આપણે રોજિંદા જીવનમાં ઘણી એવી બાબતો માટે Google પર આધાર રાખીએ છીએ, જેના જવાબ કદાચ થોડી જ સેકન્ડમાં મળી જાય છે. કોઈ જગ્યાનું સરનામું શોધવું હોય, કોઈ શબ્દનો અર્થ સમજવો હોય, કોઈ સમાચારની માહિતી મેળવવી હોય, રેસિપી શોધવી હોય, રસ્તો ક્યાંથી જવો તે જાણવું હોય કે પછી કોઈ વાતને લઈને મનમાં શંકા હોય, આપણે તરત Google ખોલી નાખીએ છીએ. ઘણી વખત કોઈ મિત્ર કે પરિવારના સભ્યને કોઈ સવાલનો જવાબ ન ખબર હોય તો પણ આપણે તેને સહજતાથી કહીએ છીએ, “Just Google it” એટલે કે “ગૂગલ પર સર્ચ કરી લો.” આજે Google આપણા જીવનમાં એટલું સામાન્ય બની ગયું છે કે કોઈ માહિતી શોધવી હોય ત્યારે “Google કરવું” એક સામાન્ય ક્રિયા બની ગઈ છે. સર્ચ કરવા ઉપરાંત વીડિયો જોવા, ઈમેલ મોકલવા, રસ્તો શોધવા, ઓનલાઈન કામ કરવા અને અનેક પ્રકારની માહિતી મેળવવા માટે અબજો લોકો દરરોજ Googleની વિવિધ સેવાઓનો ઉપયોગ કરે છે. પરંતુ દુનિયાના સૌથી જાણીતા સર્ચ એન્જિન પાછળ એવી ઘણી રસપ્રદ અને અજાણી વાતો છે, જેના વિશે કદાચ તમે ક્યારેય સાંભળ્યું નહીં હોય.
જોકે Googleની સ્થાપના 4 સપ્ટેમ્બરે થઈ હતી, પરંતુ કંપની પરંપરાગત રીતે 27 સપ્ટેમ્બરે તેનો સત્તાવાર જન્મદિવસ ઉજવે છે. સ્ટેનફોર્ડ યુનિવર્સિટીના એક નાના સંશોધન પ્રોજેક્ટથી શરૂ થયેલું Google આજે દુનિયાની સૌથી જાણીતી ટેક્નોલોજી કંપનીઓમાંની એક બની ગયું છે. 1998માં લેરી પેજ અને સર્ગેઈ બ્રિન દ્વારા શરૂ કરવામાં આવેલી આ કંપનીનો શરૂઆતનો હેતુ ઇન્ટરનેટ પર ઝડપથી વધી રહેલી માહિતીને વધુ સારી રીતે ગોઠવીને લોકોને જરૂરી માહિતી સરળતાથી શોધવામાં મદદ કરવાનો હતો. સમય જતાં Google માત્ર સર્ચ એન્જિન પૂરતું મર્યાદિત રહ્યું નહીં. Gmail, Google Maps, Android, YouTube જેવી અનેક સેવાઓ સાથે તેણે ટેક્નોલોજીના અલગ-અલગ ક્ષેત્રોમાં પોતાની હાજરી બનાવી અને હવે આર્ટિફિશિયલ ઈન્ટેલિજન્સના ક્ષેત્રમાં પણ મોટા પાયે કામ કરી રહ્યું છે.
Googleના 28મા જન્મદિવસના અવસરે જાણીએ કંપની સાથે જોડાયેલી એવી 11 રસપ્રદ વાતો, જે કદાચ તમે જાણતા નહીં હોવ.
