હોસ્ટેલ, ગેટ, રસ્તા અને પાર્કિંગ સહિત સંવેદનશીલ સ્થળો પર નજર
વિદ્યાર્થીઓને સુરક્ષિત શિક્ષણ અને રહેવાનું વાતાવરણ મળશે
( પ્રતિનિધિ )વડોદરા,તા.9
મહારાજા સયાજીરાવ યુનિવર્સિટી કેમ્પસની સુરક્ષા વ્યવસ્થા હવે વધુ મજબૂત બનવા જઈ રહી છે. દરરોજ હજારો વિદ્યાર્થીઓ અહીં અભ્યાસ અને વસવાટ કરે છે ત્યારે સુરક્ષા માળખાને અદ્યતન બનાવવું અનિવાર્ય બન્યું હતું. જેને ધ્યાનમાં રાખીને યુનિવર્સિટી તંત્ર દ્વારા મોટી સર્વેલન્સ પહેલ હાથ ધરવામાં આવી છે.
મહારાજા સયાજીરાવ યુનિવર્સિટી દ્વારા કુલ 89.06 લાખ રૂપિયાના ખર્ચે સમગ્ર કેમ્પસમાં 313 સીસીટીવી કેમેરા લગાવવાની કામગીરી કરવામાં આવશે. આ પ્રોજેક્ટ અંતર્ગત હોસ્ટેલ, એન્ટ્રી ગેટ, આંતરિક રસ્તાઓ, પાર્કિંગ એરિયા અને અન્ય સંવેદનશીલ સ્થળોને સર્વેલન્સ હેઠળ લાવવામાં આવશે. યુનિવર્સિટીના અધિકારીઓનું કહેવું છે કે આ નવી પહેલથી કેમ્પસની સુરક્ષા વધુ સુદ્રઢ બનશે. મુખ્ય વિસ્તારો પર સતત નજર રાખી શકાશે અને કોઈપણ કટોકટીના સમયે ઝડપથી પ્રતિભાવ આપી શકાશે. જેના કારણે વિદ્યાર્થીઓ, સ્ટાફ અને મુલાકાતીઓ સૌ કોઈને સુરક્ષિત જીવન અને શિક્ષણનું વાતાવરણ મળશે. આ પ્રોજેક્ટ યુનિવર્સિટીના ટેકનોલોજીના ઉપયોગ દ્વારા સુરક્ષા વધારવાના વધતા ફોકસને દર્શાવે છે. નવી સિસ્ટમથી માત્ર મોનિટરિંગ જ નહીં પરંતુ સમગ્ર યુનિવર્સિટી પરિવારને વધુ માનસિક શાંતિ પણ મળશે.
