યશ રાજ ફિલ્મ્સની સ્પાય યુનિવર્સમાં વધુ એક નવી ફિલ્મ ‘અલ્ફા’ સિનેમાઘરોમાં રિલીઝ થઈ છે. અત્યાર સુધી આ યુનિવર્સમાં પુરુષ જાસૂસોની કહાની જોવા મળી હતી, પરંતુ આ વખતે ફિલ્મની કમાન બે મહિલા જાસૂસોના હાથમાં છે. ફિલ્મમાં આલિયા ભટ્ટ અને શરવરી વાઘ મુખ્ય ભૂમિકામાં છે અને બંનેએ એક્શનથી ભરપૂર અભિનય કરીને ફિલ્મને અલગ ઓળખ આપી છે. ફિલ્મમાં સસ્પેન્સ, એક્શન, ઈમોશન અને ટ્વિસ્ટનો સારો મિશ્રણ જોવા મળે છે. જોકે કેટલીક બાબતો એવી પણ છે જ્યાં ફિલ્મ વધુ મજબૂત બની શકી હોત.
ફિલ્મની કહાની સીતા (આલિયા ભટ્ટ)ની આસપાસ ફરે છે. બાળપણથી જ તેને એક ખાસ મિશન માટે તૈયાર કરવામાં આવે છે. દુનિયાથી દૂર રહીને તે એક ખાસ પ્રકારની ‘અલ્ફા’ સોલ્જર બનવાની ટ્રેનિંગ લે છે. તેને ફતેહ સિંહ લખાવત (બોબી દેઓલ) ટ્રેનિંગ આપે છે. પરંતુ આગળ જતાં આ જ વ્યક્તિ દેશ વિરુદ્ધ મોટા કાવતરાનો ભાગ બની જાય છે. ‘અલ્ફા’ સોલ્જર્સ સામાન્ય જાસૂસ નથી. તેમની પાસે અસાધારણ ક્ષમતાઓ છે. દુશ્મનની હાજરીનો અંદાજ લગાવવો, લાંબા સમય સુધી શ્વાસ રોકીને મિશન પૂર્ણ કરવું અને મુશ્કેલ પરિસ્થિતિમાં પણ શાંત રહીને કામ કરવું જેવી તેમની વિશેષતા છે.
કહાનીમાં મોટો વળાંક ત્યારે આવે છે જ્યારે દુર્ગા (શરવરી વાઘ)ની એન્ટ્રી થાય છે. બંને એક જ મિશનનો ભાગ હોવા છતાં તેમની વિચારસરણી અને ઉછેર એકબીજાથી સંપૂર્ણપણે અલગ છે. બંને વચ્ચેનું ટકરાવ અને પછીની સફર ફિલ્મને વધુ રસપ્રદ બનાવે છે. ફિલ્મમાં સતત નવા ટ્વિસ્ટ આવતા રહે છે, જેના કારણે દર્શકોનો રસ જળવાઈ રહે છે. આલિયા ભટ્ટે ફરી એકવાર સાબિત કર્યું છે કે તે માત્ર રોમેન્ટિક કે ઈમોશનલ ફિલ્મો પૂરતી સીમિત નથી. એક્શન અને સ્પાય થ્રિલર જેવી ફિલ્મોમાં પણ તે મજબૂત રીતે પોતાની છાપ છોડી શકે છે. તેના એક્શન સીન વિશ્વાસપાત્ર લાગે છે અને ઈમોશનલ દ્રશ્યોમાં પણ તે અસર છોડે છે. શરવરી વાઘ ફિલ્મનું સૌથી મોટું સરપ્રાઈઝ પેકેજ છે. જ્યારે પણ તે સ્ક્રીન પર આવે છે ત્યારે પોતાની હાજરી અનુભવાવે છે. તેના એક્શન સીન, આત્મવિશ્વાસ અને સ્ક્રીન પ્રેઝન્સ પ્રશંસનીય છે. ઘણા દ્રશ્યોમાં તે આલિયા ભટ્ટને પણ ટક્કર આપતી જોવા મળે છે. બોબી દેઓલ ફરી એકવાર વિલન તરીકે પ્રભાવશાળી લાગે છે. તેમનો લુક અને સ્ક્રીન પ્રેઝન્સ સારા છે, પરંતુ તેમના પાત્રની બેકસ્ટોરી વધુ સારી રીતે રજૂ કરવામાં આવી હોત તો તેની અસર વધુ ઊંડી બની શકી હોત.
