દેશભરમાં ઈંધણના નવા ભાવ લાગુ, જાણો તમારા શહેરના તાજા રેટ
દેશમાં સતત વધી રહેલી મોંઘવારી વચ્ચે હવે સામાન્ય જનતાને ફરી એકવાર મોટો આર્થિક ઝટકો લાગ્યો છે. માત્ર 10 દિવસમાં પેટ્રોલ અને ડીઝલના ભાવમાં ત્રીજી વખત વધારો કરવામાં આવ્યો છે. આ સતત વધારાને કારણે હવે અનેક શહેરોમાં પેટ્રોલના ભાવ ₹100ને પાર પહોંચી ગયા છે, જ્યારે ડીઝલના દરોમાં પણ નોંધપાત્ર વધારો નોંધાયો છે. સરકારી ઓઈલ માર્કેટિંગ કંપનીઓએ શનિવારે ફરી નવા ભાવ જાહેર કર્યા હતા. નવા દર મુજબ પેટ્રોલમાં આશરે 87 પૈસા પ્રતિ લિટર અને ડીઝલમાં 91 પૈસા પ્રતિ લિટર સુધીનો વધારો કરવામાં આવ્યો છે. આ સાથે છેલ્લા 10 દિવસમાં કુલ વધારો લગભગ ₹5 પ્રતિ લિટર સુધી પહોંચી ગયો હોવાનું સામે આવ્યું છે.
તાજેતરના વધારા બાદ દેશના મુખ્ય શહેરોમાં ઈંધણના ભાવ આ મુજબ નોંધાયા છે:
દિલ્હીમાં પેટ્રોલ ₹99.51 પ્રતિ લિટર અને ડીઝલ ₹92.49 પ્રતિ લિટર
મુંબઈમાં પેટ્રોલ ₹108.49 પ્રતિ લિટર અને ડીઝલ ₹95.02 પ્રતિ લિટર
કોલકાતામાં પેટ્રોલ ₹110.64 પ્રતિ લિટર અને ડીઝલ ₹97.02 પ્રતિ લિટર
ચેન્નઈમાં પેટ્રોલ ₹105.31 પ્રતિ લિટર અને ડીઝલ ₹96.98 પ્રતિ લિટર સુધી પહોંચી ગયું છે.
ગુજરાતમાં પણ ઈંધણના ભાવમાં વધારો નોંધાયો છે. અમદાવાદ, સુરત, વડોદરા અને રાજકોટ જેવા શહેરોમાં લોકો હવે વધુ મોંઘું પેટ્રોલ-ડીઝલ ખરીદવા મજબૂર બન્યા છે. અગાઉ થયેલા વધારા બાદ ગુજરાતમાં પેટ્રોલ આશરે ₹97થી ₹100ની વચ્ચે પહોંચી ગયું હોવાનું સામે આવ્યું હતું.વિશ્લેષકોનું માનવું છે કે વૈશ્વિક બજારમાં ક્રૂડ ઓઈલના વધતા ભાવ અને મધ્ય પૂર્વમાં વધી રહેલા તણાવના કારણે ભારત જેવા આયાત આધારિત દેશો પર સીધી અસર પડી રહી છે. ખાસ કરીને Iran અને પશ્ચિમ એશિયાની પરિસ્થિતિને કારણે વૈશ્વિક સપ્લાય ચેઇન પ્રભાવિત થઈ છે, જેના કારણે કાચા તેલના ભાવમાં ભારે ઉછાળો આવ્યો છે.
અહેવાલ મુજબ ભારત હાલમાં તેની કુલ જરૂરિયાતનું આશરે 85થી 90 ટકા ક્રૂડ ઓઈલ આયાત કરે છે. તેથી આંતરરાષ્ટ્રીય બજારમાં થતા ફેરફારોનો સીધો પ્રભાવ સ્થાનિક બજારમાં જોવા મળે છે. ઓઈલ કંપનીઓનું કહેવું છે કે તેઓ લાંબા સમયથી વધેલા વૈશ્વિક ભાવનો બોજ સહન કરી રહી હતી અને હવે તેમને રિટેલ ભાવમાં વધારો કરવો જરૂરી બન્યો છે. તાજેતરના દિવસોમાં કેન્દ્ર સરકારે પણ લોકોને ઈંધણ બચાવવાની અપીલ કરી છે. વડાપ્રધાન નરેન્દ્ર મોદીએ પણ ઊર્જા બચત અને અનાવશ્યક મુસાફરી ઘટાડવા પર ભાર મૂક્યો હતો. કેટલાક રાજ્યોમાં સરકારી વિભાગોને Work From Home અને ઑનલાઈન મીટિંગ જેવી વ્યવસ્થાઓ અપનાવવાની સલાહ આપવામાં આવી છે.
ઈંધણના વધેલા ભાવોની સીધી અસર હવે સામાન્ય જનજીવન પર જોવા મળી રહી છે. ટ્રાન્સપોર્ટ ખર્ચ વધતા શાકભાજી, દૂધ, ખાદ્ય પદાર્થો અને અન્ય દૈનિક ઉપયોગની વસ્તુઓના ભાવમાં પણ વધારો થવાની શક્યતા વ્યક્ત કરવામાં આવી રહી છે. અર્થશાસ્ત્રીઓનું કહેવું છે કે પેટ્રોલ-ડીઝલના ભાવમાં સતત વધારો મોંઘવારીને વધુ વેગ આપી શકે છે. દિલ્હીમાં તો ટેક્સી અને કોમર્શિયલ વાહન ચાલકો દ્વારા ભાડામાં વધારો કરવાની માંગ સાથે હડતાળની ચેતવણી પણ આપવામાં આવી છે.
CNGના ભાવમાં પણ વધારો થતાં ટ્રાન્સપોર્ટ સેક્ટર પર ડબલ અસર પડી રહી છે.
રાજકીય સ્તરે પણ આ મુદ્દે ભારે ચર્ચા ચાલી રહી છે. વિરોધ પક્ષોએ કેન્દ્ર સરકાર પર નિશાન સાધતા કહ્યું છે કે સતત વધતી મોંઘવારીથી સામાન્ય માણસનું બજેટ સંપૂર્ણપણે ખોરવાઈ રહ્યું છે. બીજી તરફ સરકારનું કહેવું છે કે વૈશ્વિક પરિસ્થિતિઓને કારણે આ પગલાં જરૂરી બન્યા છે.હાલ માટે લોકોની નજર હવે આગામી દિવસોમાં ઓઈલ કંપનીઓ અને સરકારના નિર્ણય પર ટકેલી છે. જો વૈશ્વિક બજારમાં ક્રૂડ ઓઈલના ભાવ વધુ વધશે તો દેશમાં પેટ્રોલ-ડીઝલના ભાવમાં હજુ વધુ વધારો થવાની શક્યતા વ્યક્ત કરવામાં આવી રહી છે.
