સુરત શહેરમાં સતત વરસી રહેલા ભારે વરસાદ અને આગામી કલાકોમાં વધુ વરસાદની આગાહીને ધ્યાનમાં રાખીને સુરત મહાનગરપાલિકા (SMC) સંપૂર્ણપણે હાઈ એલર્ટ પર આવી ગઈ છે. શહેરમાં કોઈપણ પ્રકારની વરસાદી આપત્તિનો ઝડપથી સામનો કરી શકાય તે માટે પાલિકા દ્વારા તમામ ઝોનમાં 24 કલાક કાર્યરત કંટ્રોલ રૂમ શરૂ કરવામાં આવ્યા છે. વરસાદની સ્થિતિ, નીચાણવાળા વિસ્તારોમાં પાણી ભરાવાની ફરિયાદો અને બચાવ કામગીરી પર સતત નજર રાખવામાં આવી રહી છે.પાલિકા દ્વારા તમામ ઝોનમાં ઇમરજન્સી પ્રતિસાદ માટે વિશેષ વ્યવસ્થા કરવામાં આવી છે. ડીવોટરિંગ પંપ, JCB મશીનો, ટ્રેક્ટર, બોટ, ફાયર બ્રિગેડની ટીમો, બચાવ સાધનો અને જરૂરી મશીનરીને સ્ટેન્ડબાય રાખવામાં આવી છે, જેથી કોઈપણ વિસ્તારથી ફરિયાદ મળતા જ તાત્કાલિક કામગીરી શરૂ કરી શકાય. વિવિધ વિભાગોના અધિકારીઓ અને કર્મચારીઓને પણ 24 કલાક ફરજ પર રહેવા સૂચના આપવામાં આવી છે.
ભારે વરસાદ દરમિયાન શહેરના નીચાણવાળા વિસ્તારો, મુખ્ય માર્ગો, અંડરપાસ, નાળા અને ખાડીઓ પર સતત દેખરેખ રાખવામાં આવી રહી છે. જ્યાં પાણી ભરાવાની શક્યતા છે ત્યાં ડીવોટરિંગ પંપની મદદથી ઝડપથી પાણી કાઢવાની કામગીરી માટે ટીમો તૈયાર રાખવામાં આવી છે. ફાયર બ્રિગેડ ઉપરાંત ઇજનેરી વિભાગ અને અન્ય તંત્ર વચ્ચે પણ સતત સંકલન રાખવામાં આવી રહ્યું છે.વહીવટી તંત્રે શહેરના નાગરિકોને ખાસ અપીલ કરી છે કે અતિઆવશ્યક કામ સિવાય ઘરની બહાર ન નીકળે. ખાસ કરીને પાણી ભરાયેલા રસ્તાઓ, ખુલ્લા નાળા, ખાડીઓ અને પાણીના તેજ પ્રવાહવાળા વિસ્તારોમાં જવાનું ટાળવું જોઈએ. વરસાદ દરમિયાન વાહન ચલાવતા લોકો પણ પૂરતી સાવચેતી રાખે અને બિનજરૂરી મુસાફરી ન કરે તેવી સૂચના આપવામાં આવી છે.
પાલિકાએ લોકોને સોશિયલ મીડિયા પર ફરતી અફવાઓથી દૂર રહેવા અને માત્ર સત્તાવાર માહિતી પર જ વિશ્વાસ રાખવા પણ અપીલ કરી છે. કોઈપણ ઇમરજન્સી સ્થિતિમાં નજીકના ઝોનલ કંટ્રોલ રૂમ અથવા પાલિકાના કંટ્રોલ રૂમનો સંપર્ક કરવા જણાવાયું છે.શહેરમાં વરસાદી પરિસ્થિતિ પર સતત નજર રાખવા માટે વરસાદ, નદીના જળસ્તર અને નીચાણવાળા વિસ્તારોની સ્થિતિનું નિયમિત મોનિટરિંગ કરવામાં આવી રહ્યું છે. પાલિકાનું ડિઝાસ્ટર મેનેજમેન્ટ તંત્ર પણ સતત સક્રિય છે અને જરૂર પડે તો તાત્કાલિક બચાવ અને રાહત કામગીરી હાથ ધરવા માટે તૈયાર છે.પાલિકાએ સ્પષ્ટ કર્યું છે કે શહેરના તમામ ઝોનમાં અધિકારીઓને સતર્ક રહેવા સૂચના આપવામાં આવી છે અને કોઈપણ ઇમરજન્સી કોલનો તાત્કાલિક પ્રતિસાદ આપવામાં આવશે. વરસાદની સ્થિતિ સામાન્ય ન થાય ત્યાં સુધી તમામ ઇમરજન્સી સેવાઓ હાઈ એલર્ટ પર રહેશે.
