કે ધોની વિના CSKની ઓળખ અધૂરી છે. તેમણે જણાવ્યું હતું કે, “એમ.એસ. ધોની વિના કોઈ CSK નથી. લગભગ બે દાયકાથી અમે જીત, હાર અને તેની વચ્ચેની દરેક પરિસ્થિતિમાં સાથે ચાલ્યા છીએ. અમારા સંબંધની મજબૂતીનું કારણ એ છે કે અમે એકબીજાના ઈરાદાઓ પર શંકા કરતા નથી. આ વિશ્વાસે જ અમારી સફરને શક્ય બનાવી છે.” શ્રીનિવાસને 2008માં ધોનીને ટીમમાં સામેલ કરવાનો નિર્ણય પોતાના જીવનનો શ્રેષ્ઠ નિર્ણય ગણાવ્યો હતો.

2008માં IPLની પ્રથમ સિઝનથી જ ધોની ચેન્નાઈ સુપર કિંગ્સની ઓળખ બની ગયા હતા. તેમની કેપ્ટનશીપ હેઠળ ટીમે પાંચ વખત IPLનો ખિતાબ જીત્યો હતો. CSKએ 2010, 2011, 2018, 2021 અને 2023માં ટ્રોફી પોતાના નામે કરી હતી. આ સાથે ટીમે કુલ 10 વખત ફાઇનલમાં સ્થાન મેળવ્યું હતું. પાંચ ખિતાબ સાથે CSKએ મુંબઈ ઇન્ડિયન્સની બરાબરી કરી હતી.
2016 અને 2017માં CSK પર પ્રતિબંધ લાગતાં ધોની રાઇઝિંગ પુણે સુપરજાયન્ટ તરફથી રમ્યા હતા. બે વર્ષ બાદ 2018માં CSKની વાપસી થઈ ત્યારે ધોનીના નેતૃત્વમાં ટીમે ફરી ખિતાબ જીત્યો હતો. તેમની કેપ્ટનશીપ હેઠળની છેલ્લી IPL ટ્રોફી 2023માં મળી હતી. અમદાવાદમાં ગુજરાત ટાઇટન્સ સામે રમાયેલી વરસાદથી પ્રભાવિત ફાઇનલમાં રવિન્દ્ર જાડેજાએ અંતિમ બોલે ચોગ્ગો ફટકારીને ટીમને જીત અપાવી હતી. આ ક્ષણે ધોનીએ જાડેજાને ભેટી પડતાં મેદાન પર ભાવુક દૃશ્ય સર્જાયું હતું. 2023ની સિઝન બાદ ધોનીએ ઘૂંટણની સર્જરી કરાવી હતી. ત્યારબાદ 2024માં તેઓ ફરી મેદાન પર ઉતર્યા હતા. આ સમયગાળામાં તેમની ભૂમિકા મુખ્યત્વે ઇનિંગ્સના અંતિમ તબક્કામાં ઝડપી રન બનાવવાની રહી હતી. 2023માં તેમણે 182થી વધુના સ્ટ્રાઇક રેટથી 104 રન બનાવ્યા હતા, જ્યારે 2024માં 11 ઇનિંગ્સમાં 220.54ના સ્ટ્રાઇક રેટથી 161 રન નોંધાવ્યા હતા. 2025ની સિઝનમાં તેમણે તમામ 14 મેચ રમીને 196 રન બનાવ્યા હતા. આ સિઝનમાં ઋતુરાજ ગાયકવાડ ઈજાને કારણે બહાર થતાં ધોનીએ ફરી ટીમની કેપ્ટનશીપ સંભાળી હતી. જોકે, CSKનું પ્રદર્શન નિરાશાજનક રહ્યું હતું અને ટીમ પોઇન્ટ ટેબલમાં સૌથી નીચે રહી હતી.
IPL 2026 ધોનીની ખેલાડી તરીકેની અંતિમ સિઝન સાબિત થઈ હતી, પરંતુ ફિટનેસની સમસ્યાઓને કારણે તેઓ એક પણ મેચ રમી શક્યા નહોતા. હવે તેમણે ખેલાડી તરીકેની કારકિર્દી પૂર્ણ કરીને મેન્ટરની જવાબદારી સ્વીકારી છે. CSKએ જણાવ્યું હતું કે ધોનીનો અનુભવ અને માર્ગદર્શન ટીમના યુવા ખેલાડીઓ માટે ઉપયોગી સાબિત થશે. ખાસ કરીને ટીમમાં થઈ રહેલા બદલાવના તબક્કે તેમની ભૂમિકા મહત્ત્વપૂર્ણ રહેશે. આમ, ચાહકો હવે ધોનીને મેદાન પર બેટિંગ કે વિકેટકીપિંગ કરતા નહીં જોઈ શકે, પરંતુ IPL 2027માં તેઓ ડગઆઉટમાંથી પોતાની ટીમને માર્ગદર્શન આપતા જોવા મળશે. ધોનીના સંન્યાસના સમાચાર સાંભળી ચાહકો ભાવુક થઈ ગયા હતા. તેમની આ જાહેરાતથી ચાહકો સોશિયલ મીડિયા પર પોતાની લાગણીઓ વ્યક્ત કરી રહ્યા છે. એક ચાહકે લખ્યું, “એક સૂરજ, એક ચાંદ અને એક માહી…”