- જેનિફર લોપેઝના ડ્રેસે Google Imagesને પ્રેરણા આપી
Google Images શરૂ થયું તે પહેલાં સર્ચ એન્જિન મુખ્યત્વે ટેક્સ્ટ આધારિત પરિણામો બતાવતું હતું. 2000ના ગ્રેમી એવોર્ડ્સ પછી પરિસ્થિતિ બદલાઈ ગઈ. તે સમયે જેનિફર લોપેઝે પહેરેલો પ્રખ્યાત લીલો Versace ડ્રેસ ખૂબ ચર્ચામાં આવ્યો હતો. લોકો આ ડ્રેસના ફોટા જોવા માટે મોટી સંખ્યામાં Google પર સર્ચ કરવા લાગ્યા. પરંતુ તે સમયે Google પાસે ફોટા માટે અલગ સર્ચ સુવિધા નહોતી. આ વધતી માંગથી કંપનીને સમજાયું કે લોકોને માત્ર વેબસાઇટની લિંક્સ નહીં, પરંતુ સીધા ફોટા પણ શોધવા છે. ત્યારબાદ Google Images શરૂ કરવામાં આવ્યું અને ઈન્ટરનેટ પર માહિતી શોધવાની રીતમાં મોટો ફેરફાર આવ્યો.
- Google નામ એક ટાઇપિંગ ભૂલમાંથી આવ્યું હતું
આજે “Google” દુનિયાના સૌથી ઓળખી શકાય તેવા નામોમાંનું એક છે, પરંતુ શરૂઆતમાં આ નામ નક્કી જ નહોતું. લેરી પેજ અને સર્ગેઈ બ્રિને પોતાના સર્ચ એન્જિનનું નામ શરૂઆતમાં “BackRub” રાખ્યું હતું. કારણ કે તેમનું સિસ્ટમ વેબસાઇટ્સ વચ્ચેની લિંક્સનું વિશ્લેષણ કરતું હતું. પછી એવું નામ શોધવામાં આવ્યું જે ઇન્ટરનેટ પર રહેલી વિશાળ માહિતીનું પ્રતિનિધિત્વ કરી શકે. “Googol” નામનો ગણિતનો શબ્દ સૂચવવામાં આવ્યો હતો. Googol એટલે 1 પછી 100 શૂન્ય. પરંતુ ડોમેન ઉપલબ્ધ છે કે નહીં તે તપાસતી વખતે આ શબ્દ “Google” તરીકે લખાઈ ગયો અને આ ટાઇપિંગ ભૂલ જ આગળ જઈને કંપનીનું નામ બની ગઈ.
- Google લૉનમોવરની જગ્યાએ બકરાંનો ઉપયોગ કરતું હતું
Googleની ઓફિસમાં બકરાંઓને કામ કરતા જોઈને કદાચ તમને નવાઈ લાગે, પરંતુ કંપનીએ ખરેખર આવું કર્યું હતું. 2009માં Googleએ માઉન્ટેન વ્યૂ હેડક્વાર્ટરની આસપાસનું ઘાસ સાફ કરવા માટે લગભગ 200 બકરાં અને એક ભરવાડની મદદ લીધી હતી લૉનમોવરનો ઉપયોગ કરીને ઘાસ કાપવાને બદલે બકરાંઓ મેદાનમાં ફરીને ઘાસ ખાતાં હતાં. આ રીતને પરંપરાગત મશીનની સરખામણીમાં વધુ પર્યાવરણમિત્ર ગણવામાં આવી હતી. આ ઉપરાંત ઓફિસના કર્મચારીઓ માટે પણ આ એક અલગ અને રસપ્રદ અનુભવ હતો.
- Googleના એકથી વધુ ‘જન્મદિવસ’ છે
Googleનો જન્મદિવસ ક્યારે છે તે પ્રશ્નનો જવાબ એટલો સરળ નથી. કંપનીના ઇતિહાસમાં સર્ચ એન્જિન શરૂ થવાની તારીખ, કંપનીની સ્થાપના અને Google ડોમેન રજીસ્ટર થવાની તારીખ જેવી અલગ-અલગ મહત્વપૂર્ણ તારીખો છે. તેમ છતાં Google દર વર્ષે 27 સપ્ટેમ્બરે પોતાનો સત્તાવાર જન્મદિવસ ઉજવે છે. આ જ કારણ છે કે Googleનું ખાસ Birthday Doodle સામાન્ય રીતે આ દિવસે જોવા મળે છે.