ફિલ્મનું સૌથી મોટું સરપ્રાઈઝ ઋતિક રોશનની એન્ટ્રી છે. ટ્રેલરમાં તેની માત્ર ઝલક જોવા મળી હતી, પરંતુ ફિલ્મમાં તેની એન્ટ્રી દર્શકોમાં ઉત્સાહ વધારી દે છે. જોકે તેનો સ્ક્રીન સમય ઘણો ઓછો છે. જેના કારણે તેના ચાહકોને થોડો અધૂરો અહેસાસ થઈ શકે છે. તેમ છતાં તેની હાજરી ફિલ્મના ક્લાઈમેક્સને વધુ રોમાંચક બનાવે છે. ‘ધ રેલવે મેન’ પછી દિગ્દર્શક શિવ રાવૈલે આ મોટા પ્રોજેક્ટને સારી રીતે સંભાળ્યો છે. ફિલ્મમાં એક્શન, ઈમોશન અને સસ્પેન્સ વચ્ચે યોગ્ય સંતુલન જાળવવાનો પ્રયાસ જોવા મળે છે. ખાસ કરીને પિતા-પુત્રીના સંબંધને જે રીતે રજૂ કરવામાં આવ્યો છે તે ફિલ્મને ભાવનાત્મક સ્પર્શ આપે છે. ફિલ્મની સૌથી મોટી તાકાત તેની ઝડપી ગતિ છે. સ્ટોરી ક્યાંય ધીમી પડતી નથી. થોડા-થોડા અંતરે નવા ટ્વિસ્ટ અને નવા મિશન આવતા રહે છે. જેના કારણે દર્શકો આખી ફિલ્મ દરમિયાન જોડાયેલા રહે છે. ફિલ્મમાં ગીતો ઓછા છે, પરંતુ બેકગ્રાઉન્ડ મ્યુઝિક ખૂબ જ અસરકારક છે. અંગ્રેજી અને પંજાબી રેપ સાથેનું પાવરફુલ બેકગ્રાઉન્ડ સ્કોર એક્શન સીનને વધુ શાનદાર બનાવે છે. સિનેમેટોગ્રાફી પણ ફિલ્મની ખાસિયત છે.
મોટા પડદા પર દરેક એક્શન સીન ભવ્ય લાગે છે. ફિલ્મની કેટલીક કમજોરીઓ પણ છે. કેટલાક ટ્વિસ્ટ પહેલાથી જ સમજી શકાય એવા લાગે છે. પાકિસ્તાન સાથે જોડાયેલા પ્લોટને વધુ મજબૂત રીતે રજૂ કરી શકાયો હોત. કેટલીક જગ્યાએ વાર્તા વધુ ઊંડાણ માંગે છે. બોબી દેઓલના પાત્રને વધુ સારી બેકસ્ટોરી આપવામાં આવી હોત તો ફિલ્મનો ઈમોશનલ પ્રભાવ વધ્યો હોત. આલિયા ભટ્ટના ટ્રેનિંગ સિક્વન્સમાં તેના ફિઝિકલ ટ્રાન્સફોર્મેશન પર પણ થોડું વધુ કામ થઈ શક્યું હોત.
જો તમને યશ રાજ ફિલ્મ્સની સ્પાય યુનિવર્સ ગમે છે અને એક્શન, સસ્પેન્સ, ઝડપથી આગળ વધતી સ્ટોરી અને ઈમોશનલ ટચ ધરાવતી ફિલ્મ જોવી હોય તો ‘અલ્ફા’ એક સારો વિકલ્પ છે. ફિલ્મમાં કેટલીક ખામીઓ હોવા છતાં આલિયા ભટ્ટ, શરવરી વાઘ અને બોબી દેઓલનો અભિનય તેને મનોરંજક બનાવે છે. ઋતિક રોશનની સરપ્રાઈઝ એન્ટ્રી ફિલ્મમાં વધુ ઉત્સાહ ઉમેરે છે. કુલ મળીને, ‘અલ્ફા’ એક એન્ટરટેઇનિંગ સ્પાય થ્રિલર છે, જે એક્શન ફિલ્મોના ચાહકોને નિરાશ નહીં કરે.
