ચીનના દક્ષિણ ભાગમાં આવેલા Guangxi સ્વાયત્ત પ્રદેશમાં સોમવારની મધરાતે આવેલા જોરદાર ભૂકંપે ભારે તબાહી મચાવી છે. રિક્ટર સ્કેલ પર 5.2ની તીવ્રતા ધરાવતા આ ભૂકંપમાં અત્યાર સુધી 2 લોકોના મોત થયા હોવાનું સામે આવ્યું છે, જ્યારે એક વ્યક્તિ હજુ પણ ગુમ હોવાનું જણાવાયું છે. ભૂકંપના જોરદાર આંચકાથી લોકોમાં ભારે ગભરાટ ફેલાઈ ગયો હતો. ઘણા લોકો મોડી રાત્રે જ પોતાના ઘરો છોડીને રસ્તા પર દોડી આવ્યા હતા. અનેક વિસ્તારોમાં લોકો આખી રાત ખુલ્લા મેદાનો અને રસ્તાઓ પર જ રહ્યા હતા. ચીનની સરકારી સમાચાર એજન્સી શિન્હુઆ અને સરકારી ટીવી ચેનલ CCTVના અહેવાલ મુજબ, સોમવારે રાત્રે લગભગ 12:21 વાગ્યે આ ભૂકંપ આવ્યો હતો. તેનું કેન્દ્ર Guangxi પ્રદેશના Liuzhou શહેરના Liunan જિલ્લામાં આવેલ Taiyangchun નગર પાસે હતું. ભૂકંપનું કેન્દ્ર જમીનથી માત્ર 8 કિલોમીટર ઊંડે હોવાથી તેની અસર ખૂબ જ તીવ્ર અનુભવાઈ હતી. ઓછી ઊંડાઈના કારણે આંચકા વધુ વિનાશક સાબિત થયા હતા અને પળવારમાં જ અનેક ઇમારતો કંપી ઉઠી હતી. સ્થાનિક વહીવટી તંત્રના જણાવ્યા મુજબ, આ ભૂકંપમાં ઓછામાં ઓછી 13 ઇમારતો ધરાશાયી થઈ ગઈ છે. ઉપરાંત અનેક રહેણાંક મકાનો અને અન્ય ઇમારતોને ભારે નુકસાન પહોંચ્યું છે.
પરિસ્થિતિ ગંભીર બનતા પ્રશાસને તરત જ બચાવ અને રાહત કામગીરી શરૂ કરી દીધી હતી. અત્યાર સુધીમાં 7000થી વધુ લોકોને સુરક્ષિત સ્થળોએ ખસેડવામાં આવ્યા છે. અસરગ્રસ્ત લોકો માટે તાત્કાલિક રાહત શિબિરો પણ શરૂ કરવામાં આવી છે, જ્યાં ખોરાક, પાણી અને તબીબી સુવિધાઓ પૂરી પાડવામાં આવી રહી છે. કાટમાળ નીચે દબાયેલા લોકોને બચાવવા માટે રેસ્ક્યૂ ટીમો સતત કામગીરી કરી રહી છે. ભૂકંપમાં ઘાયલ થયેલા ચાર લોકોને હોસ્પિટલમાં દાખલ કરવામાં આવ્યા છે. હાલ તેમની સ્થિતિ સ્થિર હોવાનું કહેવામાં આવી રહ્યું છે. ગુમ થયેલા એક વ્યક્તિની શોધખોળ માટે પણ વિશેષ બચાવ કામગીરી હાથ ધરવામાં આવી છે. પ્રશાસનને આશંકા છે કે હજુ કેટલાક લોકો કાટમાળ નીચે ફસાયેલા હોઈ શકે છે. ભૂકંપની અસર માત્ર Liuzhou શહેર પૂરતી મર્યાદિત રહી નહોતી. Guangxi પ્રદેશના અન્ય મોટા શહેરો જેમ કે Nanning અને Guilinમાં પણ લોકોએ જોરદાર આંચકા અનુભવ્યા હતા.
આ ઘટનાને પગલે રેલવે વિભાગે પણ સાવચેતીના ભાગરૂપે તમામ રેલવે ટ્રેક અને લાઇનોની તપાસ શરૂ કરી છે. કેટલીક ટ્રેનોના શિડ્યુલમાં ફેરફાર અથવા વિલંબ થવાની શક્યતા વ્યક્ત કરવામાં આવી છે. જોકે રાહતની વાત એ છે કે વીજળી, પાણી, ગેસ અને ટેલિકોમ્યુનિકેશન જેવી આવશ્યક સેવાઓ હાલ સામાન્ય રીતે ચાલુ છે. ચીનના આપત્તિ વ્યવસ્થાપન વિભાગે આગામી સમયમાં આફ્ટરશોક્સ આવવાની શક્યતા વ્યક્ત કરી છે. તેથી સ્થાનિક લોકોને સતર્ક રહેવા અને પ્રશાસનની સૂચનાઓનું પાલન કરવા અપીલ કરવામાં આવી છે.