- એક Google Search પાછળ પણ મોટી કમ્પ્યુટિંગ શક્તિ કામ કરે છે
Google પર કોઈ સવાલ લખીને Search કરવું આપણને માત્ર એક સેકન્ડનું કામ લાગે છે. પરંતુ તેની પાછળ વિશાળ કમ્પ્યુટિંગ સિસ્ટમ કામ કરે છે. Googleએ ભૂતકાળમાં એવી સરખામણી કરી હતી કે એક સર્ચ માટે ઉપયોગમાં લેવાતી કમ્પ્યુટિંગ શક્તિ 1969ના Apollo 11 ચંદ્ર મિશનને માર્ગદર્શન આપવા માટે ઉપલબ્ધ કમ્પ્યુટિંગ શક્તિ જેટલી હોઈ શકે છે. આ સરખામણી એ બતાવે છે કે છેલ્લા કેટલાક દાયકામાં કમ્પ્યુટિંગ ટેક્નોલોજી કેટલી ઝડપથી આગળ વધી છે. આજે આપણે મોબાઇલમાં એક સવાલ લખીએ અને તરત જવાબ મેળવી લઈએ છીએ, પરંતુ તેની પાછળ વિશાળ ડેટા સેન્ટર્સ અને કમ્પ્યુટિંગ સિસ્ટમ્સ કામ કરે છે.
- Googleએ ગળા પર પહેરી શકાય તેવા ઇલેક્ટ્રોનિક ટેટૂનું પેટન્ટ કરાવ્યું હતું
Google સાથે જોડાયેલી સૌથી વિચિત્ર ટેક્નોલોજીમાંથી એક ગળા પર પહેરી શકાય તેવા ઇલેક્ટ્રોનિક ટેટૂનો વિચાર હતો. Googleની માલિકીની Motorola Mobilityએ આવી ટેક્નોલોજી માટે પેટન્ટ ફાઇલ કરી હતી. આ લવચીક ઇલેક્ટ્રોનિક પેચને ગળા પર લગાવી શકાય અને તે માઇક્રોફોનની જેમ કામ કરી શકે તેવી કલ્પના કરવામાં આવી હતી. તેની મદદથી અવાજ અને શરીર સાથે જોડાયેલી કેટલીક માહિતી પણ માપી શકાય તેવી યોજના હતી. જોકે આ માત્ર પેટન્ટ સુધી મર્યાદિત રહ્યું અને સામાન્ય ગ્રાહકો માટે કોઈ ઉત્પાદન તરીકે બજારમાં આવ્યું નહીં.
- પહેલું Google Doodle માત્ર ‘ઓફિસમાં નથી’ એવો સંદેશ હતો
આજે Google Doodle દ્વારા તહેવારો, મહાન વ્યક્તિઓ, વૈજ્ઞાનિકો અને મહત્વપૂર્ણ દિવસોને યાદ કરવામાં આવે છે. પરંતુ પહેલું Doodle એટલું ભવ્ય નહોતું. ઓગસ્ટ 1998માં લેરી પેજ અને સર્ગેઈ બ્રિને Googleના લોગોમાં એક નાની માનવ આકૃતિ ઉમેરી હતી. તેનો હેતુ વપરાશકર્તાઓને જણાવવાનો હતો કે તેઓ Burning Man Festivalમાં ગયા છે અને ઓફિસમાં હાજર નથી. આ નાનકડો પ્રયોગ આગળ જઈને Googleની સૌથી જાણીતી પરંપરાઓમાંની એક બની ગયો.
- Googleના શરૂઆતના સર્વરનું આવરણ LEGOથી બનાવાયું હતું
Googleની શરૂઆતના દિવસોમાં તેના સર્વર પણ આજના વિશાળ ડેટા સેન્ટર જેવા નહોતા. 1996માં સ્ટેનફોર્ડ યુનિવર્સિટીમાં લેરી પેજ અને સર્ગેઈ બ્રિન પોતાના PageRank અલ્ગોરિધમનું પરીક્ષણ કરી રહ્યા હતા અને તેમને મોટી માત્રામાં ડેટા સ્ટોર કરવાની જરૂર હતી. તેમણે 4GBની 10 હાર્ડ ડ્રાઇવને જોડીને કુલ 40GB સ્ટોરેજ તૈયાર કર્યું હતું. આ ડ્રાઇવને રાખવા માટે મોંઘા પરંપરાગત સર્વર કેસની જગ્યાએ LEGO જેવા પ્લાસ્ટિકના બિલ્ડિંગ બ્લોક્સ અને પેકિંગ ટેપનો ઉપયોગ કરવામાં આવ્યો હતો. શરૂઆતના Googleના આ સરળ અને અનોખા સેટઅપને આજે પણ કંપનીના શરૂઆતના ઇતિહાસ સાથે જોડવામાં આવે છે.
