ઉમેદવારોના સમર્થકો માટે મંડપ-પાણીની કોઈ વ્યવસ્થા નહીં, મીડિયા પ્રવેશ પર પણ પ્રતિબંધ
વૃદ્ધને હડસેલાતા ભાજપના પૂર્વ જિલ્લા મહામંત્રી અને પોલીસ વચ્ચે નોકઝોક
વાઘોડિયા::
સ્થાનિક સ્વરાજ્યની તાલુકા પંચાયત, જિલ્લા પંચાયત અને નગરપાલિકાની ચૂંટણીના પરિણામો જાહેર કરવા વાઘોડિયા સેવા સદન ખાતે ગોઠવાયેલી મતગણતરી દરમિયાન તંત્રની બેદરકારી સામે આવી હતી. સેવા સદન પરિસરમાં મીડિયાના પ્રવેશ પર પ્રતિબંધ મૂકવામાં આવ્યો હતો, જે વર્ષોમાં પહેલીવાર બન્યું હોવાનું ચર્ચાઈ રહ્યું છે.
સેવા સદન બહાર ચૂંટણીના પરિણામોની રાહ જોતા ઉમેદવારો, તેમના સમર્થકો અને સામાન્ય નાગરિકો માટે મંડપ કે પીવાના પાણી જેવી કોઈપણ સુવિધા ઉપલબ્ધ કરાવવામાં આવી ન હતી. કાળઝાળ ગરમીમાં લોકોને ખુલ્લા આકાશ નીચે ઉભા રહેવું પડતાં ભારે અસંતોષ ફેલાયો હતો. પોલીસ દ્વારા સેવા સદન નજીક લોકોને દૂર હડસેલવામાં આવતાં પરિસ્થિતિ વધુ તંગ બની હતી.
આ દરમિયાન ઝાડના છાંયડા નીચે ઉભેલા એક વૃદ્ધને હડસેલાતા વડોદરા જિલ્લાના ભાજપના પૂર્વ મહામંત્રી ધર્મેશભાઈ પંડ્યાએ વિરોધ નોંધાવતા પોલીસ સાથે નોકઝોક થઈ હતી. તેમણે તંત્રની લાપરવાહી સામે સવાલ ઉઠાવતા જણાવ્યું હતું કે પ્રજાને મૂળભૂત સુવિધા આપવામાં નિષ્ફળતા ચિંતાજનક છે.
મામલતદાર કચેરી તરફથી ચૂંટણી પંચના નિયમોને કારણે ખર્ચ કરી શકાતો ન હોવાની મજબૂરી દર્શાવવામાં આવી હતી. જોકે વાઘોડિયાના ઇતિહાસમાં પહેલીવાર આવી અવ્યવસ્થાને કારણે લોકોને ભારે હેરાનગતિનો સામનો કરવો પડ્યો હોવાનું ચર્ચાઈ રહ્યું છે.
રિપોર્ટર: બજરંગ શર્મા
