વૈભવ સૂર્યવંશી ભારત માટે ડેબ્યુ કરનાર સૌથી યુવા ક્રિકેટર બન્યો છે. તે 15 વર્ષ અને 99 દિવસની ઉંમરે ઇંગ્લેન્ડ સામે પોતાની પહેલી આંતરરાષ્ટ્રીય મેચ રમી રહ્યો છે. તિલક વર્માએ વૈભવને ડેબ્યૂ કેપ રજૂ કરી. વૈભવે શેફાલી વર્મા અને સચિન તેંડુલકરના રેકોર્ડ તોડી નાખ્યા. શેફાલીએ 15 વર્ષ અને 239 દિવસની ઉંમરે ભારત માટે પ્રવેશ કર્યો હતો જ્યારે સચિને 16 વર્ષ અને 205 દિવસની ઉંમરે પ્રવેશ કર્યો હતો. ભારતે બીજી T20 મેચમાં ટોસ જીતીને બેટિંગ કરવાનો નિર્ણય લીધો.
વૈભવ સૂર્યવંશીએ ભારત માટે T20 આંતરરાષ્ટ્રીય ક્રિકેટમાં ડેબ્યૂ કર્યું તે સ્થળ ઓલ્ડ ટ્રેફોર્ડ, માન્ચેસ્ટર એ જ મેદાન છે જ્યાં સચિન તેંડુલકરે 14 ઓગસ્ટ, 1990 ના રોજ પોતાની ટેસ્ટ કારકિર્દીની પહેલી સદી ફટકારી હતી. તે સમયે 17 વર્ષ અને 112 દિવસની ઉંમરે સચિને ઇંગ્લેન્ડ સામે અણનમ 119 રન બનાવ્યા હતા, જેનાથી ભારત હારથી બચી ગયું હતું.
આજે ઇંગ્લેન્ડ સામેન મેચમાં ભારતે ટોસ જીતીને સતત બીજી મેચ માટે પ્રથમ બેટિંગ કરવાનો નિર્ણય લીધો હતો. કેપ્ટન શ્રેયસ ઐયરે પ્લેઇંગ ઇલેવનમાં એક ફેરફાર કર્યો હતો, જેમાં સંજુ સેમસનની જગ્યાએ 15 વર્ષના વૈભવ સૂર્યવંશીને તક આપવામાં આવી હતી. ટોસ પછી શ્રેયસે કહ્યું, “અમે પહેલા બેટિંગ કરીશું. છેલ્લા કેટલાક મહિનાઓમાં વૈભવે જે રીતે બેટિંગ કરી છે તે જોતાં તે આ તકનો સંપૂર્ણ હકદાર છે. તે એક એવો ખેલાડી છે જેને બિલકુલ દબાણનો અનુભવ થતો નથી. તે આગળ આવનારા પડકારોથી સારી રીતે વાકેફ છે.”
તાળીઓ સાથે વૈભવનું સ્વાગત
મેચ શરૂ થાય તે પહેલાં ભારતીય ટીમ એકઠી થઈ હતી, જ્યાં તિલક વર્માએ 15 વર્ષીય વૈભવ સૂર્યવંશીને તેની પહેલી ભારતીય કેપ આપી. ત્યારબાદ તેના સાથી ખેલાડીઓએ તાળીઓના ગડગડાટ અને પીઠ થપથપાવીને તેનું સ્વાગત કર્યું. આ સાથે વૈભવ T20 આંતરરાષ્ટ્રીય ક્રિકેટમાં ડેબ્યૂ કરનાર સૌથી યુવા ખેલાડી બન્યો.
અમર સિંહને ભારતની પહેલી ડેબ્યૂ કેપ મળી હતી
ક્રિકેટમાં દરેક નવા ખેલાડીને તેમની પહેલી આંતરરાષ્ટ્રીય મેચ પહેલા ડેબ્યૂ કેપ આપવામાં આવે છે. આ સન્માન પ્રથમ વખત તેમના દેશ માટે રમવાનું પ્રતીક છે. વિશ્વની પહેલી ટેસ્ટ ડેબ્યૂ કેપ 1877માં ઓસ્ટ્રેલિયાના ચાર્લ્સ બેનરમેનને આપવામાં આવી હતી. અમર સિંહને ભારતની પહેલી ટેસ્ટ કેપ (કેપ નંબર 1) મળી હતી. તેમણે ૧૯૩૨માં લોર્ડ્સમાં ઇંગ્લેન્ડ સામે ભારતની પ્રથમ ટેસ્ટ મેચમાં પોતાનું ડેબ્યૂ કર્યું હતું. ડેબ્યૂ કેપ પરનો નંબર તે ખેલાડીના કાલક્રમિક ક્રમ દર્શાવે છે જેમણે તે ચોક્કસ ફોર્મેટમાં પોતાના દેશનું પ્રતિનિધિત્વ કર્યું છે.