- YouTube ખરીદવાનો સોદો મોઝેરેલા સ્ટિક્સ ખાતા નક્કી થયો હતો
2006માં Googleએ YouTubeને 1.65 અબજ ડોલરમાં ખરીદવાનો સોદો કર્યો હતો. આ સોદાની ચર્ચા કોઈ ભવ્ય બોર્ડરૂમમાં નહીં, પરંતુ કેલિફોર્નિયાની Denny’s ડાઇનરમાં થઈ હતી. YouTubeના સ્થાપકો અને Googleના લોકો વચ્ચેની ચર્ચા દરમિયાન મોઝેરેલા સ્ટિક્સ પણ ખાવામાં આવી હતી. આ ઘટના ટેક્નોલોજી જગતના સૌથી મોટા સોદાઓમાંથી એક સાથે જોડાયેલી રસપ્રદ વાત બની ગઈ.
- મફત ભોજન અને ડોગ-ફ્રેન્ડલી ઓફિસની સંસ્કૃતિને Googleએ લોકપ્રિય બનાવી
Googleની ઓફિસ સંસ્કૃતિ પણ ટેક્નોલોજી જગતમાં ઘણી ચર્ચિત રહી છે. કંપની પોતાના કર્મચારીઓને મફત નાસ્તો, લંચ અને વિવિધ પ્રકારના સ્નેક્સ આપવા માટે જાણીતી બની. તેનો હેતુ કર્મચારીઓને એકબીજા સાથે મળવા, સાથે જમવા અને કામ દરમિયાન ચર્ચા-વિચારણા કરવા માટે વધુ તક આપવાનો હતો. Googleની ઘણી ઓફિસોમાં કૂતરાંને પણ આવવાની મંજૂરી આપવામાં આવી હતી. આ પ્રકારની કર્મચારી-મૈત્રીપૂર્ણ ઓફિસ સંસ્કૃતિ બાદ અન્ય ઘણી ટેક્નોલોજી કંપનીઓમાં પણ જોવા મળી.
- Gmailનું લોન્ચિંગ ઘણા લોકોને April Fool’s Dayની મજાક લાગ્યું હતું
1 એપ્રિલ, 2004ના રોજ Googleએ Gmail શરૂ કરવાની જાહેરાત કરી. તારીખ April Fool’s Day હોવાથી શરૂઆતમાં ઘણા લોકોને લાગ્યું કે Google કોઈ મજાક કરી રહ્યું છે. તે સમયે 1GB મફત ઈમેલ સ્ટોરેજ આપવાનો વિચાર જ લોકોને અવિશ્વસનીય લાગતો હતો. કારણ કે તે સમયની ઘણી ઈમેલ સેવાઓ તેની સરખામણીમાં ઘણી ઓછી સ્ટોરેજ આપતી હતી. પરંતુ Gmail ખરેખર શરૂ થયું અને થોડા જ સમયમાં તે વિશ્વની સૌથી જાણીતી ઈમેલ સેવાઓમાંની એક બની ગયું.
આજે Googleની સફર માત્ર સર્ચ એન્જિન સુધી મર્યાદિત રહી નથી. કંપની આર્ટિફિશિયલ ઈન્ટેલિજન્સના ક્ષેત્રમાં પણ મોટા પાયે કામ કરી રહી છે. Gemini જેવા AI મોડલ્સ ઉપરાંત Search, Gmail, Docs, Maps અને Android જેવી સેવાઓમાં પણ AI સુવિધાઓ ઉમેરવામાં આવી રહી છે. Google પોતાના AI ઇન્ફ્રાસ્ટ્રક્ચર માટે ખાસ Tensor Processing Units એટલે કે TPUs પણ વિકસાવે છે.
