Suratમાં અચાનક આવેલા મીની વાવાઝોડાએ એક દુઃખદ ઘટના સર્જી છે. શહેરના પર્વત પાટિયા વિસ્તારમાં શાયોના પ્લાઝા નજીક સુરત મહાનગરપાલિકાનું ભારે બોર્ડ તીવ્ર પવનના કારણે તૂટી પડ્યું હતું. આ બોર્ડ સીધું જ એક યુવક પર પડતાં તેનું ઘટનાસ્થળે જ મોત થયું હતું. આ અચાનક બનેલી ઘટનાએ સમગ્ર વિસ્તારમાં અફરાતફરી મચાવી દીધી હતી. આસપાસના લોકો તરત જ મદદ માટે દોડી આવ્યા, પરંતુ યુવકને બચાવી શકાયો નહોતો. ત્યારબાદ મૃતદેહને તાત્કાલિક સ્મીમેર હોસ્પિટલ ખસેડવામાં આવ્યો, જ્યાં પોસ્ટમોર્ટમની પ્રક્રિયા હાથ ધરાઈ છે. હાલ મૃતકની ઓળખ થઈ શકી નથી અને પોલીસે તેની ઓળખ માટે તપાસ શરૂ કરી છે. ભારે પવન અને વાવાઝોડા જેવી પરિસ્થિતિઓ દરમિયાન શહેરમાં લગાવવામાં આવેલા બોર્ડ અને અન્ય સ્ટ્રક્ચરની સલામતી અંગે ગંભીર પ્રશ્નો ઉભા કર્યા છે. સ્થાનિક વહીવટી તંત્ર અને પોલીસ ઘટના સ્થળે પહોંચી વધુ તપાસ કરી રહ્યા છે.
પીપલોદ વિસ્તારમાં શારદા યતન સ્કૂલ નજીક એક મોટું ઝાડ ધરાશાયી થયું છે, જ્યારે પુણા વિસ્તારમાં લેન્ડમાર્ક પાસે લોખંડનો પોલ પડી જતાં લોકોમાં ભયનો માહોલ ઉભો થયો. ભરચક નાનપુરા વિસ્તારમાં પણ એક મોટું વૃક્ષ અચાનક પસાર થતી કાર પર ધરાશાયી થઈ ગયું હતું. સદનસીબે કારમાં સવાર લોકો સુરક્ષિત બચી ગયા અને કોઈ ગંભીર ઇજાના અહેવાલ નથી, પરંતુ આ ઘટનાને કારણે રસ્તા પર ટ્રાફિક ખોરવાઈ ગયો હતો. આકસ્મિક પવન અને ધૂળના વંટોળને કારણે શહેરના અનેક વિસ્તારોમાં વિઝિબલિટી ઘટી ગઈ હતી, જેના કારણે વાહનચાલકોને ભારે મુશ્કેલીનો સામનો કરવો પડ્યો. ઘણા લોકોએ અકસ્માતના ભયથી વાહનો રસ્તાની સાઇડમાં ઊભા રાખવા પડ્યા હતા. અડાજણ સહિતના વિસ્તારોમાં વીજળી ગુલ થઈ જતા અંધારપટ છવાઈ ગયો હતો. સાથે જ પવન સાથે હળવા વરસાદી છાંટા પણ નોંધાયા હતા. દિવસભરની ગરમી અને બફારા બાદ સાંજના સમયે અચાનક વધેલા પવનના જોરે શહેરમાં અસ્થિર પરિસ્થિતિ સર્જાઈ હતી. સ્થાનિક તંત્ર દ્વારા નાગરિકોને સાવચેત રહેવા, અનાવશ્યક બહાર ન નીકળવા અને ઝાડ-પોલ જેવી સંભવિત જોખમી વસ્તુઓથી દૂર રહેવાની અપીલ કરવામાં આવી છે.
